كوشەدە ازاماتتارعا ماسكاسىز جۇرگەنى ءۇشىن ايىپپۇل سالعان دۇرىس پا
بۇگىن سىبايلاس جەمقورلىققا قارسى ءىس- قيمىل اگەنتتىگىندە رافاەل گاسانوۆتىڭ قاتىسۋىمەن باسپا ءسوز ءماسليحاتى ءوتتى.
باسپا ءسوز ءماسليحاتى بارىسىندا سپيكەرگە «قازاقستاننىڭ كەيبىر وڭىرىندە ءموبيلدى توپتار (قۇرامىنداعى پوليتسيا قىزمەتكەرلەرى ارقىلى) كوشەدە ماسكاسىز جۇرگەن ازاماتتارعا اكىمشىلىك كودەكستىڭ 425-بابىن نەگىزگە الىپ، 40 مىڭ تەڭگەدەن ارتىق ايىپپۇل سالعان. بۇل زاڭدى ما؟» دەگەن سۇراق قويىلعان بولاتىن. بۇل سۇراققا جاۋاپ بەرگەن رافاەل گاسانوۆ ەڭ الدىمەن ەلدەگى بۇكىل اكىمدىكتەرگە ۇندەۋ جولدادى.
«تىڭداڭىزدار! جازالاۋدان بۇرىن پريەۆەنسياعا جۇمىس ىستەۋ كەرەك. ادامدارعا الدىمەن تۇسىندىرگەن ابزال. سۇراق دۇرىس قويىلىپ وتىر. ءوز باسىم ازاماتتارعا ءجونسىز ايىپپۇل سالىنا بەرمەۋى كەرەك دەپ ەسەپتەيمىن. حالىق الدىمەن سالىق تولەپ وتىر. سول سالىقتان ولار (اكىمدىك قىزمەتكەرلەرى) ايلىق الادى. ياعني، حالىققا باس- كوز جوق ايىپپۇل سالا بەرمەي، جادىنامالاردى تاراتىپ، تۇسىندىرمە جۇمىستارىن كۇشەيتكەن ابزال. ءبىر سوزبەن اقپاراتتىق ءتۇسىندىرۋ جۇمىسى جاپپاي جۇرگىزىلۋى كەرەك. الدىمەن تۇسىنىك جازدىرۋ كەرەك، بولماسا ءبىر رەت ەسكەرتۋ جاساعان دۇرىس»، - دەيدى رافاەل گاسانوۆ.
ونىڭ ايتۋىنشا قوعامدا شىنىندا دا ءتارتىپتى ورەسكەل بۇزاتىندار بار. رافاەل گاسانوۆ سونىمەن قاتار بۇل وقيعالاردىڭ زاڭدىلىعىن انىقتاۋعا ۋادە بەردى.
«ءوزىمىز دە ەل ءىشىن ارالاپ ءجۇرمىز. ءتارتىپتى ورەسكەل بۇزعان ازامات سول مەملەكەتتىك قىزمەتشىنىڭ وزىنە دە ارىز جازۋى مۇمكىن. وسى كەزدە اراعا قوعام وكىلدەرى كىرۋى كەرەك. ءبارىمىز ادامبىز عوي. سولاي ەمەس پە؟ بۇل ماسەلەنىڭ كەمشىلىكتەرى دە، ارتىقشىلىقتارى دا بار. جازالاۋ ادىسىنە سالساق، ەندەشە ەلدىڭ جارتىسىنا ايىپپۇل سالايىق. بۇل اقىماقتىق بولار ەدى»، - دەدى رافاەل گاسانوۆ.
اۆتور: ايان بەكەن ۇلى