موڭعول انشىلەرى قازاقتىڭ تانىمال ءانىن ورىندادى - شەتەلدەگى قازاق ءتىلدى ب ا ق- قا شولۋ

None
None
نۇر-سۇلتان. قازاقپارات- «قازاقپارات» ح ا ا شەت مەملەكەتتەردە قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

التايلىق قار-شاڭعى الاڭى وقۋشىلارعا اقىسىز شاڭعى تەبۋدى ۇسىندى - «اعاجاي- التاي» سايتى

قىتايدىڭ التاي قالاسى مۇز جانە قار سپورتى تۇرلەرىنە بەلسەندى قاتىسۋعا دايارلاۋ ءۇشىن بالالارعا كوبىرەك مۇمكىندىك بەرۋدە. قىس باستالعالى بەرى التاي قالاسى «گەنارال تاۋى» قار-شاڭعى الاڭىن ورتا مەكتەپ وقۋشىلارىنا اقىسىز جانە جەڭىلدەتىلگەن تۇردە پايدالانۋعا مۇمكىندىك بەرۋدە، دەپ حابارلايدى قىتايدىڭ kazakh.altxw.com اقپاراتتىق پورتالى.

اتالعان اقپارات كوزىنىڭ دەرەگىنە سۇيەنسەك، 2021-جىلدىڭ قىسىندا التاي قالاسى وقۋشىلاردى تاۋدا شاڭعى تەۋىپ ۇيرەنۋگە ىنتالاندىرۋدا.

«گەنارال تاۋى» دەپ اتالاتىن قار-شاڭعى الاڭى بيىلعى قىس ماۋسىمىندا تۋريستەر ءۇشىن ارنايى ەسىگىن اشقان. سونىمەن بىرگە 18 جاسقا دەيىنگى مەكتەپ وقۋشىلارىنىڭ شاڭعى تەبۋىنە بارىنشا جەڭىلدىكتەر جاساعان.

ايتا كەتۋ كەرەك، وقۋشىلار اقىسىز شاڭعى تەبۋ ءۇشىن جەكە كۋالىگىن نەمەسە وقۋشى بيلەتىن الا كەلسە جەتكىلىكتى. مەكتەپ تۇلەكتەرى شاڭعىلاردى جالعا العاندا باعانىڭ جارتىسىن تولەيدى. ال قار-شاڭعى الاڭىنا كىرۋ تەگىن. التاي قالالىق «گەنارال تاۋى» قار- شاڭعى الاڭىنىڭ قىزمەتكەرى چەن يان بۇل شارانىڭ نەگىزگى ماقساتى بەيجىڭدەگى قىسقى وليمپيادا ويىندارىن قارسى الۋعا مەملەكەت ىشىندەگى دايىندىق ەكەنىن ايتتى.

«بەيجىڭدەگى قىسقى وليمپيادا ويىندارىن قارسى الۋدا جاقسى اتموسفەرا قۇرۋ ءۇشىن كەلەسى كەزەكتە كوللەدج ستۋدەنتتەرى مەن باسقا دا توپتارعا ارنالعان ءبىرقاتار جەڭىلدىكتەردى باستايمىز»، - دەيدى چەن يان.

«ءو ز ا» ۇجىمى «جىل ادامى» اتانعان قانداسىمىزدى تۋعان كۇنىمەن قۇتتىقتادى - «ءو ز ا» اقپارات اگەنتتىگى

وسى اپتادا «ءو ز ا» اقپارات اگەنتتىگىندە وزبەكستان رەسپۋبليكاسىنىڭ «وليي ماجليس» زاڭ شىعارۋشى پالاتاسىنىڭ دەپۋتاتى راسۋل كوشەربايەۆتى تۋعان كۇنىمەن قۇتتىقتاعان اقپارات جارىق كوردى.

وزبەكستاننىڭ «وليي ماجليس» دەپۋتاتى راسۋل كوشەربايەۆ 1987-جىل 12- قاڭتاردا تاشكەنت وبلىسىنىڭ «قوساعاش» اۋىلىنداعى قازاق وتباسىندا دۇنيەگە كەلگەن.

«ءو ز ا» دەرەگىنە سۇيەنسەك، ول 2010-جىلى وزبەكستان مەملەكەتتىك الەم تىلدەرى ۋنيۆەرسيتەتىن «حالىقارالىق جۋرناليستيكا» ماماندىعى بويىنشا ءتامامداعان. تاشكەنت مەملەكەتتىك زاڭ ۋنيۆەرسيتەتىنىڭ ماگيسترانتى.

«بۇگىنگى تاڭدا راسۋل كوشەربايەۆتىڭ قوعامداعى وزەكتى پروبلەمالاردى كوتەرۋدەگى بەلسەندىلىگى، حالىقتى ۇزاق جىلداردان بەرى مازالاعان قيىن ماسەلەلەردى وڭتايلى شەشىم تابۋىنا باتىل قادام تاستاعان ارەكەتى كوپشىلىكتىڭ كوكەيىندە ونى «قاھارمان» وبرازىندا بەينەلەگەن.

جىل سايىن ۇيىمداستىرىپ كەلە جاتقان تاۋەلسىز ساۋالناماعا وراي راسۋل كوشەربايەۆ 2020-جىلى وزبەكستاندا «جىل ادامى» اتاندى. ال 2019-جىلى «جىل دەپۋتاتى» اتانعان بولاتىن. راسۋل قىدىرالى ۇلىن بۇگىنگى مەرەيلى تۋعان كۇنىمەن «ءو ز ا» ۇجىمى شىن جۇرەكتەن قۇتتىقتاپ، الداعى جۇمىستارىنا ساتتىلىك تىلەيدى»، - دەپ جازادى وزبەكستاندىق ب ا ق.

موڭعول انشىلەرى «التايدىڭ ار جاعىنان كەلگەن ارۋ» ءانىن ورىندادى - Kaznews

موڭعوليالىق ەرلى-زايىپتى انشىلەر ا. انحبايار مەن ب. چانتسالدۋلام قازاقستاندىق سازگەر-اقىن راحىم تىنىشباي ۇلىنىڭ «التايدىڭ ار جاعىنان كەلگەن ارۋ» ايگىلى ءانىن ورىنداپ، الەۋمەتتىك جەلىدە حيت بولۋدا، دەپ حابارلايدى Kaznews پورتالى.

اقپارات اگەنتتىگىنىڭ ءتىلشىسى وسى اپتادا قوس انشىمەن بايلانىس ورناتىپ، اڭگىمەگە تارتقان.

«بۇل ءاندى قازاقشا ورىنداۋ يدەياسى قاشان تۋدى؟» دەگەن سۇراققا ونەر يەلەرى كەز كەلگەن شىعارمانى جازىلعان تىلىندە، ءوز ماقامىمەن تاريحي ءداستۇرىن ساقتاي وتىرىپ ورىنداعان دۇرىس ەكەندىگىن اتقان.

«موڭعول تىلىنە اۋدارىپ ايتۋعا بولار ەدى. ءبىراق سولاي جاسايىق دەگەندى ەش ويلاماپپىز»، - دەيدى قوس ءانشى.

بۇل ءان قازاق حالقىنىڭ سۇيىسپەنشىلىگىنە بولەنگەن شىعارما بولعاندىقتان ماعىناسى قانداي، قالاي ورىنداساق بولادى دەپ ويلاپ، زور جاۋاپكەرشىلىكپەن قاراعانىن ايتادى. ەرلى-زايىپتىلار ادەمى ليريكالىق ءاننىڭ ساپاسىن تۇسىرمەي، ءسوزىن دە بۇزباي دۇرىس ايتىپ شىعۋعا تىرىسقان.

ءتىلشى ءبىر سوزىندە، اۆتورلىق قۇقىق ماسەلەسى قالاي شەشىلگەنىن سۇرايدى. انشىلەر وزدەرىنىڭ اۆتورلىق قۇقىققا ايىرىقشا قۇرمەتپەن قارايتىنىن تىلگە تيەك ەتەدى.

«ءبىز ەكەۋىمىز شىعارماشىلىق پەن اۆتورلارعا وتە قۇرمەتپەن قارايمىز. كەز كەلگەن شىعارمانى اۆتوردىڭ رۇقساتىن الىپ، سودان كەيىن عانا كوپشىلىككە جاريا ەتەمىز. ەلىمىزدە موڭعوليا كومپوزيتورلارى جانە شىعارماشىلىق يەلەرىنىڭ موسكاپ اتتى ۇيىمى بار. ولار سازگەرلەر مەن اقىنداردىڭ اۆتورلىق قۇقىعىن قورعاۋمەن قاتار ازيانىڭ 30 داي ەلىمەن قارىم-قاتىناس ورناتقان. انحاا ءوزى سازگەر بولعاندىقتان دا وسى وداققا مۇشە. ءبىز جوعارىداعى ءاندى ورىنداۋ تىلەگىمىزدى بىلدىردىك. سودان ولار ءبىزدىڭ اتىمىزدان قازاقستانداعى ۇيىمدارىمەن بايلانىسقا شىعىپ، رۇقساتىن الىپ بەردى»، - دەپ جاۋاپ بەرەدى ونەر يەسى ب. چانتسالدۋلام.

موڭعول ءانشىسى ا. انحبايار قازاق ءتىلىن، سالت-ءداستۇرىن بىلمەسە دە وسى جولعى ورەسى بيىك ءاندى ورىنداۋ بارىسىندا قازاق حالقىنىڭ كوپتەگەن جانعا جاعىمدى مادەنيەتىن، تاريحىن تانىپ بىلگەنىن ءسوز ەتەدى.

«وسى «التايدىڭ ار جاعىنان كەلگەن ارۋ» انىنەن باسقا قانداي قازاق اندەرىن بىلەسىزدەر؟» دەگەن سۇراققا، «قازاقتىڭ «انا تۋرالى جىر»، «سۇيگەنىم مەنىڭ قالادا»، «اكەمە»، «اقتاماق» قاتارلى اندەردى تىڭداپ ءجۇرىپ جاتتاپ الدىم. ەندى رەسمي تۇردە تولىقتاپ، قايتا ورىنداۋدى جوسپارلاپ وتىرمىز»، - دەپ جاۋاپ بەرەدى ا. انحبايار.

سۇحباتتىڭ سوڭىندا قوس ءانشى وسى ءاندى ورىنداۋ ارقىلى قازاق حالقىنىڭ ەرەكشە ىقىلاسىنا بولەنگەندەرىن ايتادى.

«ءاندى جارىققا شىعارعالى كوپ بولماسا دا، قازاق حالقىنىڭ زور العىسىنا بولەنىپ جاتىرمىز. بۇل ءبىزدى ەرەكشە جىگەرلەندىردى. تەزىرەك ادەمى كيىمدەر تىككىزىپ، كليپ جاساپ شىعارۋدى ويلاپ وتىرمىز. سىزدەرگە ءبىزدى قۇرمەتتەپ، سۇحبات جاساۋ مۇمكىندىگىن بەرىپ وتىرعاندارىڭىزعا العىس بىلدىرەمىز. وقىرماندار مەن بارشا قازاق حالقىنا تەك قانا الەمدەگى بار جاقسىلىقتاردى تىلەيمىز»، دەگەن ىزگى تىلەكتەرىن بىلدىرەدى ب. چانتسالدۋلام مەن ا. انحبايار.


انكارادا «ابايدى ءتۇسىنۋ» البومىنىڭ تۇساۋكەسەرى ءوتىپ، «اباي» مەدالدارى تابىس ەتىلدى - TRT

6-قاڭتار كۇنى تۇرىك مادەنيەتىنىڭ حالىقارالىق ۇيىمى تۇرىكسوي مەن قازاقستان رەسپۋبليكاسىنىڭ تۇركيا رەسپۋبليكاسىنداعى ەلشىلىگىنىڭ ۇيىمداستىرۋىمەن انكاراداعى تۇرىكسوي باس حاتشىلىق عيماراتىندا «ابايدى ءتۇسىنۋ» البومىنىڭ تۇساۋكەسەرى مەن «اباي» مەدالىمەن ماراپاتتاۋ سالتاناتى بولدى.

بۇل تۋرالى وسى اپتادا تۇركيا راديو تەليەۆيزيا پورتالى حابارلاعان بولاتىن. جينالىستىڭ اشىلۋىندا ءسوز سويلەگەن تۇرىكسوي باس حاتشىسى دۇيسەن قاسەيىنوۆ اباي قۇنانباي ۇلىنىڭ تۋعانىنا 175 جىل تولۋىنا بايلانىستى جىل بويى كوپتەگەن ءىس-شارالار ۇيىمداستىرىلعانىن مالىمدەپ، وسى جىلدان كەيىن دە اباي مۇراسى يگەرىلە بەرەتىنىن ايتتى.

«جينالىستا ءسوز سويلەگەن تۇركيا رەسپۋبليكاسى پرەزيدەنتىنىڭ باس كەڭەسشىسى يالچىن توپچۋ تۇركى الەمىنىڭ اقساقالى ەلباسى ن. ءا. نازاربايەۆتىڭ «حالقىمىزدىڭ مىقتى بولۋىن، ءوسىپ- ءونۋىن قالايتىن ءاربىر ازامات ابايدى وقۋى كەرەك، ابايعا قۇلاق اسۋى كەرەك» دەگەن سوزدەرىن ەسكە ءتۇسىردى. يالچىن توپچۋ ءومىر بويى زاڭسىزدىقتى جانە ادىلەتسىزدىكتى سىناپ وتكەن اباي اتامىز تۋرالى ەلباسىنىڭ ايتقان قۇندى كەڭەسىن بۇكىل ادامزات، اسىرەسە تۇرىك حالىقتارى جۇزەگە اسىرۋى كەرەك ەكەنىن ايتتى»، - دەپ جازادى تۇركيالىق ب ا ق.

قازاقستاننىڭ تۇركياداعى ەلشىسى ابزال ساپاربەك ۇلى عاسىرلار بويى ءبىر-بىرىنەن الشاق تۇرعان تۇرىكتەردىڭ ءبىر-بىرىنە جاقىنداۋىندا جانە ورتاق قۇندىلىقتار اينالاسىندا ۇيىسۋىندا تاريح، مادەنيەت، ءتىل مەن ءدىننىڭ، سونداي-اق ۇلى تۇلعالاردى تانۋدىڭ ماڭىزدى بولىپ تابىلاتىنىن تىلگە تيەك ەتكەن.

اباي جىلىن قورىتىندىلاعان ق ر ەلشىسى تۇركيادا ساياباقتارعا، كوشەلەر مەن داڭعىلدارعا اباي اتى بەرىلىپ، ەسكەرتكىشتەر ورناتىلعانىن جانە بۇل ءىس-شارالاردىڭ 2021-جىلى جالعاسا بەرەتىنىن ايتقان.

«باياندامالاردان كەيىن اباي مەدالدارىن تابىس ەتۋ ءراسىمى وتكىزىلدى. تۇرىكسوي اباي مەدالىمەن تۇركيا رەسپۋبليكاسى پرەزيدەنتىنىڭ باس كەڭەسشىسى يالچىن توپچۋ، قازاقستاننىڭ تۇركياداعى توتەنشە جانە وكىلەتتى ەلشىسى ابزال ساپاربەك ۇلى، تۇركيا رەسپۋبليكاسى مادەنيەت جانە تۋريزم ءمينيسترىنىڭ ورىنباسارى سەردار چام، انكارا قالاسى كەچيورەن اۋدانىنىڭ اكىمى تۋرگۋت التىنوك، انكارا قالاسى گولباشى اۋدانىنىڭ اكىمى رامازان شيمشەك، چورۋم وبلىسى يسكيليپ اۋدانىنىڭ اكىمى الي سۇلىك، احمەت ياسساۋي ۋنيۆەرسيتەتىنىڭ وكىلەتتى كەڭەسىنىڭ ءتوراعاسى مۋحيتتين شيمشەك، TRT AVAZ كوورديناتورى سەدات ساگىركايا، قازاقستان رەسپۋبليكاسىنىڭ نيەۆشەحيردەگى قۇرمەتتى كونسۋلى حاليل ۋلۋەر، ەۋرازيا جازۋشىلار وداعىنىڭ ءتوراعاسى ياكۋپ ومەروعلۋ، ءمۇسىنشى مۇرات مانسۇروۆ، ءمۇسىنشى قامبار وماروۆ ماراپاتتالدى. مەدال يەگەرلەرىنە قازاقستاننىڭ تۇركياداعى ەلشىلىگى تاراپىنان ەستەلىك سىيلىقتار دا تابىستالدى»، دەپ مالىمدەيدى تۇركيا راديو تەلەۆيزيا پورتالى.

اۆتور: بەيسەن سۇلتان


سوڭعى جاڭالىقتار