قازاقستاندا كارانتين تالاپتارى كۇشەيتىلۋى مۇمكىن

نۇر- سۇلتان. قازاقپارات – ق ر دەنساۋلىق ساقتاۋ ۆيتسە- ءمينيسترى - باس مەملەكەتتىك سانيتار دارىگەر ەرلان قياسوۆ ەل تۇرعىندارىنا ۇندەۋ جاساپ، كارانتيندىك شارالار كۇشەيتىلۋى مۇمكىن ەكەنىن مالىمدەدى، دەپ حابارلايدى قازاقپارات ءتىلشىسى.

ونىڭ ايتۋىنشا، سوڭعى ايدا قازاقستاننىڭ بىرنەشە وڭىرىندە COVID-19 ناۋقاستارى كوبەيدى. ق ر «جاسىل» ايماقتان «سارى» ايماققا اۋىستى.

«سوڭعى ايدا اتىراۋ وبلىسىندا ناۋقاستاردىڭ 3,7 ەسەگە ءوسۋى بايقالادى. الماتى وبىلسىندا - 1,8 ەسەگە، قاراعاندى وبلىسى مەن الماتى قالاسىندا - 1,5 ەسەگە وسكەن. ماڭعىستاۋ وبلىسىندا - ناۋقاستار سانى 81 دەن 315 جاعدايعا دەيىن، تۇركىستان وبلىسىندا – 102 دەن 256 جاعدايعا دەيىن، شىمكەنت قالاسىندا 150 دەن 195 جاعدايعا دەيىن، قىزىلوردا وبلىسىندا 48 دەن 135 جاعدايعا دەيىن ءوسۋ بايقالادى. قالىپتاسقان ەپيدەميولوگيالىق جاعداي ەسكەرە وتىرىپ، بۇگىنگى كۇنى حالىقتىڭ كوپ جينالۋىن ازايتۋعا باعىتتالعان كارانتيندىك شارالاردى كۇشەيتۋ قاراستىرىلىپ جاتىر»، - دەدى ەرلان قياسوۆ ورتالىق كوممۋنيكاتسيالار قىزمەتىندە وتكەن بريفينگتە.

سونىمەن بىرگە، باس سانيتارلىق دارىگەر قازاقستاندىقتارعا ۇندەۋ جاسادى.

«ازاماتتاردىڭ ساقتىق شارالارىنا نەمقۇرايلى قاراۋىنىڭ سالدارىنان ەلىمىزدە ەپيدەميولوگيالىق جاعداي ناشارلادى. سوندىقتان، قوناققا بارماۋعا جانە قوناققا شاقىرماۋعا، جەكە گيگيەنا جانە رەسپيراتورلىق گيگيەنا ەرەجەلەرىن ساقتاۋعا، قوعامدىق ورىنداردا الەۋمەتتىك اراقاشىقتىقتى ساقتاۋعا، مەديتسينالىق ماسكا تاعۋعا، انتيسەپتيكتەر قولدانۋعا شاقىرامىن»، - دەدى ەرلان قياسوۆ.