ءماجىلىس ءتوراعاسى سايلاندى

نۇر-سۇلتان. قازاقپارات - بۇگىن پارلامەنت ءماجىلىسىنىڭ جالپى وتىرىسىندا نۇرلان نىعماتۋلين ءماجىلىس ءتوراعاسى لاۋازىمىنا سايلاندى، دەپ حابارلايدى قازاقپارات ءتىلشىسى.

«نۇرلان نىعماتۋلين قالادا دا، مينيسترلىكتە دە، وبلىستا دا، پارتيادا دا، اكىمشىلىكتە دە باسشى قىزمەتتەردە بولىپ، ءومىردىڭ ۇلكەن سىناعىنان ءوتتى. ەلباسىنىڭ سىنىنا شىداس بەرگەن، قازاقشا ايتقاندا، وت پەن سۋدان وتكەن تۇلعا. نۇرلان ءنىعماتۋليننىڭ ءماجىلىس ءتوراعاسى رەتىندەگى قىزمەتتى تانىتقان تالاپشىلدىعىن، ىسكەرلىگىن، جاۋاپتىلىعىن ءبىز التىنشى شاقارىلىم كەزىندە ءوز كوزىمىزبەن كورىپ، كۇن سايىن كۋا بولىپ جۇردىك»، - دەدى دەپۋتات ساۋىتبەك ابدراحمانوۆ. وسى ورايدا ول ن. زايروللا ۇلى كەز كەلگەن تاقىرىپتى جان-جاقتى زەرتتەيتىنىن اتاپ ءوتتى. «ءماجىلىس ءتوراعاسى قىزمەتىنە نۇرلان زايروللا ۇلى نىعماتۋلين كانديداتۋراسى ۇسىنىلۋى ءادىل ءارى ورىندى. مەن پارلامەنتكە سايلانعان بارلىق ارىپتەستەرىمدى، ساياسي پارتيا فراكتسيالار مۇشەلەرىن، قازاقستان حالقى اسسامبلەياسىنان سايلانعان دەپۋتاتتاردى وسى كانديداتۋرانى قولداۋعا شاقىرامىن»، - دەدى س. ابراحمانوۆ.

سونىمەن قاتار جالپى وتىرىس بارىسىن «اق جول» پارتياسىنىڭ ءتوراعاسى ازات پەرۋاشيەۆ، قازاقستان حالىق پارتياسىنىڭ ءتوراعاسى ايقىن قوڭىروۆ ءماجىلىس ءتوراعاسى لاۋازىمىنا ۇسىنىلعان كانديداتۋرانى قولدادى.

ەسكە سالا كەتەيىك، 14-قاڭتاردا ەلباسى نۇرسۇلتان نازاربايەۆ «Nur Otan» پارتياسى فراكتسياسىنىڭ وتىرىسىندا پارلامەنت ماجىلىسىندەگى پارتيا فراكسياسىنىڭ جەتەكشىسى قىزمەتىنە نۇرلان نىعماتۋليننىڭ كانديداتۋراسىن ۇسىندى. فراكسيا دەپۋتاتتارى ەلباسىنىڭ ۇسىنىسىن ءبىراۋىزدان قولدادى. سونداي-اق، ءماجىلىس سپيكەرى لاۋازىمىنا نۇرلان نىعماتۋليننىڭ كانديداتۋراسىن ۇسىنۋ ماسەلەسى دە قارالدى.

نۇرلان زايروللا ۇلى نىعماتۋلين 1962 -جىلى قاراعاندىدا تۋعان. قاراعاندى پوليتەحنيكالىق ينستيتۋتىن بىتىرگەن. ساياسي عىلىمدارىنىڭ دوكتورى. ينستيتۋتتى بىتىرگەننەن كەيىن «قاراعاندىوبلگاز» وندىرىستىك بىرلەستىگى اۆتوكولونناسىنىڭ ينجەنەرى، باستىعى بولىپ جۇمىس ىستەگەن. 1985-1990 -جىلدارى - قازاقستان ل ك ج و لەنين اۋداندىق كوميتەتىنىڭ ءبىرىنشى حاتشىسى، قازاقستان ل ك ج و و ك كومسومول ۇيىمدارى ءبولىمى مەڭگەرۋشىسىنىڭ ورىنباسارى، قازاقستان ل ك ج و قاراعاندى وبلىستىق كوميتەتىنىڭ حاتشىسى، ءبىرىنشى حاتشىسى.

1990-1993 -جىلدارى - قازاقستان جاستار ۇيىمدارى كوميتەتىنىڭ ءتوراعاسى. 1993-1995 -جىلدارى - «تەنگري» قازاق- امەريكان بىرلەسكەن كاسىپورىننىڭ پرەزيدەنتى. 1995-1999 -جىلدار ارالىعىندا - قازاقستان رەسپۋبليكاسى پرەزيدەنتى اكىمشىلىگىنىڭ ۇيىمداستىرۋ- باقىلاۋ ءبولىمىنىڭ مەملەكەتتىك ينسپەكتورى، ءبولىم مەڭگەرۋشىسىنىڭ ورىنباسارى. 1999-2002 -جىلدارى - استانا قالاسى اكىمىنىڭ ورىنباسارى.

2002-2004 -جىلدار ارالىعىندا - قازاقستان رەسپۋبليكاسى كولىك جانە كوممۋنيكاتسيا ۆيتسە-ءمينيسترى. 2004-2006 -جىلدارى - قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ورىنباسارى. 2006-2009 -جىلدار ارالىعىندا - قاراعاندى وبلىسىنىڭ اكىمى.

2009-2012 -جىلدار ارالىعىندا - «نۇر وتان» حالىقتىق دەموكراتيالىق پارتياسى ءتوراعاسىنىڭ ءبىرىنشى ورىنباسارى. 2012 -جىلعى 20-قاڭتار - 2014 -جىلعى 3-ءساۋىر ارالىعىندا بەسىنشى سايلانعان قازاقستان رەسپۋبليكاسى پارلامەنتى ءماجىلىسىنىڭ ءتوراعاسى، «نۇر وتان» حالىقتىق دەموكراتيالىق پارتياسىنىڭ قازاقستان رەسپۋبليكاسى پارلامەنتى ماجىلىسىندەگى فراكسياسىنىڭ جەتەكشىسى. 2014 -جىلعى 3-ءساۋىر - 2016 -جىلعى 21-ماۋسىم ارالىعىندا قازاقستان رەسپۋبليكاسى پرەزيدەنتى اكىمشىلىگىنىڭ باسشىسى قىزمەتىن اتقاردى. 2016 -جىلعى 22-ماۋسىمنان باستاپ التىنشى سايلانعان قازاقستان رەسپۋبليكاسى پارلامەنتى ءماجىلىسىنىڭ ءتوراعاسى بولىپ ءبىراۋىزدان سايلاندى، «نۇر وتان» پارتياسىنىڭ مۇشەسى، پارتيالىق ءتىزىم بويىنشا سايلانعان.

ايتا كەتەيىك، 2019 -جىلعى 22-تامىزىنان - «NurOtan» پارتياسىنىڭ ماجىلىستەگى فراكتسياسىنىڭ جەتەكشىسى. «قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆ»، «قۇرمەت»، II دارەجەلى «بارىس» وردەندەرىمەن ماراپاتتالعان.