ەلوردادا ەسىرتكى ساتۋشىلار ۇستالدى

None
None
نۇر-سۇلتان. قازاقپارات - ەلوردا اۋماعىندا جۇرگىزىلگەن ارنايى وپەراتسيا بارىسىندا قالادا ەسىرتكى ساتۋمەن اينالىسىپ كەلگەن 2 ادام ۇستالدى.

بۇل تۋرالى نۇر-سۇلتان قالالىق پوليتسيا دەپارتامەنتىنەن ءمالىم ەتتى، دەپ حابارلايدى قازاقپارات ءتىلشىسى.

«ەسىرتكى زاتتارىن جەتكىزۋ ارنالارىن جانە قىلمىستىق توپتاردىڭ ءىس-ارەكەتىن جويۋعا باعىتتالعان ءىس-شارالار وتكىزۋ بارىسىندا نۇر-سۇلتان قالاسىندا ەسىرتكى زاتىن ساتۋ ۇستىندە 36 جاستاعى ەر ادام ۇستالدى. ونىڭ ءۇيىنىڭ اۋلاسىن ءتىنتۋ بارىسىندا گاشيش ەسىرتكىسى بۋىپ-تۇيىلگەن 8 پوليەتيلەن شاعىن پاكەت، ال ۇيىنەن سالماعى 600 گرام گاشيش سالىنعان ەكى پوليەتيلەن پاكەت تابىلدى»، - دەلىنگەن ۆەدومستۆو اقپاراتىندا.

سونداي-اق، پوليتسيا قىزمەتكەرلەرى ساياجاي اۋماقتارىنىڭ بىرىندە ەلورداعا ەسىرتكى جەتكىزۋشى 50 جاستاعى قالا تۇرعىنىن ۇستادى.

ءۇيىن ءتىنتۋ بارىسىندا ساتۋعا دايىنداعان جالپى سالماعى شامامەن 1 كەلىنى قۇرايتىن كاننابيس شايىرى سالىنعان 50 سىرىڭكە قورابى تاركىلەندى. ەكى كۇدىكتىدەن تاركىلەنگەن ەسىرتكىنىڭ جالپى سالماعى 1,5 كەلىنى نەمەسە 3500 رەتتىك دوزا گاشيشتى قۇرايدى.

«اتالعان فاكتىلەر بويىنشا قىلمىستىق ءىس قوزعالدى. ۇستالعان كۇدىكتىلەر نۇر-سۇلتان قالالىق پوليتسيا دەپارتامەنتىنىڭ ۋاقىتشا وقشاۋلاعىشىنا قامالدى. تەرگەۋ جۇرگىزىلۋدە»، - دەدى دەپارتامەنتتەن.


سوڭعى جاڭالىقتار