موڭعول حالقىنىڭ رۋحىن كوتەرگەن ءۇش باتىر - شەتەلدەگى قازاق ءتىلدى ب ا ق- قا شولۋ

نۇر- سۇلتان. قازاقپارات - «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

قازىرگى زامانداعى موڭعول حالقىنىڭ رۋحىن كوتەرگەن ءۇش باتىر - KAZNEWS

ەل رۋحىن كوتەرىپ، حالقىنا قانات بىتىرگەن ازاماتتار ءار ەلدە بار. ال قازىرگى زاماندا موڭعول حالقىنىڭ ماقتانىشىنا اينالىپ، حالقىنىڭ رۋحىن كوتەرگەن ءۇش ازاماتتى ايتۋعا بولادى، دەپ جازادى موڭعوليالىق KAZNEWS اقپاراتتىق پورتالى.

اتالعان ب ا ق- تىڭ جازۋىنشا، سونداي ەل رۋحىن كوتەرگەن ازاماتتىڭ ءبىرى موڭعوليانىڭ تۇڭعىش عارىشكەرى، الەمنىڭ 101، ازيانىڭ ەكىنشى عارىشكەرى اتانعان جۇگدەردەميديين گۇرراگچاا ەكەن. 1981 -جىلى كەڭەس عارىشكەرى ۆلاديمير جانىبەكوۆ پەن موڭعولدىڭ قايسار ۇلى جۇگدەردەميديين گۇرراگچاا عارىشقا ۇشقان. ءبىر جەتى بويى اسپان كوگىن شارلاپ كەلگەن گۇرراگچااعا كەڭەس وداعىنىڭ باتىرى، موڭعول حالىق رەسپۋبليكاسىنىڭ باتىرى دەگەن اتاق جانە سۇحبااتار وردەنى، لەنين وردەنى بەرىلگەن. ەلىنىڭ تۇڭعىش عارىشكەرى، گەنەرال- مايور شەنىندە موڭعوليا اسكەري اۋە كۇشتەرىن باسقاردى جانە قورعانىس ءمينيسترى قىزمەتىن اتقاردى.

ەكىنشى ءبىر ەل ماقتانىشىنا اينالعان تۇلعاسى - دولگورسۇرەنگين داگۆادورج - اساشوريۋۇ اكينوري.

سۋمو كۇرەسى ءۇش عاسىرعا جۋىق ۋاقىت بويى تەك عانا جاپون بالۋاندارى كۇرەسەتىن سپورت ءتۇرى بولاتىن. سۋمو كۇرەسىنىڭ الەمدىك دەڭگەيگە تانىلۋى اساشوريۋۇگە تىكەلەي بايلانىستى. سۋمو كۇرەسىنە 1999 -جىلى اياق باسىپ، 11 جىل بويى جاپون بالۋاندارىن سان سوقتىرعان د. داگۆادورج اساشوريۋۇ اكينوري 22 جاسىندا سۋمو كۇرەسىنىڭ 68- يەكوزۋنا اتاعىن العان. سۋمو كۇرەسىنىڭ ەڭ جوعارعى ليگاسى ماكۇۇچيدە 25 رەت چەمپيون اتانىپ، جاپون يمپەراتورىنىڭ كۋبوگىنىڭ يەگەرى اتاندى.

باشيەدا 669 بەلدەسۋ وتكىزىپ، 596 بەلدەسۋىن جەڭىسپەن اياقتاعان. ال 2010 -جىلى 3 - قازاندا سپورتتىق مانسابىن اياقتاعان. دولگورسۇرەنگين داگۆادورجعا الەمدىك دەڭگەيدە ەلىنىڭ جاڭا يميدجىن قالىپتاستىرىپ، رۋحىن كوتەرگەنى ءۇشىن موڭعول ەلىنىڭ «ەڭبەك سىڭىرگەن سپورتشىسى»، «ەڭبەك ەرى» اتاعىمەن سىيلاعان.

ال ءۇشىنشى ءبىر جۇرت قادىرلەگەن ازامات دزيۋدوشى تۇۆشينبايار نايدان 2008 -جىلعى بەيجىڭ وليمپياداسىنىڭ التىن مەدال يەگەرى اتانىپ، موڭعوليانىڭ سپورت تاريحىنداعى العاشقى «وليمپيادا چەمپيونى» اتانعان بولاتىن. قاراپايىم مالشىنىڭ بالاسى ءتۇۆشينبايار حالىققا جاڭا ءۇمىت سىيلادى. وليمپيادا چەمپيونى اتانعان ساتتە موڭعول حالقىنان بوركىن اسپانعا اتپاعان ادام كەمدە- كەم ەدى. كەيىن، 2012 -جىلعى لوندون وليمپيالاسىنىڭ كۇمىس جۇلدەگەرى اتانىپ، بابىمەن باعى كەلىسكەن، سپورتتى جانىنا سەرىك ەتكەن سپورتشى ەكەندىگىن تاعى ءبىر دالەلدەگەن.

2008 -جىلى 25 - ماۋسىمدا موڭعوليا پرەزيدەنتىنىڭ جارلىعىمەن موڭعول ەلىنىڭ «ەڭبەك ەرى»، سۇحبااتار وردەنىمەن، «ەڭبەك سىڭىرگەن سپورتشى» اتاعىمەن سىيلانعان. 2017 -جىلى «شىڭعىس حان» وردەنىنىڭ يەگەرى اتانعان.

باسكەتبولدان قىتاي چەمپيوناتىندا ونەر كورسەتەتىن جاۋىنگەر قويشان ۇلى - قىتايدىڭ «ورتالىق حالىق راديوسى» (CNR)

قىتايدىڭ ەرلەر كوماندالارى اراسىنداعى ۇلتتىق ليگا ويىندارىندا (CBA) ونەر كورسەتەتىن جاۋىنگەر قويشان ۇلى وتكەن جىلعى سپورتتاعى جەتىستىكتەرى مەن بولاشاق جوسپارلارى تۋرالى سۇحبات بەردى، دەپ جازادى قىتايلىق kazakcnr.com سايتى.

اتالعان ب ا ق- تىڭ جازۋىنشا، قىتايدا تۇراتىن قانداسىمىز جاۋىنگەر قويشان ۇلى - 1995- جىلى قىتايدىڭ تارباعاتاي ايماعىنىڭ تولى اۋدانىندا تۋعان. جاۋىنگەر اۋىلىنا كەزدەيسوق كەلگەن جاتتىقتىرۋشى سپورت مامانىنىڭ كوزىنە ءتۇسىپ، تەك 18 جاسىنان باستاپ قانا كاسىبي سپورتپەن اينالىسا باستاعان. 21- تامىزدا فۋجياندا وتكەن 2020-2021- جىلدارداعى قىتايدىڭ ەرلەر كوماندالارى اراسىنداعى ۇلتتىق ليگاسى اياسىندا (CBA) وينايتىن ويىنشىلاردى تاڭداۋ جينالىسىندا جاۋىنگەر (بويى - 210 س م.، سالماعى - 107 كەلى) «نانكين تۇڭشي داشىڭ» كلۋبىنا قابىلدانىپ، CBA- عا قاتىسۋعا جولداما العان. CBA ليگاسى - قىتاي حالىق رەسپۋبليكاسىنداعى ەڭ جوعارى دەڭگەيدەگى باسكەتبول ويىنى بولىپ تابىلادى.

«مەن قازىرگى كۇنى نانكين قالاسىندا الاڭسىز جاتتىعۋمەن اينالىسىپ جاتىرمىن. باپكەرىم ماعان جاقسى كوڭىل بولەدى، كومانداداعى باسقا ويىنشىلارمەن دە دوستىق نيەتپەن ارالاسامىز. 23- قازان كۇنى «نانكين تۇڭشي داشىڭ» كلۋبىنداعى جانە CBA ليگاسىناداعى العاشقى جارىسىمدى وتكىزدىم. «شاندۋن» كومانداسىنا قارسى ويناعان وسى جارىستا ءوزىمدى جاقسى ناتيجەمەن كورسەتىپ، كوپشىلىكتىڭ قولداۋىنا يە بولدىم. باپكەرىم ماعان CBA ليگاسىندا ويناۋدىڭ وڭاي بولمايتىندىعىن ءتۇسىندىرىپ، جارىستىڭ قىر- سىرىن، ءادىس- ءتاسىلىن ۇيرەتكەن. مەن جارىستا باپكەرىمنىڭ ماعان تاپسىرعان مىندەتىن ورىنداپ، سەنىمىن اقتاپ، ۇيرەتكەن تاعىلىمىنىڭ جەمىسىن كوردىم دەپ ويلايمىن. وسى جولى بۇرىن تەلەارنالاردان عانا كورەتىن مىقتى ويىنشىلارمەن ءبىر الاڭعا شىعىپ الامانعا تۇسكەنىمە شابىتتاندىم جانە وزىمدەگى كەمشىلىكتەردى ءبىلىپ، قۇلشىنۋىم كەرەك ەكەنىن ءتۇسىندىم. مەنىڭ، بولاشاقتا ويىن ونەرىمدى بارىنشا كەمەلدەندىرىپ، بۇدان دا بيىك سپورتتىق الامانداردان كورىنىپ، تولاعاي تابىستارعا جەتسەم، ەلىمنىڭ، تۋعان حالقىمنىڭ ماقتانىشى بولسام دەگەن ماقساتىم بار!» ، - دەيدى باسكەتبولشى قانداسىمىز جاۋىنگەر قويشان ۇلى.

ءۇش مىڭ جىلدىق كىلەم توقۋ ءداستۇرى جاڭعىرتىلادى – TRT

ساكاريا قالالىق مۋنيتسيپاليتەتى ورتالىق ازيادان كوشىپ كەلگەن يورۇكتەر توقىعان ياگلىبەدير كىلەمىنىڭ ءوندىرىس جۇمىستارىن قايتا باستادى. ايماقتا ءداستۇرلى كىلەم توقۋ ءۇردىسىن بولاشاق ۇرپاققا جەتكىزۋ ماقساتىمەن جاڭا ناۋقان باستالدى، دەپ جازادى تۇركيا راديو تەلەۆيزيا پورتالى.

«ورتالىق ازيادان كوشىپ انادولىعا قونىس تەپكەن يورۇكتەردىڭ شامامەن ءۇش مىڭ جىلدىق كىلەمىنىڭ گەوگرافيالىق بەلگىسى سىندىرعى اۋداندىق مۋنيتسيپاليتەتىنىڭ مەنشىگىندە. بالىكەسيردىڭ سىندىرعى اۋدانىندا ياگلىبەدير كىلەمى توقىلىپ، قىزداردىڭ جاساۋىنا قويىلعان. توقۋ ءادىسى انادان قىزعا ءوتىپ وتىرعان. بۇل كىلەمدەر ادەت- عۇرىپتار مەن ءداستۇردى كورسەتەتىن ونەر تۋىندىسى دەپ ەسەپتەلەدى. كىلەمدەر تەك قويدىڭ جۇنىنەن توقىلادى جانە تابيعيلىعىمەن نازار اۋدارادى. ءبىر شارشى سانتيمەترىندە 35 ىلمەك بولعاندىقتان، مىقتى بولىپ كەلەدى. تابيعي تۇستەرمەن بويالعاندىقتان قانىق تۇستەرى كوپكە دەيىن توزبايدى»، دەپ جازادى TRT.

تاشكەنتتە «كينو اپتالىعى» وتەدى - ء«وزا» اقپاراتتىق اگەنتتىگى

2021 -جىلدىڭ 11-16 - قاڭتار ارالىعىندا تاشكەنتتەگى جاستاردىڭ شىعارماشىلىق سارايىندا «جاڭا وزبەكستان جانە ۇلتتىق كينەماتوگرافيا» ايلىعى اياسىندا «وزبەك ۇلتتىق كينوسىنىڭ اپتالىعى» وتەدى، دەپ جازادى «ءو ز ا» مەملەكەتتىك اقپاراتتىق اگەنتتىگى.

«اپتالىق اياسىندا جاڭا كينوجوبالاردىڭ تۇساۋكەسەرى، جاستارعا ارنالعان شەبەرلىك سىنىپتارى، كاستينگتەر مەن كونفەرەنتسيالار، سونداي- اق جاڭا فيلمدەردىڭ پرەمەرالارى وتپەك. «وزبەك كينو» ۇلتتىق اگەنتتىگىنىڭ اقپاراتى بويىنشا، كينو اپتالىقتا جاس كينورەجيسسەرلار ءۇشىن تاشكەنتتە بۇكىل رەسەيلىك مەملەكەتتىك كينەماتوگرافيا ينستيتۋتىنىڭ فيليالىن اشۋ، تاشكەنت حالىقارالىق كينوفەستيۆالىن قايتا ۇيىمداستىرۋ، شەت ەلدەردە ساقتالعان وزبەك فيلمدەرىن قايتارۋ، جاس رەجيسسەرلەرگە جاعداي مەن مۇمكىندىك جاساۋ سياقتى ماڭىزدى مىندەتتەر بويىنشا ساراپشى ماماندارمەن بىرگە وزبەك كينونىڭ 2021 -جىلعى «جول كارتاسى» قابىلداناتىن بولادى»، - «ءو ز ا» اقپاراتتىق اگەنتتىگى.

2021 -جىلى قازاقستاندا مۇناي ءوندىرىسى ارتادى - «فارس» اقپارات اگەنتتىگى

قازاقستان وپەك- كە مۇشە ەلدەر وتىرىسىندا 2021 -جىلى اقپان- ناۋرىز ايلارىندا مۇناي ءوندىرىسىن ارتتىرۋعا مىندەتتەمە الدى، دەپ جازادى «فارس» اقپارات اگەنتتىگى.

Fars اقپارات اگەنتتىگىنىڭ حابارلاۋىنشا، وپەك- كە مۇشە ەلدەر وتىرىسى ونلاين فورماتتا ءوتىپ، وندا قازاقستان 2021 -جىلى اقپان- ناۋرىز ايلارىندا كۇنىنە سايككەسىنشە 1,427 ميلليون جانە 1,437 ميلليون باررەل مۇناي وندىرەدى دەپ كەلىسىلدى. قازاقستان ەنەرگەتيكا ءمينيسترى نۇرلان نوعايەۆ وسى وتىرىستا: «وپەك- كە مۇشە ەلدەردىڭ ورتاق تالپىنىسى ارقاسىندا 2020 -جىلى الەمدىك نارىقتا مۇناي باعاسى تۇراقتاندى»، - دەدى.

اۆتور: باقىتجول كاكەش