مەملەكەتتىك باسقارۋدىڭ جاڭا مودەلىن ەنگىزۋ ايرىقشا ماڭىزدى – پرەزيدەنت
«ءبىز قۇقىقتىق مەملەكەتتى دامىتۋ جانە ازاماتتاردىڭ بيلىك ورگاندارىنا سەنىمىن نىعايتۋ ءۇشىن بار كۇش- جىگەرىمىزدى جۇمساۋىمىز كەرەك. بۇل وتە وزەكتى مىندەت. سوعان وراي مەملەكەتتىك باسقارۋدىڭ جاڭا مودەلىن ەنگىزۋ ايرىقشا ماڭىزدى. وسى باعىتتاعاعى رەفورمالار جۇيەلى، بايىپپەن ورتالىقسىزداندىرۋدى، مەملەكەتتىك اپپاراتتى جاڭعىرتۋدى، كۆازيمەملەكەتتىك سەكتوردى وڭتايلاندىرۋدى جانە بارلىق ۇدەرىستى تسيفرلاندىرۋدى قامتيدى» ، - دەدى پرەزيدەنت.
مەملەكەت باسشىسىنىڭ ايتۋىنشا، سول ارقىلى مەملەكەتتىك بارىنشا ىقشام، اشىق ءارى ءتيىمدى، ال شەشىم قابىلداۋ ۇدەرىسى يكەمدى جانە ايقىن بولادى.
«سوت قىزمەتى تۋرالى اقپارات قوعام ءۇشىن نەعۇرلىم قولجەتىمدى بولعانى ءجون. قۇقىق قورعاۋ ورگاندارىنىڭ جۇمىسىن دا بارىنشا وزگەرتۋ قاجەت. بۇل ماسلە جونىندە جولداۋىمدا ناقتى ايتتىم. ءبىز ازاماتتارمەن ءوزارا قارىم- قاتىناستىڭ سەرۆيستىك مودەلىن ەنگىزەمىز. قوعامدىق قاۋىپسىزدىك جاڭا سيفرلىق تەحنولوگيالاردى قولدانۋ ارقىلى قامتاماسىز ەتىلەدى. پارلامەنت زاڭ ۇستەمدىگى، ادال باسەكە جانە جەكەمەنشىكتى قورعاۋ قاعيداتتارىنىڭ قۇقىقتىق نەگىزىن نىعايتا ءتۇسۋى كەرەك»، - دەدى مەملەكەت باسشىسى.
وسى ورايدا پرەزيدەنت بۇل قاعيداتتار مۇلتىكسىز ورىندالاتىنىن اتاپ ءوتتى.
«بۇگىندە ءبىرقاتار زاڭنامالىق ۇسىنىستار بويىنشا جۇمىس جۇرگىزىلىپ جاتىر. دەگەنمەن، ءالى دە كوپتەگەن تىڭ باستامالار كوتەرىپ، زاڭدار قابىلداۋ قاجەت»، - دەدى ق. توقايەۆ.