باس بانكير قازاقستاندىقتاردىڭ بانكتەرگە قارىزى قانشا ەكەنىن ايتتى
بۇل تۋرالى ۇكىمەت وتىرىسىندا ق ر ۇلتتىق بانكى ءتوراعاسى ەربولات دوسايەۆ ايتتى، دەپ حابارلايدى قازاقپارات ءتىلشىسى.
«2020 -جىلدىڭ باسىنان باستاپ حالىقتىڭ كرەديتتەرى 7,36 تريلليون تەڭگەگە دەيىن 10,5 پايىزعا ۇلعايدى. ولاردىڭ قۇرىلىمىندا تۇتىنۋشىلىق قارىزدار 4,3 تريلليون تەڭگەگە دەيىن، ياعني 3,2 پايىزعا، مەملەكەتتىك باعدارلامالاردى ىسكە اسىرۋ ەسەبىنەن يپوتەكالىق قارىزدار - 2,3 تريلليون تەڭگەگە دەيىن، 27,8 پايىزعا ءوستى»، - دەدى ەربولات دوسايەۆ.
سونىمەن قاتار ول ەكونوميكاعا كرەديتتەر 2020 -جىلدىڭ باسىنان بەرى ۇزاق مەرزىمدى نەسيەلەردىڭ ءوسۋى ناتيجەسىندە 2020 -جىلعى قاراشانىڭ سوڭىندا 14,65 تريلليون تەڭگەگە دەيىن، ياعني 5,6 پايىزعا، قىسقا مەرزىمدى كرەديتتەر 2,1 تريلليون تەڭگەگە دەيىن، ياعني 3,0 پايىزعا نەمەسە 60,5 ميلليارد تەڭگەگە ۇلعايعانىن ايتتى.
«بيزنەستىڭ كرەديتتىك پورتفەلى 2020 -جىلدىڭ باسىنان بەرى 7,29 تريلليون تەڭگەگە دەيىن، 1,2 پايىزعا ارتتى. بيزنەستىڭ تەڭگەمەن كرەديتتەرى بويىنشا مولشەرلەمەسى 2020 -جىلعى قاراشادا 11,9, ونىڭ ىشىندە قىسقا مەرزىمدى كرەديتتەر بويىنشا - 11,6، ۇزاق مەرزىمدى كرەديتتەر بويىنشا 13,1 پايىز بولدى»، - دەدى ۇ ب ءتوراعاسى.
اۆتور: مارلان جيەمباي