كارانتين: اقمولا وبلىسىندا كەزەكتى قاۋلى شىقتى

None
None
كوكشەتاۋ. قازاقپارات - اقمولا وبلىسىندا جۇمىس كۇندەرى فيتنەس-ورتالىقتارى، ترەناجەر زالدارى مەن سپورت ساۋىقتىرۋ ورتالىقتارىنىڭ قىزمەتىنە رۇقسات بەرىلدى.

وبلىستىڭ باس مەملەكەتتىك سانيتارلىق دارىگەرى جاڭا قاۋلى شىعاردى، دەپ حابارلايدى قازاقپارات ءتىلشىسى.

قاۋلىعا سايكەس كوپشىلىك جينالاتىن سالتاناتتى، وتباسىلىق، ەستەلىك، ۇجىمدىق جانە باسقا دا ءىس-شارالاردى وتكىزبەي، جۇمىس ءتارتىبى ساعات 9:00 دەن 20:00 گە دەيىن، كەلۋشىلەردىڭ سانى 50 پايىزعا دەيىن، ءبىراق وتىراتىن ورىن 30 دان ارتىق ەمەس، ۇستەل اراسىنداعى قاشىقتىق 2 مەتردەن كەم ەمەس جانە كەلۋشىلەر اراسىندا 1 مەتردەن كەم ەمەس قاشىقتىقتى ساقتاعان جاعدايدا قوعامدىق تاماقتاندىرۋ وبەكتىلەرىنىڭ قىزمەتىنە رۇقسات بەرىلدى.

«سەنبى جانە جەكسەنبى كۇندەرى قىزمەتىن توقتاتا وتىرىپ، جۇمىس كۇندەرى الدىن الا جازىلۋ بويىنشا كەلۋشىلەردىڭ سانىن 50 پايىزدان اسىرماي جانە ءبىر ادامعا 5 شارشى مەتردەن كەم ەمەس ورىندى قامتاماسىز ەتىپ، فيتنەس-ورتالىقتارى، ترەناجەر زالدارى مەن سپورت ساۋىقتىرۋ ورتالىقتارىنىڭ قىزمەتىنە رۇقسات بەرىلدى. سونىمەن بىرگە، دەمالىس كۇندەرىن قوسپاعاندا ساعات 8 دەن ساعات 24 گە دەيىن، كەلۋشىلەردىڭ سانىن 50 پايىزدان اسىرماي جانە ءبىر ادامعا 4 شارشى مەتردەن كەم ەمەس ورىن بولعان جاعدايدا ساۋنا، سپا ورتالىقتارى دا جۇمىس ىستەيدى»، - دەلىنگەن قاۋلىدا.

بۇدان بولەك، مەملەكەتتىك ورگانداردىڭ (ۇيىمدار، كاسىپورىندار)، كۆازيمەملەكەتتىك سەكتور ورگاندارىنىڭ، ۇلتتىق كامپانيالاردىڭ، وزگە دە ۇيىمداردىڭ، سونداي-اق كاسىپكەرلىك سۋبەكتىلەرىنىڭ قىزمەتىنە رۇقسات بەرىلىپ وتىر.

بۇل رەتتە، COVID-19 تارالۋى مەن الدىن الۋ جونىندەگى ءىس-شارالارعا قاتىساتىن ۇيىمداردان جانە تىرشىلىكتى قامتاماسىز ەتەتىن كاسىپورىنداردان، قۇقىق قورعاۋ ورگاندارىنىڭ قىزمەتكەرلەرىنەن جانە توتەنشە جاعدايلار قىزمەتىنىڭ قىزمەتكەرلەرىنەن باسقا؛ شتاتتىق كەستەدە 15 جانە ودان ارتىق قىزمەتكەر بولعاندا، قىزمەتكەرلەردىڭ كەمىندە 80 پايىزى قاشىقتىقتان جۇمىس اتقارادى.

ازىق-تۇلىك ەمەس جانە ازىق-تۇلىك جابىق بازارلارى (بازار ۇلگىسىندەگى ساۋدا ۇيلەرى، ساۋدا ورتالىقتارى، پاۆيلون، دۇكەن جانە ت. ب.) كەلۋشىلەردىڭ سانىن 30 پايىزدان اسىرماي جانە ءبىر كەلۋشىگە كەمىندە 4 شارشى مەتر ورىن ساقتاي وتىرىپ بەس كۇن جۇمىس ىستەپ، سەنبى جانە جەكسەنبى كۇندەرى جابىلادى.

الاڭى 2000 شارشى مەتردەن استام ساۋدا ويىن-ساۋىق ورتالىقتارى، ساۋدا ۇيلەرى، ساۋدا ورتالىقتارىنىڭ جۇمىس كەستەسى جۇمىس كۇندەرى ساعات 10.00 دەن 22.00 گە دەيىن انىقتالىپ وتىر. ال، بالالار ويىن الاڭى مەن اتتراكتسيون قىزمەتىنە تىيىم سالىندى.

سوڭعى جاڭالىقتار