جاپونيادا توتەنشە جاعداي رەجيمى ەل تۇرعىندارىنىڭ جارتىسىنان كوبىن قامتىدى

توكيو. قازاقپارات - جاپونيا ۇكىمەتى كوروناۆيرۋستىڭ تارالۋىنا بايلانىستى توتەنشە جاعداي رەجيمى ەنگىزىلگەن ايماقتى كەڭەيتىپ، وعان ەلدىڭ ءتۇرلى اۋداندارىنداعى تاعى جەتى پرەفەكتۋرانى قوستى، دەپ حابارلايدى قازاقپارات.

بۇل تۋرالى سارسەنبىدە ينفەكتسيانىڭ تارالۋىنا قارسى كۇرەس جونىندەگى ۇكىمەتتىك شتابتىڭ وتىرىسىندا جاپونيانىڭ پرەمەر- ءمينيسترى ەسيحيدە سۋگا مالىمدەدى. ەندى «قاۋىپتى ايماق» تىزىمىنە ەلدىڭ باتىسىنداعى وساكا، حەگو، كيوتو، ورتالىقتاعى گيفۋ جانە ايتي، وڭتۇستىك- باتىستاعى فۋكۋوكا، سونداي- اق باتىس ايماقتاعى توتيگي پرەفەكتۋرالارى كىردى. بۇل جەرلەردە شەكتەۋ 7-اقپانعا دەيىن ەنگىزىلگەن.

«ءبىز ەلدىڭ ءبىرقاتار اۋداندارىندا كوروناۆيرۋس جۇقتىرۋ سانىنىڭ كوپتىگىنە بايلانىستى قاتتى الاڭداپ وتىرمىز. وسىعان وراي، سونداي- اق ساراپشىلارمەن كەڭەس جۇرگىزۋ قورىتىندىلارى بويىنشا ت ج رەجيمىنىڭ ايماعىن كەڭەيتۋ شەشىمى قابىلداندى»، - دەدى سۋگا NHK تەلەارناسى ترانسلياتسيالاعان وتىرىس كەزىندە.

جاپونيادا 47 پرەفەكتۋرانىڭ 12سىندە ت ج رەجيمى ەنگىزىلگەن، وعان ۇلكەن توكيونىڭ اۋماعى دا كىرىپ وتىر. وسى ايماقتاردا شامامەن 73 ميلليون ادام تۇرىپ جاتىر، بۇل ەل تۇرعىندارىنىڭ جارتىسىنان استامىن قۇرايدى.