اسقار مامين ق ر پرەمەر- ءمينيسترى لاۋازىمىنا بەكىتىلدى

نۇر- سۇلتان. قازاقپارات - بۇگىن پارلامەنت ءماجىلىسىنىڭ جالپى وتىرىسىندا ۇكىمەت باسشىسى لاۋازىمىنا اسقار مامين بەكىتىلدى، حابارلايدى قازاقپارات ءتىلشىسى.

بۇعان دەيىن پرەزيدەنت قاسىم- جومارت توقايەۆ پرەمەر- مينيستر لاۋازىمىنا اسقار ءماميندى ۇسىنعان بولاتىن. ەسكە سالا كەتەيىك، ەلباسى نۇرسۇلتان نازاربايەۆ «نۇر وتان» پارتياسى فراكسياسىنىڭ وتىرىسىندا ۇكىمەت باسشىسىنىڭ كانديداتۋراسىنا قاتىستى پىكىر ءبىلدىردى.

«مەنىڭ ويىمشا، ساباقتاستىقتى ساقتاۋ كەرەك. بارلىق قيىندىققا قاراماستان، ۇكىمەت ءوز جۇمىسىن جاقسى اتقاردى. باسقا ەلدەرگە قاراعاندا ءبىز جامان ناتيجە كورسەتكەن جوقپىز. ەگەر پرەزيدەنت اسقار ۇزاقباي ۇلى ماميندى ۇسىنسا، وندا مەن فراكسيادان ونىڭ كانديداتۋراسىن قولداۋدى سۇرايمىن»، - دەدى نۇرسۇلتان نازاربايەۆ.

اسقار ۇزاقباي ۇلى مامين 1965 -جىلى سەلينوگراد قالاسىندا دۇنيەگە كەلگەن. سەلينوگراد ينجەنەر قۇرىلىسى ينستيتۋتىن، گ. ۆ. پلەحانوۆ اتىنداعى رەسەي ەكونوميكالىق اكادەمياسىن ينجەنەر- قۇرىلىسشى، ەكونوميست ماماندىعى بويىنشا ءتامامداعان. ەڭبەك جولىن «سەلينتياجستروي» ترەسىندە مونتاجداۋشى بولىپ باستاعان. 1996- 2008 -جىلدار ارالىعىندا استانا قالاسى اكىمىنىڭ ءبىرىنشى ورىنباسارى، كولىك جانە كوممۋنيكاتسيالار ۆيتسە- ءمينيسترى، يندۋستريا جانە ساۋدا ءبىرىنشى ۆيتسە- ءمينيسترى، قازاقستان رەسپۋبليكاسى كولىك جانە كوممۋنيكاتسيالار ءمينيسترى، استانا قالاسىنىڭ اكىمى قىزمەتتەرىن اتقارعان.

2008 -جىلعى ساۋىردەن باستاپ - «قازاقستان تەمىر جولى» ۇلتتىق كومپانياسى» اكسيونەرلىك قوعامىنىڭ پرەزيدەنتى. 2016 -جىلعى 9 - قىركۇيەكتەن باستاپ – ق ر پرەمەر- ءمينيسترىنىڭ ءبىرىنشى ورىنباسارى. 2019 -جىلعى 25 - اقپاننان باستاپ قازاقستان رەسپۋبليكاسى پرەزيدەنتىنىڭ جارلىعىمەن ق ر پرەمەر- ءمينيسترى بولىپ تاعايىندالدى.

«ەرەن ەڭبەگى ءۇشىن» مەدالىمەن (1998)، «قۇرمەت» وردەنىمەن (2006)، ەكىنشى دارەجەلى «بارىس» وردەنىمەن (2011)، اۋليە كنياز ماسكەۋلىك دانييلدىڭ ءۇشىنشى دەڭگەيلى وردەنىمەن (2010)، فرانسۋز رەسپۋبليكاسىنىڭ قۇرمەتتى لەگيونى (2013) جانە لاتۆيا رەسپۋبليكاسىنىڭ «تانىم كرەستى» ەكىنشى دەڭگەيلى وردەنىمەن (2013)، يسپانيا كورولدىگىنىڭ «ازاماتتىق ەڭبەگى ءۇشىن» ءبىرىنشى دەڭگەيلى وردەنىمەن (2014) ماراپاتتالعان. استانا قالاسىنىڭ قۇرمەتتى ازاماتى (2011)، قۇرمەتتى تەمىرجولشى (2012)، قازاقستاننىڭ قۇرمەتتى قۇرىلىسشىسى (2013).