ەلوردادا اۋلاداعى كولىكتى ەۆاكۋاتورعا تيەپ، ۇرلاپ كەتكەن

نۇر-سۇلتان. قازاقپارات - نۇر-سۇلتان تۇرعىندارىنىڭ ءبىرى بەلگىسىز بىرەۋلەر «حۋنداي اكسەنت» ماركالى كولىگىن ۇرلاپ كەتكەندىگىن حابارلاپ، پوليتسياعا ارىزدانعان.

ونىڭ ايتۋىنشا، كولىگى ءوزى ءۇش كۇندىك ءىسساپاردا جۇرگەن كەزدە قولدى بولعان، دەپ حابارلايدى قازاقپارات ءتىلشىسى قالالىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

كولىك ۇرلاعان ادامدار كوپكە ۇزاماپتى. ولاردىڭ ىزىنە تۇسكەن پوليتسيا كۇدىكتى رەتىندە 34 جانە 29 جاستاعى ەكى جىگىتتى ۇستاعان. تەرگەۋ بارىسىندا انىقتالعانىنداي، كۇدىكتىلەر اۋلادا قار باسىپ تۇرعان كولىكتى كورىپ، ايداپ اكەتۋگە كەلىسكەن. كولىكتىڭ ەسىگىن اشۋ ءۇشىن حابارلاندىرۋ ارقىلى «اۆتومەدۆەجاتنيككە» جۇگىنگەن. ۇرىلاردىڭ ءبىرى كەلگەن ماماندى كولىكتىڭ يەسى ەكەندىگىنە سەندىرگەن. سولاي كىلتىن جاساتىپ العان. وسىلايشا، كەشكە قاراي ەۆاكۋاتور الىپ كەلىپ، ماشينانى الىپ كەتكەن. «ەۆاكۋاتوردى دا كۇدىكتىلەر حابارلاندىرۋ سايتى ارقىلى شاقىرعان. جۇرگىزۋشىسىنە 10 مىڭ تەڭگە تولەپ، كولىكتى كۇدىكتىلەردىڭ ءبىرى تۇرىپ جاتقان ءۇيدىڭ اۋلاسىنا جەتكىزگەن»، - دەيدى نۇر-سۇلتان قالاسىنىڭ پوليتسيا دەپارتامەنتى سارىارقا اۋداندىق پوليتسيا ءبولىمى باستىعىنىڭ ورىنباسارى رۋسلان تەمىربايەۆ.

ۇستالعان جىگىتتەر كىناسىن مويىنداپ وتىر. ەكەۋى دە ۋاقىتشا وقشاۋلاعىشقا قامالعان. اتالعان ءىس بويىنشا قىلمىستىق كودەكستىڭ 188-بابى بويىنشا قىلمىستىق ءىس قوزعالدى. قىلمىس تولىق دالەلدەنگەن جاعدايدا ولار 7 جىلعا دەيىن باس بوستاندىعىنان ايىرىلۋى مۇمكىن.