فۋتزالدان چەمپيوندار ليگاسى: «قايرات» پەن «اقتوبە» جارىستى جالعاستىرا الا ما؟

نۇر-سۇلتان. قازاقپارات - بۇگىن، 16- قاڭتاردا فۋتزالدان UEFA چەمپيوندار ليگاسىندا قازاقستاندىق «قايرات» جانە «اقتوبە» 1/16 فينالدىق ويىنىن وتكىزەدى، دەپ حابارلايدى قازاقپارات ءتىلشىسى.

ەستەرىڭىزگە سالا كەتەلىك، ەكى كوماندا دا قارسىلاستارىمەن سىرت الاڭدا كەزدەسەدى. «قايرات» بەلارۋستە «ۆيتەن» (ورشا) كلۋبىمەن شەبەرلىك بايقاسسا، «اقتوبە» گرەكيادا ا ە ك (افينى) كلۋبىمەن وينايدى.

«قايرات» اتالعان تۋرنيردە 2012/2013، 2014/2015-جىلداردا جەڭىمپاز اتانعان بولاتىن. بۇل ۋاقىتتا تۋرنير UEFA كۋبوگى دەپ اتالاتىن. ونىڭ قارسىلاسى «ۆيتەن» ازىرگە مۇنداي جەتىستىكتى باعىندىرعان جوق. ءوز ەلىندە ءتورت مارتە چەمپيون اتاندى.

ەكى كوماندا بۇدان بۇرىن 2013/14-جىلعى كەزەڭدە UEFA چەمپيوندار ليگاسىنىڭ ەليتالىق ساتىسىندا الماتى قالاسىندا كەزدەستى.

بۇل جولى الماتىلىق فۋتزالشىلار قارسىلاسىن 9:0 ەسەبىمەن تىزە بۇكتىردى. «قايرات» پەن «ۆيتەن» كوماندالارى اراسىنداعى كەزدەسۋ 17.00 دە باستالادى.

ويىن Qazsport تەلەارناسىنان تىكەلەي ەفيردە كورسەتىلەدى. ال «اقتوبە» مەن ا ە ك كوماندالارى ازىرگە مۇنداي تابىستارعا قول جەتكىزە قويعان جوق.

بۇل كوماندالار اراسىنداعى كەزدەسۋ ەلوردا ۋاقىتىمەن 19:00 دە باستالادى.