كوروناۆيرۋس: الەمدەگى احۋال
سونداي- اق قايتا جۇقتىرۋ ىقتيمالدىعى العاشقىعا قاراعاندا %83 تومەن بولادى، دەپ حابارلايدى قازاقپارات BBC- گە سىلتەمە جاساپ. جالپى، ادام اعزاسىندا يممۋنيتەت ساقتالاتىن ۋاقىت ءالى دە ناقتى بەلگىسىز. وتكەن جىلدىڭ ماۋسىمى مەن قاراشاسى ارالىعىندا جۇرگىزىلگەن زەرتتەۋدە كوروناۆيرۋس جۇقتىرعان بريتاندىق دەنساۋلىق ساقتاۋ جۇيەسىنىڭ 6614 قىزمەتكەرىنىڭ دەرەكتەرى باقىلاندى. وسى ناۋقاستاردىڭ تەك 44 ءى قايتادان ۆيرۋس جۇقتىرعان. عالىمداردىڭ ايتۋىنشا، مۇنداي ستاتيستيكا ءۇمىت سىيلاعانىمەن، قايتا جۇقتىرعان ادام العاش ۆيرۋسقا شالدىققان ادام ءتارىزدى جۇقپالى بولۋى مۇمكىن.
«ەگەر ءسىز اۋرۋدى جەڭىپ، ەندى قاۋىپسىزبىن دەپ ويلاساڭىز، سىزدە اۋىر دەرتتىڭ تۋىنداۋ قاۋپى تومەن بولعانىمەن، ينفەكتسيانى باسقا ادامعا جۇقتىرا الاسىز» ، - دەپ ءتۇسىندىردى زەرتتەۋ اۆتورلارىنىڭ ءبىرى سيۋزان حوپكينس.
وسىنداي قورىتىندىلاردى نازارعا العان بريتان بيلىگى بارلىق ازاماتتار ۇيدە وتىرۋ كەرەك دەپ ەسەپتەيدى. وعان قوسا، يممۋنيتەتتىڭ بەس ايعا دەيىن عانا ساقتالاتىنىن ەسكەرسەك، وتكەن جىلدىڭ كوكتەمىندە، پاندەميانىڭ العاشقى تولقىنى كەزىندە اۋىرعان ادامدار قايتادان قاۋىپ توبىنا ەنىپ وتىر. اۋستراليا وكسفورد ۆاكتسيناسىنىڭ تيىمدىلىگىنە كۇمان كەلتىرۋدە اۋستراليالىق عالىمدار توبى ەل ۇكىمەتىن يممۋنيزاتسيا ستراتەگياسىن قايتا قاراۋعا شاقىرىپ جاتىر. ولاردىڭ پىكىرىنشە، وكسفورد ۋنيۆەرسيتەتى مەن AstraZeneca كومپانياسى وندىرگەن ۆاكتسينا ۇجىمدىق يممۋنيتەت قالىپتاستىرۋ ءۇشىن ءتيىمسىز. يممۋنولوگيا سالاسىنداعى بىرنەشە مامان جانە وپپوزيتسيالىق لەيبوريستىك پارتيا وكىلدەرى سىناق كەزىندە اناعۇرلىم جوعارى تيىمدىلىك كورسەتكەن BioNTech/Pfizer جانە Moderna ۆاكتسينالارىن ساتىپ الۋ ءۇشىن كۇش سالا بەرەتىنىن مالىمدەدى. دەنساۋلىق ساقتاۋ سالاسىنىڭ جەكەلەگەن ساراپشىلارى دا كەلەسى ايدان باستاپ AstraZeneca پرەپاراتىمەن ۆاكتسينالاۋدى توقتاتۋ كەرەكتىگىن باسا ايتۋدا. دەگەنمەن بۇل ۇسىنىستى كانبەرراداعى بيلىك ماقۇلدامادى.
اۋستراليا مەديتسينا قاۋىمداستىعىنىڭ (ا م ا) پرەزيدەنتى ەندريۋ ميللەردىڭ ايتۋىنشا، AstraZeneca ۆاكتسيناسىنىڭ باسقا پرەپاراتتار سياقتى ءتيىمدى ەكەنى تۋرالى دەرەك جوق، سول سەبەپتى جاپپاي يممۋنيتەت قالىپتاسپاۋى مۇمكىن. ميللەر پرەپاراتتى قولدانۋعا اسىقپاۋعا شاقىردى. ونىڭ تۇسىندىرۋىنشە، ا ق ش جانە ۇلىبريتانيامەن سالىستىرعاندا اۋستراليا پاندەميا جاعدايىن باقىلاۋدا ۇستاپ وتىر. حالىقتىڭ ءۇمىتىن اقتاپ، ەلدى ەڭ ءتيىمدى ۆاكتسينامەن قامتاماسىز ەتۋ ءۇشىن ۆاكسينالاۋ پروتسەسىن ۋاقىتشا توقتاتا تۇرۋعا مۇمكىندىگى بار. دەگەنمەن اۋستراليا بيلىگى وكسفورد ۋنيۆەرسيتەتى مەن AstraZeneca كومپانياسىنىڭ ۆاكتسيناسى ۆيرۋستان قورعايتىنىنا سەنىمدى جانە جوسپارىن وزگەرتپەيتىنىن ايتتى.
«AstraZeneca ۆاكتسيناسى ءتيىمدى، قاۋىپسىز جانە ساپاسى جوعارى» ، - دەدى اۋستراليانىڭ باس سانيتاريا دارىگەرى پول كەللي.
اۋستراليا 54 ميلليون AstraZeneca ۆاكتسيناسىن ساتىپ العان. ايتا كەتسەك، سىناق كەزىندە قاتەلىك كەتكەنى تۋرالى مالىمەت پايدا بولعاننان كەيىن پرەپاراتقا دەگەن سەنىم ازايدى: ەرىكتىلەردىڭ ءبىر بولىگى حاتتامادا كورسەتىلگەندەي ەكى بىردەي دوزا ەمەس، ءبىر جارىم ەكپە العان جانە الدىن الا مالىمەت بويىنشا سولاردىڭ ەكپەسى تيىمدىرەك بولعان. حاتتامادا كورسەتىلگەن ەكى دوزا ۆيرۋستان %62 دەيىن قورعاي الادى، بۇل Pfizer جانە Moderna (تيىمدىلىگى %90- دان جوعارى) پرەپاراتتارىمەن سالىستىرعاندا ايتارلىقتاي تومەن.