جاڭا قاۋلى: ەلوردالىق ساۋدا ورتالىقتارى قالاي جۇمىس ىستەيدى؟

نۇر-سۇلتان. قازاقپارات - ەلوردالىق اكىمدىك، سەس جانە پوليتسيا دەپارتامەنتىنىڭ قىزمەتكەرلەرى ساۋدا-ويىن-ساۋىق ورتالىقتارىنىڭ جاڭا شەكتەۋ شارالارىندا قالاي جۇمىس ىستەيتىنىن ءتۇسىندىردى، دەپ حابارلايدى قازاقپارات ءتىلشىسى.

ارنايى توپ قالاداعى بىرنەشە ساۋدا ورتالىقتارىنا بارىپ، قىزمەتكەرلەر مەن كەلۋشىلەرگە ەلوردانىڭ باس سانيتارلىق دارىگەرىنىڭ جاڭا قاۋلىسىنداعى سانيتارلىق نورمالار مەن كارانتين رەجيمىن ساقتاۋ قاجەتتىگىن ءتۇسىندىردى.

«بۇگىن ءبىز جاڭا قاعيدالار بويىنشا ساۋدا-ويىن-ساۋىق ورتالىقتارىنىڭ دايىندىعى مەن قوعامدىق تاماقتانۋ نىساندارىنىڭ جۇمىسىنا مونيتورينگ جۇرگىزەمىز. كەشە نۇر-سۇلتان قالاسىنىڭ باس سانيتارلىق دارىگەرىنىڭ جاڭا قاۋلىسى كۇشىنە ەندى، وندا ساۋدا-ويىن-ساۋىق ورتالىقتارى جۇمىسىنىڭ الگوريتمى ناقتى جازىلعان.

قاۋلىعا سايكەس، ساۋدا ورتالىقتارى بارلىق قاجەتتى سانيتارلىق-ەپيدەميولوگيالىق شارالاردى ساقتاي وتىرىپ، جۇمىس كۇندەرى ساعات 10:00 دەن 22:00 گە دەيىن جۇمىس ىستەي الادى. ال دەمالىس كۇندەرى جۇمىس ىستەمەيدى. ياعني، سەنبى جانە جەكسەنبى كۇندەرى ساۋدا ويىن-ساۋىق ورتالىعىندا ءدارىحانالار، بانكتەردىڭ ەسەپ ايىرىسۋ-كاسسالىق بولىمدەرى جانە سۋپەرماركەتتەرى، گيپەرماركەتتەرى عانا اشىق بولادى. قازىر دە ساۋدا ورتالىقتارىنىڭ بىرىنە كەلدىك، بارلىق ساقتىق شارالارى ساقتالعانىن كورۋگە بولادى. مۇندا اراقاشىق ساقتالىپ، دۇڭگىرشەكتەگى، ءدامحاناداعى ادام سانى %30 دان اسپاۋى كەرەك»، - دەدى نۇر-سۇلتان قالاسى ساۋدا جانە قىزمەت كورسەتۋ سالاسىن دامىتۋ ءبولىمىنىڭ باسشىسى رۋسلان ىدىرىسوۆ مونيتورينگ كەزىندە تىلشىلەرگە بەرگەن سۇحباتىندا.

ايتا كەتەيىك، ساۋدا ورتالىقتارىنداعى كينوتەاترلار تولىق رەجيمدە جۇمىس ىستەپ تۇر.

جاڭا قاۋلى كينوتەاترلار جۇمىسىنا اسەر ەتكەن جوق، ولار كۇن سايىن ساعات 10:00 دەن 24:00 گە دەيىن جۇمىس ىستەيدى جانە زالداعى كورەرمەندەر اراسىندا ەكى ورىن بوس قالىپ، ادام سانى 30 پايىزدان اسپاۋى كەرەك. سونىمەن بىرگە، ساۋدا-ويىن-ساۋىق ورتالىقتارىنداعى قوعامدىق تاماقتانۋ ورىندارى جابىق بولىپ قالا بەرەدى، ولار تەك ۇيگە جەتكىزۋ قىزمەتىمەن اينالىسا الادى.

ويىن-ساۋىق ايماعى، اتكەنشەكتەر مەن باتۋتتار دا جۇمىس ىستەمەيدى. اكىمدىك قىزمەتكەرلەرى ساۋدا ورتالىعى مەن دۇڭگىرشەكتەردى ارالادى جانە بىرنەشە ەسكەرتۋ جاسادى. ماسەلەن، كوفەحانادا كەلۋشىلەر اراسىندا ءبىر ۇستەل بوس تۇرۋى كەرەك جانە 30 پايىزدان ارتىق تولماۋى كەرەك.

كەزەككە تۇرعاندا اراقاشىق ساقتالۋى قاجەت. ەكى ساعات سايىن ىلعالدى تازالاۋ جۇمىستارى ءجۇرىپ، ساتۋشىلار قورعانىس ماسكاسىن اۋىستىرىپ تۇرۋى ءتيىس. ەرەجەگە سايكەس، ساۋدا ورتالىعى ىشىندە كەلۋشىلەر ۇزدىكسىز قوزعالىستا عانا جۇرە الادى جانە دالىزدەگى ادام كوپ توپتاساتىن ورىندىقتاردى دا جابۋ كەرەك.

«مۇندا ايىپپۇل سالۋ ءۇشىن كەلگەن جوقپىز. ول ءبىزدىڭ قۇزىرىمىزعا دا كىرمەيدى. ەرەجە بۇزۋ ماسەلەسىن اۋداندىق مونيتورينگ توپتارى قاراستىرادى. ال ءبىز نىسانداردىڭ جاڭا جاعدايدا جۇمىس ىستەۋگە قانشالىقتى دايىن ەكەنىن كورگىمىز كەلەدى. بۇل ەڭ الدىمەن ءوزىمىز ءۇشىن - ادام دەنساۋلىعى ءۇشىن قاجەت. نۇر-سۇلتان قالاسى «قىزىل ايماققا» ەندى، كوروناۆيرۋس جۇقتىرعاندار كوبەيدى، وسىعان بايلانىستى شەكتەۋلەر قويىلدى.

ەگەر قالاداعى سانيتارلىق-ەپيدەميولوگيالىق جاعداي جاقسارسا، نىساندار بۇرىنعى جۇمىس كەستەسىنە ورالادى. ال ەگەر جاعداي ناشارلاسا، ودان ءارى نە ىستەۋ قاجەتتىگى قارالادى»، - دەدى رۋسلان ىدىرىسوۆ.

ەسكە سالا كەتسەك، 15- قاڭتاردا نۇر-سۇلتان قالاسىنداعى شەكتەۋ جانە كارانتين شارالارى تۋرالى قاۋلى جاڭارتىلدى.