تۇلپار ءمىنىپ، تۋ العان جىگىتتەردىڭ «مەنىڭ تۋىم - مەنىڭ وتانىم!» اكسياسى جالعاسۋدا - ۆيدەو
اتقا قونىپ، تۋ ۇستاعان جىگىتتەردىڭ ساپ تۇزەپ وتكەنى، ۇرانداتقانى بار، رۋح بەرەتىن اندەر شىرقالعان بەينەروليكتەر الەۋمەتتىك جەلىنى شارلاپ كەتتى. بۇل – سولتۇستىك قازاقستاندىق جىگىتتەردىڭ بىرەر اپتا بۇرىن باستاپ كەتكەن چەللەندجى. العاشقى ءىس-شارا تايىنشا اۋدانىنىڭ قاراعاش اۋىلىندا وتكەن ەكەن.
«پاتريوتتىق ءتالىم- تاربيەسى وتە زور چەللەندج- شەرۋدىڭ قاسيەتتى قىزىلجار جەرىنەن باستالۋىنىڭ وزىندىك ءمانى بار. وسى وبلىستا بوتاي قونىسى ورنالاسقان. وندا وسىدان 4 مىڭ عاسىر بۇرىن جىلقى مالى قولعا ۇيرەتىلگەن. ءسويتىپ بابالارىمىزدىڭ ومىرلىك سەرىگىنە، جاۋدان ەلدى، جەردى قورعاۋ قۇرالىنا اينالعان. سوندىقتان وسى اكتسيانى تۇياعىمەن جەر تارپىعان، اۋىزدىعىمەن الىسقان سايگۇلىكتەرگە قيقۋ قوسا، كوك بايراعىمىزدى جەلبىرەتە بارلىق ەلدى مەكەندەردە ۇيىمداستىرۋ - بيىل اتاپ وتىلەتىن ەل تاۋەلسىزدىگىنىڭ 30 جىلدىعى قۇرمەتىنە ارنالعان سىي بولسا، باستى ءمانى ءبىرتۇتاس قازاق ەلىن بولشەكتەۋدى كوزدەيتىن ىشكى- سىرتقى سەپاراتيستىك، شوۆينيستىك كۇشتەر مەن توپتارعا دەگەن قارسىلىق اكتسياسى، قازاق ۇلتى ءاماندا بىرگە دەگەن ۇعىمدى بىلدىرەدى»، - دەيدى س ق و تۇرعىنى، مادەنيەت قايراتكەرى، بەلگىلى جۋرناليست ءومىر ەسقالي. چەللەندج قازىر ءوڭىردىڭ ءار اۋدانىندا، ءار اۋىلىندا ءوتىپ جاتىر. ايىرتاۋ اۋدانىنىڭ اقان سەرى، كازانكا، كاراسيەۆكا ەلدى مەكەندەرىندە ۇيىمداستىرىلدى. قالعاندارى دايىنالىپ جاتىر. «قازاقستان جاستارىنىڭ پاتريوتتىق رۋحىن وياتۋ ءۇشىن جانە قازاقستان تاۋەلسىزدىگىنىڭ 30 جىلدىعىنا وراي باستالعان ءىس- شاراعا ات سالىسىپ جاتىرمىز. «مەنىڭ تۋىم - مەنىڭ وتانىم!» اتتى چەللەندج ءبىزدىڭ اقان سەرى اۋىلىندا دا جالعاسىن تاپتى. اتا- بابامىزدىڭ قانىمەن، اق نايزانىڭ ۇشىمەن، اق بىلەكتىڭ كۇشىمەن بىزگە مۇرا بولىپ قالعان كەڭ- بايتاق جەرىمىزدى قادىرلەيمىز، قورعايمىز»، - دەيدى اۋىل تۇرعىنى نۇرلان راقىمجانوۆ.
ءىس- شارا كورشى اقمولا وبلىسىندا دا قولداۋ تاپتى. قوياندى اۋىلىندا 20 شاقتى ادام اتقا قونىپ، تۋ كوتەرىپ شەرۋدى باستاسا، ولاردىڭ سوڭىنان جۇزدەگەن كولىك ىلەستى.
«ءاۋ باستىعى وي قادىر- قاسيەتىن تۇسىرمەي، ناۋقانشىلدىققا سالىنباي، ءدامىن كەتىرمەي س ق و- نىڭ 13 اۋدانىندا جوعارى دەڭگەيدە وتكىزىپ، قازىرگى پەتروپاۆل قالاسىندا تۇيىندەۋ ەدى. پرەزيدەنتىمىز قاسىم- جومارت توقايەۆتىڭ «تاۋەلسىزدىك بارىنەن قىمبات» ماقالاسى بۇل چەللەندجدىڭ وزەگى بولۋى ءتيىس. ياعني بۇل اكسيانىڭ ءمان- ماعىناسى، ءتالىم- تاربيەسى بولۋى قاجەت. قازىر كوپ اۋىلداردا بىركەلكى ەتىپ وتكىزىپ جاتىر، مەنىڭشە بۇل دۇرىس ەمەس، تۇرلەندىرۋ كەرەك، باتىرلارشا كيىنىپ، ساحنالىق كورىنىستەر بولعانى دۇرىس. اۋزى دۋالى قارتتار ءسوز سويلەسە. سونداي- اق بەينەروليكتەردەن كورىپ ءجۇرمىن، كولىكتەر سيگنال بەرەدى. ونىڭ ورنىنا مىقتى، رۋحتى اندەردى دىبىس ۇلعايتقىشپەن بەرسە»، - دەيدى ءومىر ەسقالي.