پرەمەر- مينيستر ون كۇن ىشىندە پرەزيدەنتكە ۇكىمەت قۇرامىن ۇسىنادى
كونستيتۋتسيانىڭ 65-بابىنا سايكەس، رەسپۋبليكا پرەمەر- ءمينيسترى تاعايىندالعاننان كەيىنگى ون كۇن مەرزىم ىشىندە پرەمەر- مينيستر ۇكىمەتتىڭ قۇرىلىمى مەن قۇرامى تۋرالى رەسپۋبليكا پرەزيدەنتىنە ۇسىنىس ەنگىزەدى. سودان كەيىن ۇكىمەت مۇشەلەرى قازاقستان حالقى مەن پرەزيدەنتىنە انت بەرەدى.
ەسكە سالا كەتسەك، بۇگىن پارلامەنت ءماجىلىسىنىڭ جالپى وتىرىسىندا ۇكىمەت باسشىسى لاۋازىمىنا اسقار مامين تاعايىندالدى. ەلباسى نۇرسۇلتان نازاربايەۆ تا وسىعان دەيىن «نۇر وتان» پارتياسى فراكسياسىنىڭ وتىرىسىندا ۇكىمەت باسشىسىنىڭ كانديداتۋراسىنا پىكىر ءبىلدىرىپ، اسقار ماميننىڭ كانديداتۋراسىن قولداعان ەدى. سونىمەن بىرگە، بۇگىن ق ر پرەزيدەنتى قاسىم- جومارت توقايەۆ 7- شاقىرىلعان پارلامەنتتىڭ 1- سەسسياسىن اشتى. مەملەكەت باسشىسى قۇرامى جاڭعىرعان جاڭا ءماجىلىستىڭ قىزمەتكە كىرىسۋى ەلىمىز ءۇشىن سيمۆولدىق ءمانى بار ەكى وقيعامەن تۇسپا- تۇس كەلەتىنىن اتاپ ءوتتى. ول - ەل تاۋەلسىزدىگىنىڭ 30 جىلدىق مەرەيتويى مەن قازىرگى زامانعى قازاقستان پارلامەنتاريزمىنىڭ شيرەك عاسىرلىق بەلەسكە جەتكەنى. مەملەكەت باسشىسى وسى تاريحي كەزەڭدە سەنىم مانداتىنا يە بولعان دەپۋتاتتار حالىق ءۇمىتىن اقتاپ، وتانىمىزعا ادال قىزمەت ەتەتىنىنە سەنىم ءبىلدىردى.
اۆتور: ايجان سەرىكجان قىزى