ابايدىڭ ۇرپاعى ماناتاي اقساقال: بۇل سايلاۋدان ۇلكەن ءۇمىت، جاقسىلىق كۇتەمىز

وسكەمەن. قازاقپارات - ۇلى ابايدىڭ ۇرپاعى ماناتاي بالتاقاي ۇلى پارلامەنت ءماجىلىسى جانە بارلىق دەڭگەيدەگى ءماسليحاتتار دەپۋتاتتارىنىڭ سايلاۋىنا قاتىسىپ، ءوز تاڭداۋىن جاسادى، دەپ حابارلايدى قازاقپارات ءتىلشىسى.

سەكسەننىڭ سەڭگىرىنە شىققان ماناتاي اقساقال اباي اۋدانىنىڭ قاراۋىل اۋىلىندا دۇنيەگە كەلگەن.

1959-جىلى سەمەي مال دارىگەرلىك ينستيتۋتىن ءتامامداعان. كوپ جىلدار بويى ول ۆەتەريناريا سالاسىندا ەڭبەك ەتتى. 90-جىلدارى اباي اۋدانى اكىمىنىڭ ورىنباسارى، اۋداندىق اۋىل شارۋاشىلىعى كاسىپوداق ۇيىمىنىڭ ءتوراعاسى بولدى. 2000-جىلدان بەرى زەينەتتە.

«بۇگىن حالقىمىز ءۇشىن ايتۋلى كۇن. بۇل سايلاۋدان ۇلكەن ءۇمىت، جاقسىلىق كۇتەمىز. سايلاۋ دەموكراتيا تالاپتارىنا ساي ءوتىپ جاتىر دەپ ەسەپتەيمىن. دەنساۋلىق جاعدايىما بايلانىستى سايلاۋ ۋچاسكەسىنە بارىپ داۋىس بەرە المادىم. سوندىقتان ۇيدەن داۋىس بەرۋگە ءوتىنىش جاساعان ەدىم. ءسويتىپ ۋچاسكە مۇشەلەرى ۇيگە كەلگەن سوڭ ءوز داۋىسىمدى بەردىم. ەلباسىمىزدىڭ جانە پرەزيدەنت قاسىم-جومارت توقايەۆتىڭ باستاماسىمەن مەملەكەت تاراپىنان كوپتەگەن اۋقىمدى شارالار اتقارىلۋدا. بىرلىگىمىز نىعايىپ، حالىقتىڭ جاعدايى جاقسارا بەرسىن! سايلاناتىن دەپۋتاتتار جۇرت مۇددەسىن قورعاۋ جولىندا ايانباي جۇمىس ىستەيتىنىنە سەنەمىن»، - دەدى اقساقال.

ايتا كەتەيىك، ماناتاي بالتاقاي ۇلى قازاقتىڭ تۇڭعىش كاسىبي سكريپكاشىسى ايتكەش تولعانبايەۆتىڭ «قاتال تاعدىر تالكەگى» اتتى ءومىرباياندىق كىتابىن ورىس تىلىنەن قازاق تىلىنە اۋدارعان.

وبلىستىق جانە اۋداندىق گازەتتەردە تۋعان ولكەنىڭ تاريحى مەن تۇعىرى بيىك تۇلعالارى تۋرالى تالاي ماقالالار جاريالادى. ەكى ۇل، ءۇش قىز تاربيەلەپ، ولاردان التى نەمەرە ءسۇيىپ وتىر.