ق ر پرەزيدەنتى پرەمەر- ءمينيستردى تاعايىنداۋعا قاتىستى: پىكىرتالاس اشىق ءارى ايقىن بولدى

نۇر- سۇلتان. قازاقپارات - بۇگىن پارلامەنت ءماجىلىسىنىڭ جالپى وتىرىسىندا ق ر پرەزيدەنتى قاسىم- جومارت توقايەۆ پرەمەر- مينيستر لاۋازىمىنا اسقار ماميننىڭ تاعايىندالۋىنا قاتىستى پىكىر ءبىلدىردى، حابارلايدى قازاقپارات ءتىلشىسى.

ايتا كەتەيىك، جالپى وتىرىستا ق ر پرەمەر- ءمينيسترى ەتىپ اسقار ۇزاقباي ۇلى ماميندى تاعايىنداۋعا كەلىسىم بەرىلسىن دەگەن قاۋلىنىڭ جوباسى داۋىسقا قويىلدى. قاتىسقان 99 دەپۋتاتتىڭ 78 جاقتادى، ال 21 دەپۋتات قالىس قالدى.

«شىن مانىندە وتە قىزىق تالقىلاۋ بولدى. پىكىرتالاس وتە اشىق، انىق ءارى ايقىن بولدى. سوندىقتان ريزاشىلىعىمدى بىلدىرەمىن»، - دەپ توقتالدى پرەزيدەنت قاسىم- جومارت توقايەۆ.

وسى ورايدا مەملەكەت باسشىسى ەكى فراكسيا، ياعني «اق جول» پارتياسى مەن قازاقستان حالىق پارتياسى داۋىس بەرۋ كەزىندە قالىس قالعانىن ەسكە سالىپ، قالىس قالۋ - ول قارسى داۋىس ەمەس ەكەنىن ايتتى.

«اسقار ۇزاقباي ۇلىن (ۇكىمەت باسشىسىن) شىن جۇرەكتەن قۇتتىقتايمىن! سىزگە ۇلكەن جاۋاپكەرشىلىك جۇكتەلىپ وتىر. سوندىقتان جۇمىسىڭىز ماردىمدى، تابىستى، جەمىستى بولا بەرسىن»، - دەدى مەملەكەت باسشىسى.

بۇدان بۇرىن حابارلانعانداي، بۇگىن پارلامەنت ءماجىلىسىنىڭ جالپى وتىرىسىندا ۇكىمەت باسشىسى لاۋازىمىنا اسقار مامين بەكىتىلدى.

ەسكە سالا كەتەيىك، ەلباسى نۇرسۇلتان نازاربايەۆ تا وسىعان دەيىن «نۇر وتان» پارتياسى فراكسياسىنىڭ وتىرىسىندا ۇكىمەت باسشىسىنىڭ كانديداتۋراسىنا قاتىستى پىكىر ءبىلدىردى. «مەنىڭ ويىمشا، ساباقتاستىقتى ساقتاۋ كەرەك. بارلىق قيىندىققا قاراماستان، ۇكىمەت ءوز جۇمىسىن جاقسى اتقاردى. باسقا ەلدەرگە قاراعاندا ءبىز جامان ناتيجە كورسەتكەن جوقپىز. ەگەر پرەزيدەنت اسقار ۇزاقباي ۇلى ماميندى ۇسىنسا، وندا مەن فراكسيادان ونىڭ كانديداتۋراسىن قولداۋدى سۇرايمىن»، - دەدى نۇرسۇلتان نازاربايەۆ.

اۆتور: رۋسلان عابباسوۆ