اسقار مامين كوروناۆيرۋسقا قارسى دارىلەردىڭ قورىنا ريەۆيزيا جۇرگىزۋدى تاپسىردى

نۇر- سۇلتان. قازاقپارات – ق ر پرەمەر- ءمينيسترى اسقار مامين ينفەكسيالىق اۋرۋحانالار مەن باستاپقى مەديتسينالىق- سانيتاريالىق كومەك ۇيىمدارىنداعى جەكە قورعانىش قۇرالدارى مەن كوروناۆيرۋسقا قارسى دارىلەردىڭ قورىنا ريەۆيزيا جۇرگىزۋدى تاپسىردى، دەپ حابارلايدى قازاقپارات ءتىلشىسى.

«ەپيدەميولوگيالىق جاعدايدى ەسكەرىپ، وڭىرلەردەگى جاعدايدى تۇراقتاندىرۋ ءۇشىن شۇعىل شارالار قابىلداۋ قاجەت. وسىعان بايلانىستى مىناداي تاپسىرما بەرەمىن. ءبىرىنشى. دەنساۋلىق ساقتاۋ مينيسترلىگى اكىمدىكتەرمەن بىرگە مەديتسينا ۇيىمدارىنىڭ 1-اقپاننان باستاپ حالىقتى جاپپاي ۆاكسينالاۋدى باستاۋعا دايىن بولۋىن قامتاماسىز ەتسىن. ەگۋ پۋنكتتەرىندە ۆاكسينانى ساقتاۋعا ارنالعان قاجەتتى جابدىق بولۋى ءتيىس. سونىمەن بىرگە مەديتسينا قىزمەتكەرلەرىن وقىتۋ قاجەت. ءبىر اپتا مەرزىمدە ەگۋ پۋنكتتەرىنىڭ ازىرلىگىن جانە ۆاكسينامەن تۇراقتى قامتاماسىز ەتۋ ماسەلەلەرىن شەشۋدى تاپسىرامىن»، - دەدى اسقار مامين ۇكىمەت وتىرىسىندا.

ەكىنشىدەن، ۇكىمەت باسشىسى وڭىرلەردىڭ اكىمدەرىنە ەپيدەميولوگيالىق جاعداي ناشارلايتىن بولسا، شەكتەۋ شارالارىن قابىلداۋدى، حالىق پەن بيزنەس سۋبەكتىلەرىنىڭ بەلگىلەنگەن سانيتاريالىق نورمالارىن قاتاڭ ساقتاۋىن قامتاماسىز ەتۋدى تاپسىردى.

«سونىمەن قاتار ءبىر اپتا مەرزىمدە ينفەكسيالىق اۋرۋحانالار مەن باستاپقى مەديسينالىق- سانيتاريالىق كومەك ۇيىمدارىنداعى جەكە قورعانىش قۇرالدارى مەن كوروناۆيرۋسقا قارسى دارىلەردىڭ قورىنا ريەۆيزيا جۇرگىزسىن. ءۇشىنشى. ىشكى ىستەر مينيسترلىگى اكىمدىكتەرمەن بىرگە مونيتورينگ توپتارىنىڭ جۇمىسىن كۇشەيتسىن. اقپارات مينيسترلىگىمەن بىرگە ءتۇسىندىرۋ جۇمىستارىن كۇشەيتۋ قاجەت. وڭىرلەردە باقىلاۋ مەن سانيتاريالىق- ەپيدەميولوگيالىق نورمالاردىڭ قاتاڭ ساقتالۋى قامتاماسىز ەتىلسىن. ەرالى لۇقپان ۇلى، جالپى باقىلاۋ سىزدە»، - دەدى اسقار مامين ورىنباسارى ەرالى توعجانوۆقا قاراتا.