قىرعىزستان ءمينيسترى پاۆلودارلىق پوليتسەيلەرگە العىس جولدادى
بۇل تۋرالى ق ر ىشكى ىستەر مينيسترلىگىنىڭ رەسمي وكىلى نۇردىلدا وراز ايتىپ بەردى، دەپ حابارلايدى قازاقپارات ءتىلشىسى.
«حاتتا جۇك كولىگىن تىزگىندەگەن قىرعىز رەسپۋبليكاسى ازاماتىنىڭ قاتتى ايازدا شىدەرتى كەنتىنىڭ ماڭىنداعى تاس جولدا تۇرىپ قالعانى، وعان پوليتسەيلەردىڭ كومەككە كەلگەنى ايتىلعان.
«پوليتسيا پودپولكوۆنيگى جاقسىلىق بايىسبەكوۆ، اعا لەيتەنانتتار ازامات شاقشابايەۆ پەن رۋسلان ۆەرەشاكتىڭ ادامگەرشىلىگى مەن قىزمەتىنىنە دەگەن ادالدىعى ادام ءومىرىن قۇتقارۋعا سەبەپ بولدى. ولار وزدەرىنە جۇكتەلگەن مىندەتتەردى ابىرويمەن اتقاردى» دەپ اتاپ وتكەن»، - دەيدى نۇردىلدا وراز مينيسترلىكتە وتكەن ونلاين بريفينگىدە.
وقيعانى قىسقاشا بايانداپ وتسەك، قازگيدرومەت ورتالىعىنىڭ 43- گرادۋسقا دەيىنگى قاتتى اياز بولاتىنى تۋرالى ەسكەرتۋگە قاراماستان، جۇرگىزۋشى رەسەي فەدەراتسياسىنان قىرعىزستان رەسپۋبليكاسىنا جۇك اۆتوموبيلىمەن جولعا شىققان. ءبىراق اۋا رايىنىڭ قولايسىزدىعىنان ماشيناداعى جانارماي قاتىپ قالعان.
«وسىنداي قيىن جاعدايدا جۇرگىزۋشىنى قاتتى ۇسىك شالۋى مۇمكىن ەدى. الايدا، جول بويىندا تۇرعان جۇك كولىگىن سول جەردە قىزمەت اتقارىپ جۇرگەن پوليتسەيلەر بايقاپ، بىردەن كومەككە كەلگەن. ولار ۇلكەن جۇكتى جىلى بوكسقا اپارىپ، جۇرگىزۋشىگە جىلىنۋعا كومەكتەسكەن. كولىك اقاۋى جوندەلگەن سوڭ جۇرگىزۋشى قايتا جولعا اتتانعان»، - دەيدى رەسمي وكىل.
جىل باسىنان بەرى اۋا رايىنىڭ قولايسىزدىعىنان اۆتوموبيل جولدارىنداعى كولىك قۇرالدارى قوزعالىسىنىنا 100 دەن استام شەكتەۋ قويىلدى.
اتاپ ايتقاندا، اقمولا، قاراعاندى، شىعىس قازاقستان، قوستاناي، پاۆلودار جانە الماتى وبلىستارىندا كولىك قوزعالىسىنا شەكتەۋ ەنگىزىلدى. شەكتەۋ كەزىندە جول بەلگىلەرى مەن قورشاۋلار قويىلدى. قولايسىز اۋا رايى جاعدايلارىندا جول قاۋىپسىزدىگىن قامتاماسىز ەتۋ، قيىن جاعدايعا تاپ بولعان ادامدارعا كومەك كورسەتۋ ءۇشىن پاترۋلدىك پوليتسيا جاساقتارى كەزەكشىلىك ەتتى. وسى كەزەڭدە قار قۇرساۋىنان 50 گە جۋىق اۆتوكولىك شىعارىلعان.
«ءى ءى م قىس مەزگىلىندە اۋا- رايىنىڭ قوزعالىس رەجيمدەرىنە اسەر ەتەتىنىن، جاۋىن- شاشىن كەزىندە زاتتاردىڭ كورىنۋى ناشارلايتىنىن ەسكەرۋ كەرەكتىگىن ەسكە سالادى. جۇرگىزۋشىلەر اۋا- رايى جاعدايلارىن ەسكەرىپ، ءقاۋىپسىز جىلدامدىقتى جانە اۆتوموبيلدەر اراسىنداعى قاشىقتىقتى ساقتاۋ قاجەت»، - دەيدى ن. وراز.
اۆتور: ايجان سەرىكجان قىزى