دارىگەر كوروناۆيرۋستىڭ ادام وكپەسىنە تيگىزەتىن اسەرى تۋرالى ايتتى

نۇر-سۇلتان. قازاقپارات - تەحاس تەحنولوگيالىق ۋنيۆەرسيتەتىنىڭ مەديتسينا عىلىمدارى ورتالىعىنىڭ دوتسەنتى، دارىگەر بريتتاني بەنكحەد-كەندالل COVID-19-دىڭ ادام وكپەسىنە تيگىزەتىن اسەرى تۋرالى ايتتى.

دارىگەر ءۇش رەنتگەن سۋرەتىمەن ءبولىستى: ساۋ ادامنىڭ، تەمەكى شەگۋشى جانە COVID-19 جەڭىل تۇردە اۋىرعان ناۋقاستىڭ وكپە سۋرەتتەرى. دارىگەر ساۋ ادامداردىڭ رەنتگەن سۋرەتتەرى ءمولدىر بولاتىنىن ءتۇسىندىردى. تەمەكى شەگۋشىلەردىڭ وكپە سۋرەتتەرى تىرتىقتارعا بايلانىستى كەي جەرلەرى اق تۇستەس بولىپ كەلەدى. كوروناۆيرۋستان كەيىن وكپەدە كەڭ كولەمدە ءمولدىر ەمەس جەرلەر كورىنەدى.

بۇل COVID-19 جانە اۋا جەتىسپەۋشىلىگىنەن تۋىنداعان قاتتى تىرتىقتارعا بايلانىستى بولادى. كوروناۆيرۋس كوبىنەسە وكپە سۇيىقتىققا تولىپ، قابىنعان كەزدە پايدا بولاتىن پنيەۆمونيا سياقتى اسقىنۋلارعا اكەلەدى. اۋىرعان ادامداردا سوزىلمالى جوتەل، ەنتىگۋ، مۇرىننان وكپەگە دەيىنگى تىنىس الۋ جولدارىنداعى ەپيتەلي جاسۋشالارىنىڭ زاقىمدانۋى داميدى.

اسقىنۋ جاعدايلارى COVID-19-دىڭ سيمپتومسىز تۇرىمەن اۋىرىپ جازىلعان ادامداردىڭ %70-80 - دا بايقالعان. بانكحەد-كەندالل دەنساۋلىق ساقتاۋ سالاسىنداعى كوپتەگەن ساراپشىلارى ىندەتتىڭ جازىلىپ شىققاندارعا ۇزاق مەرزىمدى اسەرىن قاداعالاۋدىڭ گورى ءولىم-ءجىتىم دەڭگەيىنە نازار اۋداراتىندىقتارىنا الاڭداۋشىلىق ءبىلدىردى.

سونىمەن قاتار، دارىگەر COVID-19 دان جازىلعاننان كەيىن دە دەمىكپە ساقتالعان جاعدايدا جەدەل مەديتسينالىق كومەككە جۇگىنۋگە شاقىردى.