قازاقستاندىق وقۋشىلار وزدەرىنىڭ بيزنەس جوبالارىنا ينۆەستيتسيا تارتا الادى
جوبا قاتىسۋشىلارى ءبىر ايدا كاسىپكەرلىك داعدىلارىن ۇيرەنىپ، وزدەرىنىڭ بيزنەس-يدەيالارىن قۇردى جانە ءوز ونىمدەرىن تانىتۋ ءۇشىن ماركەتينگ نەگىزدەرىن زەرتتەدى، دەپ حابارلايدى قازاقپارات.
بيزنەس-ينكۋباتورعا قاتىسۋ ءۇشىن 200 ادام تىركەلدى، ونىڭ 70 ءى وقىتۋعا ىرىكتەلىپ الىنعان، ال فينالدىق كەزەڭگە 37 وقۋشى جەتكەن.
«بيزنەس-ينكۋباتور فيناليستەرى - Express Pharmacy دوڭعالاقتى ءدارىحاناسى، Gradu8 مەكتەپ كيىمى برەندى، زەرگەرلىك بۇيىمدار ونلاين- دۇكەنى، Shine ارنايى فوتوستۋدياسى، جەكە كونديتەرلىك دۇكەن، Dala School جاس وسپىرىمدەردى دامىتۋعا ارنالعان مەكتەبى، Gulde جىلىجايلاردى اۆتوماتتاندىرۋ جوباسى ەلىمىزدىڭ ەڭ باستى ستارتاپ- الاڭى - Astana Hub تەحنوپاركىندە ءوز جوبالارىن تانىستىردى.
فيناليستەر وزدەرىنىڭ شاعىن بيزنەسىن ىسكە قوسۋ مەن تەستىلەۋ ءۇشىن 50 مىڭ تەڭگە الدى.
«حالىق» قايىرىمدىلىق قورى Ozgeris بيزنەس- ينكۋباتورى قاتىسۋشىلارىنا جالپى سوماسى 2 ميلليون تەڭگەگە قارجىلاي قولداۋ كورسەتتى. «حالىق» قورى بيزنەس-ينكۋباتوردىڭ باستاماسىن ۇلكەن قۋانىشپەن قولدايدى، وندا ءاربىر جاس ءوسپىرىم ءوز يدەيالارىن جۇزەگە اسىرۋعا مۇمكىندىك الادى، قۇرداستارى مەن تاجىريبەلى مەنتورلاردىڭ قولداۋىنا يە بولادى جانە ءوزىنىڭ العاشقى ونىمدەرى مەن كاسىبىن جاسايدى. ءبىز وقۋشىلارعا ساتتىلىك تىلەيمىز جانە ولاردىڭ اتا-انالارى مەن مۇعالىمدەرىنە كاسىپكەرلىك جولىندا كورسەتكەن كومەگى ءۇشىن العىس بىلدىرەمىز. بولاشاقتا دا مەكتەپ جوبالارىن ءاردايىم قولدايمىز»، - دەلىنگەن قور ۇندەۋىندە.
بيزنەس- ينكۋباتورعا كەلەسى قابىلداۋ 2021-جىلدىڭ اقپان ايىندا وتەدى، وعان 1000 ادامدى تىركەۋ جوسپارلانىپ وتىر. قازاقستان بويىنشا 15-18 جاس ارالىعىنداعى جوعارى سىنىپ وقۋشىلارى مەن كوللەدج ستۋدەنتتەرى جوباعا تەگىن قاتىسا الادى. ءوتىنىش بەرۋ ءۇشىن atameken.co سايتىنداعى «Ozgeris» كۋرسىن قاراۋ كەرەك. اسىرەسە قاتىسۋشىنىڭ يدەياسى مەن بيزنەس- جوباسىنىڭ باستاپقى ازىرلەمەسى ارتىقشىلىققا يە بولادى. باعدارلاماعا قاتىسۋ ءۇشىن ەكىنشى لەككە وتىنىمدەر 2021-جىلدىڭ 1- اقپانىنا دەيىن سايتتا قابىلدانادى.
وقىتۋ Atameken Academy پلاتفورماسىندا ونلاين وتەدى.