مارات جىلانبايەۆ - جەلمەن جارىسقان جەلاياق

None
None
نۇر-سۇلتان. قازاقپارات - دۇنيەنىڭ ءتورت بۇرىشىن اۋزىنا قاراتىپ، تالاي دودادا قورجىنعا سان جۇلدە سالعان سپورتشىلارىمىز از ەمەس.

دەگەنمەن سولاردىڭ ىشىندە جەلاياق مارات جىلانبايەۆتىڭ ورنى بولەك. جەر جاھاننىڭ تۇكپىر- تۇكپىرىن جۇگىرىپ وتكەن، قايتالانباس رەكوردتار ورناتقان جەلاياق سپورتشىمىز تالاي ەرلىگىمەن الەمدى مويىنداتقان.

مارات جىلانبايەۆ 1963-جىلى ءساۋىر ايىنىڭ 19 جۇلدىزىندا قاراعاندى وبلىسى، فرۋنزە سوۆحوزىندا دۇنيەگە كەلگەن. اتا-اناسىنان ەرتە ايىرىلىپ، بالالار ۇيىندە تاربيە الدى. بالا ماراتقا دارىگەرلەر جۇگىرۋگە بولمايتىنىن ەسكەرتسە دە، ول بويىنداعى كۇش-قۋاتىن جيناپ، بىرنەشە جىل بويى توقتاماي جاتتىقتى. جەلاياق ءوزى ويلاپ تاپقان ادىستەر بويىنشا دايىندالادى. ول ادەتتەگىدەي اپتاسىنا 65-70 شاقىرىم ەمەس، كۇنىنە 70-80 شاقىرىم جۇگىرىپ وتىرعان. وسىلايشا مارات جىلانبايەۆ كۇنىنە 5 شاقىرىمنان ارتتىرىپ وتىرىپ، ناتيجەلى كورسەتكىشكە ءبىر-اق جىلدا جەتكەن.

قازاق توپىراعاندا تۋىپ، وسى توپىراقتا ءتاي-ءتاي قادام باسقان مارات جىلانبايەۆ «گيننەستىڭ رەكوردتار كىتابىنا» جەتى رەت ەنگەن الەمدەگى جالعىز مارافونشى. جەر شارىنداعى ەڭ ءىرى شولدەردى جۇگىرىپ ءوتۋ بويىنشا ونىمەن تەڭەسەتىن مارافونشى ءالى شىققان جوق.

مارات جىلانبايەۆ 1990-1991-جىلدار اراسىندا 226 كلاسسيكالىق مارافونعا قاتىسقان. سونىمەن بىرگە، سول جىلى ناۋرىزدا 23 كۇندە 23 مارافون وتكەرگەن. 1991-جىلدىڭ جازىندا 15 كۇندە 30 مارافونعا قاتىسىپ، كەلەر جىلى ازيا قۇرلىعىنىڭ ەڭ ۇزىن ءشولى قاراقۇمدى، 1993-جىلى افريكا قۇرلىعىنىڭ الپاۋىتى ساحارانى باعىندىرعان. وسى جىلى اۋسترالياداعى ۇلكەن ۆيكتوريا ءشولىن جالعىز ءوزى جۇگىرىپ ءوتتى. 1994-جىلى امەريكاداعى نيەۆادا ءشولىن باعىندىرىپ، «گيننەستىڭ رەكوردتار كىتابىنىڭ» ارنايى القاسىن جەتى رەت موينىنا تاققان.

گيننەستىڭ رەكوردتار كىتابىنا ەنگەن 7 كورسەتكىشى:

- ءبىر جىلدا 42 شاقىرىم 195 مەتر بولاتىن 226 كلاسسيكالىق مارافوندى جۇگىرىپ شىقتى؛

- 23 كۇندە 23 كلاسسيكالىق مارافون جۇگىردى؛

- 15 كۇندە 30 كلاسسيكالىق مارافوندى ورتاشا العاندا 4 ساعات 54 سەكۋندتا جۇگىرگەن. بۇل الەمدىك رەكوردتى ءالى كۇنگە ەشكىم جاڭارتا العان جوق.

- قاراقۇمدا 20 كۇندە 1200 شاقىرىم جۇگىرىپ ءوتتى. بۇل الەمدەگى مارافونشىلار اراسىنداعى ەڭ ۇزاق قاشىقتىق.

- ساحاراداعى ەڭ ۇزاق جۇگىرىس (1993-جىلعى 25- اقپان - 23- ناۋرىز، 24 كۇننىڭ ىشىندە 1700 شاقىرىم)؛

- ۇلكەن ۆيكتورياداعى ەڭ ۇزاق جۇگىرىس (1993-جىلعى 24- قاراشا - 15- جەلتوقسان، 22 كۇننىڭ ىشىندە 1600 شاقىرىم)؛

- نيەۆاداداعى ەڭ ۇزاق جۇگىرىس (1994-جىلعى 1- 19- ءساۋىر، 17 كۇننىڭ ىشىندە 1218 شاقىرىم) .

massaget.kz

سوڭعى جاڭالىقتار