قازاقستاندا اۋانى لاستايتىن كولىكتەرگە ايىپپۇل ارتادى

نۇر-سۇلتان. قازاقپارات - قازاقستاندا جاڭا ەكولوگيالىق كودەكستىڭ قابىلدانۋىنا بايلانىستى اۋاعا نورمادان ارتىق لاستاۋشى زاتتار شىعاراتىن اۆتوكولىكتەرگە ايىپپۇل مولشەرى ارتادى، دەپ حابارلايدى قازاقپارات.

بۇل كودەكس «لاستاۋشى تولەيدى» پرينتسيپىنە سايكەس كەلەدى. ق ر اكىمشىلىك قۇقىق بۇزۋشىلىق تۋرالى كودەكسىنە (334- باپ) ەنگىزىلگەن وزگەرىستەرگە سايكەس، شىعارىندىلارداعى لاستاۋشى زاتتاردىڭ مولشەرى بەلگىلەنگەن نورماتيۆتەردەن اسسا، جەكە كولىك يەسى 10 ا ە ك، زاڭدى تۇلعالار 100 ايلىق ەسەپتىك كورسەتكىش مولشەرىندە ايىپپۇل تولەيدى.

ال بۇزۋشىلىق ءبىر جىل ىشىندە قايتالانسا - جەكە تۇلعالارعا 20، زاڭدى تۇلعالارعا 200 ا ە ك ايىپپۇل سالىنادى.

جاڭا نورما شىلدە ايىندا كۇشىنە ەنەدى. ال ازىرگە قولدانىستاعى زاڭناماعا سايكەس جەكە تۇلعالارعا ەسكەرتۋ جاسالادى نەمەسە - 2، قايتالانعان جاعدايدا 5 ا ە ك كولەمىندە عانا ايىپپۇل جازىلادى.

2021-جىلدىڭ 1- قاڭتارىنان قازاقستاندا 1 ا ە ك - 2917 تەڭگەنى قۇرايدى.

«سونىمەن بىرگە وڭىرلەردىڭ ەكولوگيالىق پروبلەمالارىن كەشەندى شەشۋ بويىنشا جول كارتالارى قابىلدانعانىن، اتالعان قۇجاتتاردا اۆتوكولىك شىعارىندىلارىن ازايتۋ باعىتىندا اتقارىلاتىن ءىس-شارالار دا قاراستىرىلعانىن اتاپ وتكىمىز كەلەدى. مىسالى، نۇر-سۇلتان قالاسىنىڭ جول كارتاسىنا سايكەس، تەحنيكالىق بايقاۋ ورتالىقتارىنا قويىلاتىن تالاپتار قاتاڭداتىلادى. بۇرىن تەحبايقاۋ پۋنكتەرىن اشقىسى كەلەتىن كاسىپكەر ول تۋرالى تەك حابارلاۋعا ءتيىس بولسا، ەندى ارنايى رۇقسات الۋى قاجەت. مۇنداي ورتالىقتارعا ءبىرىڭعاي باعدارلامالىق قامتاماسىز ەتۋ دە ەنگىزىلەدى. ساقتاندىرۋ ءپوليسىن الۋ كەزىندە تەحنيكالىق بايقاۋدان ءوتۋ مىندەتتەمەسى جۇكتەلەدى. سونىمەن قاتار تەحبايقاۋ وپەراتورىنىڭ قىزمەتىن توقتاتا وتىرىپ، مىندەتتى تەحنيكالىق بايقاۋدى ۇيىمداستىرۋ جانە وتكىزۋ قاعيدالارىن بۇزعانى ءۇشىن اكىمشىلىك ايىپپۇلداردى ۇلعايتۋ دا قاراستىرىلعان»، - دەدى ەكولوگيا مينيسترلىگىنەن.

ايتا كەتەيىك، ەلىمىزدە ەكولوگيالىق تالاپتارعا سايكەس كەلمەيتىن اۆتوكولىكتەر تەحبايقاۋ كەزىندە، ەكولوگيا دەپارتامەنتتەرى ىشكى ىستەر باسقارماسىنىڭ نەمەسە كولىكتىك باقىلاۋ ورگاندارىنىڭ بىرلەسكەن رەيدتەرى بارىسىندا، كاسىپورىندارعا جۇرگىزىلەتىن پروفيلاكتيكالىق تەكسەرۋ كەزىندە انىقتالادى. اۆتوكولىكتەن شىعاتىن لاستاۋشى زاتتار نورماتيۆتەرىنىڭ ساقتالۋىن ەكولوگيا دەپارتامەنتتەرى گازتالداعىش «اۆتوتەست»، «مەتا-01» جانە وزگە دە ولشەۋ قۇرالدارى ارقىلى تەكسەرەدى.

ەسكە سالايىق، 2021-جىلدىڭ 2- قاڭتارىندا مەملەكەت باسشىسى قاسىم-جومارت توقايەۆ قازاقستان رەسپۋبليكاسىنىڭ جاڭا ەكولوگيالىق كودەكسىنە قول قويدى.