قىتايدا كوروناۆيرۋستىڭ ورشۋىنە بايلانىستى اۋرۋحانا-يزولياتور سالىنا باستادى

بەيجىڭ. قازاقپارات - بيىلعى جىل باسىنان بەرى Covid-19-دىڭ كۇرت ارتۋى تىركەلگەن قىتايدىڭ حەبەي پروۆينتسياسىندا يزولياتوردىڭ قۇرىلىسى باستالدى، دەپ حابارلايدى «قازاقپارات» ح ا ا مەنشىكتى ءتىلشىسى.

وسى اپتادا باستالعان قۇرىلىس شيتسزياچجۋان قالاسىنىڭ ماڭىندا جۇرگىزىلۋدە.

بۇل قالادا كوروناۆيرۋستىڭ تارالۋى كۇرت وسكەندىكتەن لوكداۋن ەنگىزىلدى. وقشاۋلاۋ اۋرۋحاناسى 33 گەكتار اۋماقتى الماق.

جوبا مەردىگەرىنىڭ ايتۋىنشا، 3 مىڭعا جۋىق پالاتا دايىنداۋ تاپسىرىلعان. ءار پالاتانىڭ اۋدانى - 18 شارشى مەتر.

ەسكە سالساق، «حوشەنشان» مامانداندىرىلعان العاشقى اۋرۋحاناسى قىتايدا كوروناۆيرۋستىڭ تارالۋ وشاعىنا اينالعان ۋحاندا (حۋبەي پروۆينتسياسى) 10 كۇندە سالىنعان بولاتىن. جالپى اۋماعى 25 مىڭ شارشى مەتردى قۇرايتىن اۋرۋحانا ءبىر مەزەتتە 1 مىڭعا جۋىق ناۋقاستى قابىلداي الدى.

شيتسزياچجۋانداعى اۋرۋلاردىڭ الدىن الۋ جانە باقىلاۋ شتابىنىڭ (حەبەي پروۆينتسياسى) نۇسقاماسىنا سايكەس، شيتسزياچجۋان مەن ونىڭ توڭىرەگىندە تۇراتىن جەرگىلىكتى تۇرعىندارعا 19 - قاڭتارعا دەيىن ۇيدەن شىقپاۋ مىندەتتەلدى.

قىتايدا وتكەن ءبىر تاۋلىكتە كوروناۆيرۋس ينفەكتسياسىنىڭ 115 راستالعان جەرگىلىكتى جاعدايى تىركەلدى، ولاردىڭ 90 ى حەبەي پروۆينتسياسىندا، 23 ءى حەيلۋنتسزيان پروۆينتسياسىندا، 2 ەۋى بەيجىڭدە.