پرەزيدەنت بالالار اراسىنداعى سۋيتسيد پەن بۋللينگتىڭ الدىن الۋعا باقىلاۋدى كۇشەيتۋدى تاپسىردى
بۇل تۋرالى 7-شاقىرىلعان پارلامەنتتىڭ 1-سەسسياسىن اشقان ق ر پرەزيدەنتى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«سونىمەن قاتار ءبىز بالا قۇقىقتارىن قورعاۋ جونىندەگى اۋقىمدى ماسەلەلەردى شەشۋگە ءتيىسپىز. بالالاردىڭ قاۋىپسىزدىگىن قامتاماسىز ەتۋ، بالالار اراسىنداعى سۋيتسيد پەن بۋللينگتىڭ الدىن الۋ ءۇشىن مەملەكەتتىك باقىلاۋدى كۇشەيتىپ، ءتيىمدى تەتىكتەردى قاراستىرعان ءجون»، - دەدى مەملەكەت باسشىسى.
ق ر پرەزيدەنتى ەرەكشە كۇتىمگە مۇقتاج بالالاردىڭ ينكليۋزيۆتى دامۋى ماسەلەسىن نازاردان تىس قالدىرماۋىمىز كەرەكتىگىن دە باسا ايتتى.
«ءبىلىم بەرۋ مەكەمەلەرىندەگى ءتيىستى قىزمەتتەردىڭ تيىمدىلىگىن ارتتىرۋ ءۇشىن نورماتيۆتىك بازا قالىپتاستىرۋ كەزەك كۇتتىرمەيتىن مىندەتتىڭ ءبىرى. الەۋمەتتىك ماڭىزى جوعارى وسىنداي ماسەلەلەردى شەشۋ مەملەكەتتىك ورگانداردىڭ عانا مىندەتى ەمەس. وعان بۇكىل ازاماتتىق قوعامنىڭ اتسالىسۋى قاجەت ەكەنىن ءبارىمىز تۇسىنۋگە ءتيىسپىز»، - دەدى قاسىم-جومارت توقايەۆ.
اۆتور: مارلان جيەمباي