كوروناۆيرۋسپەن كۇرەس: ەلوردادا سىناق ۇ ب ت - عا دايىندىق باستالدى

نۇر-سۇلتان. قازاقپارات - ەلوردا مەكتەپتەرىنىڭ جوعارى سىنىپ وقۋشىلارى تاپسىراتىن سىناق ۇلتتىق ءبىرىڭعاي تەستىلەۋگە وراي كوروناۆيرۋستىڭ الدىن الۋ الگوريتمى بەكىتىلدى، دەپ حابارلايدى قازاقپارات ءتىلشىسى.

ناقتى ايتقاندا، نۇر-سۇلتان قالاسىنىڭ باس مەملەكەتتىك سانيتار دارىگەرى سارحات بەيسەنوۆانىڭ جاڭا قاۋلىسىنا سايكەس، ق ر ب ع م جوعارى جانە جوعارى وقۋ ورنىنان كەيىنگى ءبىلىم دەپارتامەنتى 2021-جىلعى 20- قاڭتار مەن 5- اقپان ارالىعىندا «ل. گۋميليەۆ اتىنداعى ەۋرازيا ۇلتتىق ۋنيۆەرسيتەتى» ك ە ا ق، «س. سەيفۋللين اتىنداعى قازاق اگروتەحنيكالىق ۋنيۆەرسيتەتى» ك ە ا ق، «قازاق ەكونوميكا، قارجى جانە حالىقارالىق ساۋدا ۋنيۆەرسيتەتى» مەكەمەسى نەگىزىندە كۇشەيتىلگەن سانيتارلىق-ەپيدەمياعا قارسى، سانيتاريا-پروفيلاكتيكا ءىس-شارالارىن ساقتاي وتىرىپ، سىناقتىق ۇلتتىق ءبىرىڭعاي تەستىلەۋدى وتكىزۋدى قامتاماسىز ەتەدى.

ال نۇر-سۇلتان قالاسىنىڭ قوعامدىق دەنساۋلىق ساقتاۋ باسقارماسى سىناقتىق تەستىلەۋ وتكىزۋ كۇندەرى عيماراتقا كىرە بەرىستە جەدەل جاردەم بريگادالارىنىڭ كەزەكشىلىگىن قامتاماسىز ەتۋگە مىندەتتى.

«ل. گۋميليەۆ اتىنداعى ەۋرازيا ۇلتتىق ۋنيۆەرسيتەتى، س. سەيفۋللين اتىنداعى قازاق اگروتەحنيكالىق ۋنيۆەرسيتەتى، قازاق ەكونوميكا، قارجى جانە حالىقارالىق ساۋدا ۋنيۆەرسيتەتى رەكتورلارى سىناقتىق تەستىلەۋ باستالعانعا دەيىن نۇر-سۇلتان قالاسىنىڭ سانيتار-ەپيدەميولوگيالىق باقىلاۋ دەپارتامەنتىنىڭ اۋداندىق باسقارمالارىمەن تەستىلەۋ پۋنكتتەرىنىڭ دايىندىعىن باعالاۋدى قامتاماسىز ەتۋى ءتيىس. قاۋلىنىڭ تولىق ماتىنىمەن مىنا سىلتەمە ارقىلى تانىسۋعا بولادى.