پرەمەر- مينيستر ۇكىمەتتىڭ ناقتى مىندەتتەرىن اتادى

نۇر- سۇلتان. قازاقپارات - جاڭا جاساقتالعان ۇكىمەت الەۋمەتتىك- ەكونوميكالىق دامۋدىڭ نەگىزگى باعىتتارىنا باسا نازار اۋدارۋ كەرەك.

بۇل تۋرالى ق ر پرەمەر- مينيستر اسقار مامين ايتتى، دەپ حابارلايدى قازاقپارات ءتىلشىسى.

«بۇگىن جاڭارتىلعان ۇكىمەتتىڭ العاشقى وتىرىسى. پارلامەنت ءاربىر ۇكىمەت مۇشەسىن ماقۇلدادى. مەملەكەت باسشىسى قاسىم- جومارت توقايەۆ ءتيىستى جارلىقتارعا قول قويدى. بۇل - ەلباسى نۇرسۇلتان نازاربايەۆتىڭ، مەملەكەت باسشىسى جانە پارلامەنتتىڭ جوعارى سەنىم ءبىلدىرۋى. ءبىز ونى ۇلكەن جاۋاپكەرشىلىكپەن اقتاپ، «Nur Otan» پارتياسىنىڭ «وزگەرىستەر جولى. ءار ازاماتقا لايىقتى ءومىر» اتتى سايلاۋالدى باعدارلاماسىن جانە ءبىزدىڭ الدىمىزعا قويعان بارلىق مىندەتتەردى ساپالى ورىنداۋىمىز كەرەك»، - دەدى ۇكىمەت وتىرىسىن اشقان اسقار مامين.

پرەمەر- مينيستر ەكونوميكانى قارقىندى دامىتۋ ارقىلى حالىقتىڭ ءومىر ءسۇرۋ ساپاسىن، ءال- اۋقاتىن جاقسارتۋعا جانە تابىسىن ارتتىرۋعا، سونىمەن قاتار جاڭا جۇمىس ورىندارىن قۇرۋعا جاعداي جاسالاتىندىعىن باسا ايتتى.

«سونىمەن بىرگە الەۋمەتتىك- ەكونوميكالىق دامۋدىڭ نەگىزگى باعىتتارىنا باسا نازار اۋدارۋ كەرەك. ەكونوميكانىڭ باسەكەگە قابىلەتتىلىگىن ارتتىرۋعا، ينۆەستيتسيالار تارتۋعا، جاڭا تەحنولوگيالار جانە ەكسپورتتى دامىتۋعا باعىتتالعان ناقتى شارالاردى جۇزەگە اسىرۋ قاجەت. وسىعان وراي ەلىمىزدىڭ ودان ارى الەۋمەتتىك- ەكونوميكالىق دامۋ جولىندا بارلىق كۇش- جىگەرىمىزدى سالىپ، ناقتى ناتيجەلى، ساپالى ءارى ءتيىمدى جۇمىس اتقارۋىمىز كەرەك»، - دەدى ۇكىمەت باسشىسى.