پرەزيدەنت مەملەكەتتىك قىزمەتشىلەردى قىسقارتۋ ۇدەرىسىنىڭ اشىقتىعىن قامتاماسىز ەتۋدى تاپسىردى

نۇر-سۇلتان. قازاقپارات - قازاقستان پرەزيدەنتى مەملەكەتتىك قىزمەت ىستەرى اگەنتتىگىنىڭ ءتوراعاسى انار جايىلعانوۆانى قابىلدادى، دەپ حابارلايدى قازاقپارات اقورداعا سىلتەمە جاساپ.

كەزدەسۋدە مەملەكەت باسشىسىنا اگەنتتىكتىڭ 2020-جىلى اتقارعان جۇمىستارىنىڭ نەگىزگى قورىتىندىلارى تۋرالى ەگجەي-تەگجەيلى ەسەپ بەرىلدى.

انار جايىلعانوۆا ۆەدومستۆونىڭ مەملەكەتتىك قىزمەتكە ورنالاسۋ راسىمدەرىن جەتىلدىرۋگە، ساياسي قىزمەتتى كاسىبيلەندىرۋگە، قىزمەتكەرلەردى ىنتالاندىرۋعا جانە دامىتۋعا، پرەزيدەنتتىك جاستار كادرلىق رەزەرۆى بويىنشا جۇرگىزىلەتىن جۇمىستارعا، سونداي-اق، مەملەكەتتىك قىزمەتتىڭ ۇيىمداستىرۋ مادەنيەتىن وزگەرتۋگە قاتىستى اتقارعان جۇمىستارىنىڭ ناتيجەلەرى جونىندە ايتتى.

سونىمەن قاتار قاسىم-جومارت توقايەۆقا مەملەكەتتىك قىزمەتتى سيفرلاندىرۋ، ونىڭ ىشىندە، «ە- قىزمەت» جۇيەسىنىڭ ينتەگراتسيا اياسىن كەڭەيتۋ جانە «y -Qyzmet» جۇيەسىن ازىرلەۋ بارىسى تۋرالى باياندالدى.

قازاقستان پرەزيدەنتىنە ۆەدومستۆو جۇمىسىن قايتا ۇيىمداستىرۋ جايىندا مالىمەت بەرىلدى. انار جايىلعانوۆانىڭ ايتۋىنشا، بىلتىر اگەنتتىكتىڭ شتاتى 10 پايىزعا قىسقارعان، ال بيىلعى اقپان ايىنىڭ سوڭىنا دەيىن تاعى دا 15 پايىزعا وڭتايلاندىرىلماق. قاسىم-جومارت توقايەۆ مەملەكەتتىك قىزمەتتى جەتىلدىرە ءتۇسۋ قاجەتتىگى تۋرالى اتاپ ءوتىپ، اگەنتتىك ءتوراعاسىنا ورتالىق جانە جەرگىلىكتى دەڭگەيدەگى مەملەكەتتىك قىزمەتشىلەردى قىسقارتۋ ۇدەرىسىنىڭ اشىقتىعى مەن تيىمدىلىگىن باقىلاۋدى قامتاماسىز ەتۋدى تاپسىردى.

سونىمەن قاتار پرەزيدەنت مەملەكەتتىك باسقارۋ تۇجىرىمداماسىن ازىرلەۋ جانە جۇزەگە اسىرۋ اياسىندا ۆەدومستۆونىڭ جۇمىسىن جانداندىرۋعا نۇسقاۋ بەردى.