التاي كولگىنوۆ ەلورداداعى كوروناۆيرۋسقا قاتىستى احۋالدى ايتتى

نۇر-سۇلتان. قازاقپارات - بۇگىن ۇكىمەت وتىرىسىندا نۇر-سۇلتان قالاسىنىڭ اكىمى التاي كولگىنوۆ ەلورداداعى كوروناۆيرۋسقا قاتىستى احۋال تۋرالى ەسەپ بەردى، دەپ حابارلايدى قازاقپارات ءتىلشىسى.

«16-قاڭتاردان باستاپ قالا «قىزىل» ايماققا كىردى. رەپرودۋكتيۆتىلىك يندەكسى قازىر 1.279-دى قۇراپ وتىر. وسىعان وراي كەلەسى شارالار قابىلداندى.

بىرىنشىدەن، ينفەكسيالىق ستاتسيونارلاردا 720 ورىن ازىرلەندى. ونداعى جۇكتەمە 47 پايىزدى نەمەسە 335 توسەك- ورىندى قۇرايدى. 121 رەانيماتسيالىق توسەك- ورىن دايىندالعان. وندا 27 ناۋقاس ەم الۋدا. 500 كارانتيندىك ورىن اشىلدى. وندا پ ت ر انىقتاماسى جوق حالىقارالىق اۋە رەيستەرىنىڭ جولاۋشىلارى ورنالاستىرىلادى. 6-قازاننان باستاپ 8800 دەن استام جولاۋشى كارانتيندىك ستاتسيونارعا ورنالاستىرىلدى. بارلىعى 62 وڭ ناتيجە انىقتالدى»، - دەدى ول.

ەكىنشىدەن، قالا باسشىسىنىڭ ايتۋىنشا، زەرتحانالار سانى 23 كە دەيىن كوبەيتىلدى. ولاردىڭ جالپى قۋاتتىلىعى تاۋلىگىنە 12 مىڭنان استام زەرتتەۋ جۇرگىزۋگە مۇمكىندىك بەرەدى. بۇعان قوسا، كوپبەيىندى اۋرۋحانالاردىڭ قابىلداۋ بولىمدەرىنە، ستاتسيونارلاردىڭ اكۋشەرلىك بلوكتارىندا ناتيجەسى 1,5-2 ساعاتتىڭ ىشىندە دايىن بولاتىن يزوتەرميالىق شاعىن زەرحانالار اشىلدى. تەستىلەۋ سانى ەداۋىر كوبەيتىلدى. 99 مىڭعا دەيىن ارتتى. قىركۇيەكتە 56 مىڭ بولعان. تيىسىنشە ىندەتتىڭ انىقتالۋى شامامەن 9 ەسەگە كوبەيدى. اقپاراتتاردى كەشەندى جەتكىزۋدىڭ ناتيجەسىندە تۇرعىندار ءوز ەرىكتەرىمەن ءجيى تەستىلەۋگە جۇگىنەتىن بولدى.

«ۇشىنشىدەن، امبۋلاتوريالىق- زەرتحانالىق قىزمەت جۇمىسى كۇشەيتىلدى. ۇيگە بارىپ، شاقىرتۋلارعا قىزمەت كورسەتۋ ءۇشىن 5 مىڭ حالىققا 1 بريگادا ەسەبىمەن موبيلدى بريگادالاردىڭ جۇمىسى ۇيىمداستىرىلدى. قالا بويىنشا 207 موبيلدىك بريگادا جۇمىس ىستەۋدە. پاتسيەنتتەردىڭ اعىمىن ءتيىمدى ءبولۋ ءۇشىن احۋالدىق ورتالىق جۇمىس ىستەپ جاتىر»، - دەدى ەلوردا اكىمى.

ءتورتىنشى، التاي كولگىنوۆ قۇقىق قورعاۋ ورگاندارىمەن شەكتەۋ شارالارىن ساقتاۋ بويىنشا مونيتورينگ جالعاسىپ جاتقانىن ايتتى. 9 موبيلدى توپ جۇمىس ىستەۋدە. وسى ۋاقىتقا دەيىن 9 مىڭنان استام نىسان مونيتورينگپەن قامتىلدى. كارانتين رەجيمىن جۇيەلى تۇردە بۇزۋشىلارمەن جۇمىس كۇشەيتىلدى. اكىمشىلىك جاۋاپكەرىلىككە 1,5 مىڭعا جۋىق جەكە جانە زاڭدى تۇلعالار تارتىلىپ، جالپى سوماسى 300 ميلليون تەڭگە ايىپپۇل سالىندى.

«بەسىنشى، ستاتسيونارلار مەديتسينالىق قۇرالدارمەن جانە قاجەتتى ءدارى- دارمەكپەن تولىقتاي قامتىلعان. قالاداعى ەپيدەميولوگيالق جاعدايدى ەسكەرە وتىرىپ، ءبىرقاتار شەكتەۋ مەن كارانتيندىك شارالار قابىلداندى. ولار دۇيسەنبىدەن باستاپ كۇشىنە ەندى»، - دەدى نۇر-سۇلتان قالاسىنىڭ باسشىسى.

اۆتور: مارلان جيەمباي