قازاقتىڭ «تاقيالى پەرىشتەسى» ومىردەن وزدى

تالدىقورعان. قازاقپارات - قالىڭ كوپشىلىككە «تايلاق» ەسىمىمەن تانىلعان «تاقيالى پەرىشتە» فيلمىنىڭ باس كەيىپكەرى ومىردەن وزدى، - دەپ حابارلايدى قازاقپارات ءتىلشىسى.

ءيىسى قازاق ءسۇيسىنىپ كورەتىن «تاقيالى پەرىشتە» فيلمىنىڭ باس كەيىپكەرى، اتى اڭىزعا اينالعان اكتەر، قازاقستان رەسپۋبليكاسىنىڭ مادەنيەت قايراتكەرى، الماتى وبلىسىنىڭ قۇرمەتتى ازاماتى ءالىمعازى رايىمبەكوۆ ومىردەن وزدى.

ءالىمعازى سۇماعۇل ۇلى 1936 -جىلى 1-جەلتوقساندا الماتى وبلىسىندا دۇنيەگە كەلگەن. العاشقى ەڭبەك جولىن اۋىلدا جۇرگىزۋشى بولىپ باستاعان. 1965 -جىلى العاشقى «ءان قاناتىندا» فيلمىنىڭ سپورتتىق ءىس- شارالارىنا شاقىرتۋ الادى. 1966 -جىلى «قيلى كەزەڭ» فيلمىنە تۇسەدى.

1968 -جىلى قازاق كينوسىنىڭ التىن قورىنان ويىپ تۇرىپ ورىن العان «تاقيالى پەرىشتە» (رەجيسسەرى شاكەن ايمانوۆ) كينوفيلمىندەگى تايلاقتىڭ ءرولىن سومدايدى. وسى كەزدەن باستاپ جۇرتشىلىققا كەڭىنەن تانىلادى.

بۇدان بولەك، «كوگىلدىر تاكسي»، «قان مەن تەر» سەكىلدى وننان اسا كينوفيلمگە تۇسكەن. بىرنەشە مەرەكەلىك مەدال مەن قۇرمەت گراموتالارىن العان. الماتى وبلىسى كوكسۋ اۋدانىنىڭ دا قۇرمەتتى ازاماتى. ءالىمعازى رايىمبەكوۆ ءومىرىنىڭ سوڭىنا دەيىن قوعامدىق جۇمىستارعا بەلسەنە ارالاسىپ، جاس ۇرپاقتى تاربيەلەۋگە ۇلكەن ۇلەس قوستى. كەز كەلگەن ءىس- شارالاردا اق باتاسىن بەرىپ، ەل اماندىعىن تىلەپ جۇرەتىن، نەمەرە- شوبەرەلەرىنە ۇلگىلى ازامات ەدى.