تۇركىستان وبلىسى بيزنەس جۇرگىزۋدەن كوش باستاپ تۇر
وندا قازاقستان 190 مەملەكەتتىڭ اراسىندا 25-ورىندا تۇر، دەپ حابارلايدى تۇركىستان وبلىسى اكىمىنىڭ باسپا ءسوز قىزمەتى.
كاسىپكەرلىك بەلسەندىلىكتىڭ جاي-كۇيى تۋرالى ەلىمىزدىڭ وبلىستارى مەن مەگاپوليستارى اراسىندا سۋب-رەيتينگ جۇرگىزىلىپ، تۇركىستان وبلىسى بيزنەس جۇرگىزۋ ءۇشىن ەڭ ۇزدىك ءوڭىر بولىپ تانىلدى.
بۇل رەيتينگتە قازاقستان 10 كريتەري بويىنشا باعالانادى. وڭىرلەرگە رەتتەۋشى كليمات، ينفراقۇرىلىم، بيزنەس ءۇشىن قارجىنىڭ قولجەتىمدىلىگى، ادامي كاپيتال جانە قابىلداناتىن شەشىمدەردىڭ ترانسپارەنتتىلىگى سياقتى 5 فاكتور بويىنشا باعا بەرىلەدى.
«ايتا كەتەيىن، وبلىس اكىمى ءومىرزاق شوكەيەۆتىڭ بيزنەس كليماتتى جاقسارتۋ اياسىنداعى تاپسىرمالارىنا سايكەس وڭىردە اۋقىمدى جۇمىس جۇرگىزىلىپ، تۇركىستان وبلىسى جوعارى كورسەتكىشكە يە بولىپ وتىر. بۇل بيزنەس سالاسىن جاقسارتۋ اياسىندا ەڭبەكتەنىپ جۇرگەن ءار ازاماتتىڭ، سونىمەن قاتار وتاندىق ءونىم شىعارىپ، حالىقتى جۇمىسپەن قامتىپ وتىرعان ءاربىر كاسىپكەردىڭ جەتىستىگى ەكەنىن ايتا كەتۋ ماڭىزدى. ارينە، ادال اتقارىلعان ەڭبەك ەلەنبەي قالمايدى. وبلىسىمىزدىڭ ۇزدىك اتالۋى ءار قايسىمىزدى ىنتالاندىرىپ، بۇدان دا بيىك بەلەستەردى باعىندىرۋعا باستارى ءسوزسىز»، - دەيدى تۇركىستان وبلىسى اكىمىنىڭ ورىنباسارى مەيىرجان مىرزاليەۆ.
The World Bank Doing Business - بۇل دۇنيەجۇزىلىك بانك توبى دامۋدىڭ بارلىق نەگىزگى سالالارىندا جۇمىس ىستەيدى. ولار قارجى ونىمدەرىنىڭ كەڭ اۋقىمىن جانە تەحنيكالىق كومەكتى ۇسىنادى، سونداي-اق ەلدەرگە يننوۆاتسيالىق بىلىمدەرمەن جانە ولاردىڭ الدىندا تۇرعان پروبلەمالاردى شەشۋمەن بولىسۋگە جانە قولدانۋعا كومەكتەسەدى.
تۇركىستان وبلىسىندا 150 مىڭعا جۋىق كاسىپكەر تىركەلگەن.
«قاراپايىم زاتتار ەكونوميكاسى» باعدارلاماسى بويىنشا 246 جوبا 24,4 ميلليارد تەڭگەگە قارجىلاندىرىلعان. ال، 29 جوبا 5 ميلليارد تەڭگەگە ماقۇلدانسا، 27 جوبانى 6,1 ميلليارد تەڭگەگە قارجىلاندىرۋ قارالۋدا.
سانى بويىنشا اۋىل شارۋاشىلىق سالاسىندا %77,4، تاماق ونەركاسىبى جانە قىزمەت كورسەتۋ سالالارى بەلسەندى. 17 اۋىل شارۋاشىلىعى، ەكى تۋريزم جانە ءۇش تاماق ونەركاسىبى سالاسىنداعى جوبالار ىسكە اسىرىلۋدا.