تۋنيستىڭ بىرنەشە وڭىرىنە جاپپاي تارتىپسىزدىكپەن كۇرەسۋ ءۇشىن اسكەر جىبەرىلدى

تۋنيس. قازاقپارات - تۋنيس بيلىگى ۇلتتىق اسكەر بولىمشەلەرىن جەكسەنبى كۇنى كەشكە ەلدىڭ بىرنەشە پروۆينسيالارىنا مەملەكەتتىك مەكەمەلەردى قورعاۋ جانە تارتىپسىزدىكپەن كۇرەسۋ ءۇشىن جىبەردى.

بۇل تۋرالى Mosaique fm راديوستانسياسىنا بەرگەن سۇحباتىندا تۋنيس رەسپۋبليكاسى قورعانىس مينيسترلىگىنىڭ رەسمي وكىلى موحامەد زەكري مالىمدەدى، دەپ حابارلايدى قازاقپارات.

«قازىرگى ۋاقىتتا اسكەر بولىمشەلەرى سيليانا، كاسسەرين، بيزەرت جانە سۋس پروۆينتسيالارىندا قوعامدىق ءتارتىپتى كۇزەتەدى»، - دەپ اتاپ ءوتتى قورعانىس مينيسترلىگىنىڭ وكىلى.

جەكسەنبىدە 16:00 دە كومەندانتتىق ساعات باستالعاننان كەيىن تۋنيستىڭ كەيبىر پروۆينتسيالارىندا تارتىپسىزدىك قايتا باستالعان. كۇن سايىن تۋنيستە تارتىپكە باعىنباۋ ارەكەتتەرى ورىن الۋدا. نارازىلىققا قاتىسۋشىلار بارريكادالار تۇرعىزىپ، اۆتوكولىك دوڭگەلەكتەرىن ورتەپ، جولداردى جاۋىپ، بيلىككە قارسى ۇراندار ايتىپ، ءوز ارەكەتتەرىن اشتىق توڭكەرىس دەپ اتاۋدا. سونىمەن قاتار، قاۋىپسىزدىك قىزمەتكەرلەرىنىڭ ايتۋىنشا، جاسى 25 تەن اسپايتىن جاستار توبى دۇكەندەردىڭ تەرەزەلەرىن، كوشەدە تۇرعان كولىكتەردى قيراتقان، سونداي- اق مەملەكەتتىك مەكەمەلەر مەن قارجى ۇيىمدارىن توناعان. سەنبىدەن جەكسەنبىگە قاراعان ءتۇنى رەسپۋبليكانىڭ ءارتۇرلى ايماقتارىندا بولعان تارتىپسىزدىكتەرگە قاتىسقانى ءۇشىن قۇقىق قورعاۋ ورگاندارى 242 ادامدى قاماۋعا الدى.