نۇر- سۇلتان «قىزىل» ايماققا كىرۋدىڭ الدىندا تۇر - باس سانيتار

نۇر- سۇلتان. قازاقپارات - ەلوردا «سارى» مەن «قىزىل» ايماقتاردىڭ تۇيىسكەن تۇسىنا كەلدى. قازىرگى ۋاقىتتا «قىزىل» ايماققا ءوتىپ كەتۋدىڭ الدىندا تۇر.

بۇل تۋرالى قالانىڭ باس سانيتار دارىگەرى سارحات بەيسەنوۆا مالىمدەدى، دەپ حابارلايدى قازاقپارات.

قالالىق اكىمدىكتىڭ مالىمەتىنە سەنسەك، سوڭعى كۇندەرى COVID-19 ينفەكتسياسىن جۇقتىرۋشىلار سانى 100 ادامنان اسىپ جىعىلاتىنى بەلگىلى.

«ءبىرىنشى كەزەكتە، بۇل تاۋلىگىنە تاپسىرىلاتىن تەست سانىنىڭ ارتۋىنا بايلانىستى. ەگەر بۇرىن 2-2,5 مىڭ ادام تاپسىرسا، قازىر تاۋلىگىنە 4,5 مىڭعا دەيىن جەتەدى. سونىمەن قاتار، جاڭاجىلدىق مەرەكەلەردەن كەيىن ينكۋباتسيالىق كەزەڭ وتەدى. ياعني، سانيتارلىق نورمالاردى ەلەمەگەن ادامدار بار. ەندى باعىتتى تۇزەپ، كوروناۆيرۋستىڭ تارالۋىن ازايتۋ كەرەك. بۇعان بىزگە كارانتيندىك شەكتەۋ شارالارى ايتارلىقتاي كومەكتەسەدى. قازىر قوسىمشا كارانتيندىك شارالار ەنگىزۋ تۋرالى جاڭا قاۋلى دايىنداپ جاتىرمىز. بۇل قالانىڭ ءارتۇرلى اۋداندارىندا كوروناۆيرۋستىڭ تارالۋ وشاقتارىن وقشاۋلاۋعا كومەكتەسەدى»، - دەيدى قالانىڭ باس سانيتار دارىگەرى سارحات بەيسەنوۆا.

قالانىڭ سانيتار دارىگەرى سانيتارلىق نورمالاردى قاتاڭ ساقتاۋ قاجەتتىگىن، وسى عانا بۇكىل اعزانىڭ جۇمىسىنا تەرىس اسەر ەتەتىن اۋرۋعا قارسى پاناتسەيا سانالاتىنىن اتاپ ءوتتى.

«كوروناۆيرۋس ادامنىڭ ەڭ ءالسىز مۇشەلەرىنە اسەر ەتەدى. بۇل اسىرەسە ارتەريالاردا، تامىرلاردا جانە وكپەدە قان ۇيىعىشتاردىڭ (تورمب) پايدا بولۋىنا اكەلەدى. سوندىقتان ءوز دەنساۋلىعىڭىزدى دا، جاقىندارىڭىز بەن اينالاڭىزداعى ادامداردىڭ دەنساۋلىعىن دا ويلاۋ كەرەك»، - دەدى سارحات بەيسەنوۆا.