قىزىلوردالىق وقۋشى قالا كوشەسىن جارىقتاندىرۋدىڭ ءتيىمدى ءتاسىلىن تاپتى

None
None
قىزىلوردا. قازاقپارات - قىزىلوردالىق وقۋشى قالا كوشەلەرىن جارىقتاندىرۋدىڭ ءتيىمدى ءادىسىن ويلاپ تاپتى، دەپ حابارلايدى قازاقپارات ءتىلشىسى.

جاس ونەرتاپقىش مەرەي سەمباي قىزىلوردا قالاسىنداعى نازاربايەۆ زياتكەرلىك مەكتەبىندە ءتالىم الادى. جاڭاشىل جوبالارعا جانى قۇمار ورەن ۇستازى جەڭىسبەك جالمۇرزايەۆپەن بىرگە كولىكتەردىڭ قوزعالىسى ارقىلى ەلەكتر قۋاتىن وندىرۋگە بولاتىنىن عىلىمي نەگىزدە دالەلدەپ شىقتى. كوشەدە ۇزدىكسىز اعىلعان كولىكتەردى كورگەن سايىن مەرەي «ولاردىڭ جىلدام قوزعالىسى ارقىلى قانداي پايدالى دۇنيە جاساۋعا بولادى» دەگەن ويعا كەلگەن ەكەن. ارادا ءبىراز ۋاقىت وتكەن سوڭ جەتەكشىسى جەڭىسبەك جالمىرزايەۆپەن وسى تاقىرىپتا وي ءبولىسىپ، جوبا جايلى تالقىلاعان. زەرتتەي كەلە اۆتوكولىك قوزعالىسىنداعى شىعىن ەنەرگياسىنان ەلەكتر ەنەرگياسىن ءوندىرىپ، بالامالى قۋات كوزىنە اينالدىرۋ تۋرالى يدەيا تۋىنداعان.

«الدىمەن جۇرگەن كولىكتەردەن ەنەرگيا ءوندىرۋدىڭ شاعىن ماكەتى جاسالدى. ءوندىرۋ مەحانيزمى بىرنەشە بولشەكتەن تۇرادى. ول كولىكتەر كوپ شوعىرلانعان ايماق كوشەلەرىندەگى جەر استىندا ورنالاسادى. ولار جىلدامدىق باسەڭدەتكىش تومپەشىكتەرگە ۇقساس بولادى. اتالمىش پلاتفورمادان كولىك وتكەن سايىن قۇرىلعى تومەنگە ءتۇسىپ، قايتا ورنىنا كەلۋ ارقىلى ەنەرگيا وندىرەدى»، - دەيدى جاس ونەرتاپقىش.

مەحانيزم قۇرىلىسىن سيپاتتاۋ جانە قاجەتتى ەسەپتەۋلەر جۇرگىزۋ ءۇشىن جوبا اۆتورلارى قىزىلوردا جىلۋ ەلەكتر تورابىنىڭ قىزمەتكەرلەرىنەن كاسىبي كەڭەس الدى. سول جەردەگى گەنەراتورلاردىڭ جۇمىسىن قاداعالاپ، ونىڭ پارامەترلەرى مەن قۇرىلعىلار ولشەمدەرى جايلى اقپارات جيناقتادى.

«بۇل - ەلەكتر ەنەرگياسىن ادام دەنساۋلىعىنا، قورشاعان ورتاعا زالالسىز تۇردە الۋدىڭ ءتيىمدى ءارى قاراپايىم جولى. قۇرىلىسى قاراپايىم، سوندىقتان قوماقتى قارجىنى قاجەت ەتپەيدى. دەگەنمەن بەلگىلى اۋماقتى جىلدار بويى ەشقانداي شىعىنسىز جارىقپەن قامتاماسىز ەتە الادى. ماسەلەن، ءبىزدىڭ قالادا 20 دان استام جىلدامدىق باسەڭدەتكىش تومپەشىك بار. سولاردىڭ ورنىن وسىنداي 10 كونسترۋكتسيامەن الماستىرساق، ءۇش جىل جىلدىڭ ىشىندە قوماقتى قارجىنى ۇنەمدەي الامىز»، - دەيدى جوبا جەتەكشىسى جەڭىسبەك جالمۇرزايەۆ.

قىزىلوردالىق ونەرتاپقىشتار بۇل ەكونوميكالىق، ەكولوگيالىق جانە ەنەرگەتيكالىق تۇرعىدا ءتيىمدى سانالاتىن جوبانىڭ ازىرگە وتاندىق تاجىريبەدە بالاماسى جوق دەيدى. سوندىقتان الداعى ۋاقىتتا تىڭ تەحنولوگيانى پاتەنتتەپ الىپ، وندىرىسكە قوسۋدى ماقسات ەتىپ وتىر. ەستەرىڭىزگە سالا كەتەلىك، قىزىلوردالىق جاس ونەرتاپقىشتار «اقىلدى» جىلىجاي دا قۇراستىرعان بولاتىن.

سوڭعى جاڭالىقتار