نۇرلان نىعماتۋلين حالىقارالىق بايقاۋشىلارمەن كەزدەستى
مارتەبەلى مەيمان ەلىمىزگە قازاقستان رەسپۋبليكاسى پارلامەنتى ءماجىلىسى جانە ءماسليحاتتارى سايلاۋىنا حالىقارالىق بايقاۋشى رەتىندە كەلگەن، دەپ حابارلايدى قازاقپارات تومەنگى پالاتانىڭ باسپا ءسوز قىزمەتىنە سىلتەمە جاساپ.
كەزدەسۋ بارىسىندا ءماجىلىس ءتوراعاسى ەلىمىزدە حالىقارالىق تالاپتارعا سايكەس اشىق تا ءادىل سايلاۋ وتكىزۋ ءۇشىن بارلىق قاجەتتى جاعدايلار جاسالعانىن اتاپ ءوتتى. ونىڭ ىشىندە، ەپيدەمياعا قارسى شارالار دا قاراستىرىلعان.
سونىمەن قاتار، نۇرلان نىعماتۋلين ءماجىلىس دەپۋتاتتىعىنا كانديداتتار قازاقستاننىڭ حالىق پارتياسى، «Nur Otan»، «اۋىل»، «اق جول» جانە «Adal» پارتيالارىنان قاتىسىپ جاتقانىن ايتتى. ءماجىلىس ءتوراعاسىنىڭ پىكىرىنشە، بۇل الداعى سايلاۋدىڭ باسەكەگە قابىلەتتىلىگىن كورسەتەدى. نۇرلان نىعماتۋلين قازاقستاننىڭ سايلاۋ زاڭناماسىنا سايكەس بارلىق پارتيالىق تىزىمدەردە گەندەرلىك جانە جاس مولشەرىنە قاتىستى كۆوتانىڭ ەسكەرىلگەنىنە نازار اۋداردى.
سونداي-اق، ەلدىڭ ساياسي جۇيەسى جاڭعىرتىلىپ، سونىڭ ناتيجەسىندە ساياسي پارتيالاردى تىركەۋ ءتارتىبى جەڭىلدەتىلىپ، پارلامەنتتىك وپپوزيتسيا ينستيتۋتى ەنگىزىلىپ جاتقانى تۋرالى ايتىلدى. ءوز كەزەگىندە، چەحيا پارلامەنتى دەپۋتاتتار پالاتاسى ءتوراعاسىنىڭ ورىنباسارى ۆويتەح فيليپ قازاقستانداعى سايلاۋ ناۋقانىنا دايىندىققا قاتىستى پىكىرىمەن ءبولىستى.
وسى ۋاقىتقا دەيىن قازاقستاندا بىرنەشە سايلاۋعا قاتىسقانىن العا تارتقان حالىقارالىق بايقاۋشى بۇل جولى دا سايلاۋدىڭ دەموكراتيالىق تالاپتارعا ساي، جوعارى دەڭگەيدە وتەتىنىنە سەنىم ءبىلدىردى. سونىمەن بىرگە، ەكى ەل اراسىنداعى ىنتىماقتاستىق بارلىق سالادا قارقىندى دامىپ كەلە جاتقانىن ايتىپ، وعان قازىرگى پاندەميا كەزىندە دە ەكونوميكالىق-ساياسي بايلانىستاردىڭ بەلسەندى جالعاسۋى ناقتى دالەل ەكەنىن اتاپ ءوتتى. كەزدەسۋ بارىسىندا تاراپتار قازاقستان مەن چەحيا اراسىنداعى ىنتىماقتاستىق ماسەلەلەرىن تالقىلاپ، ونىڭ دامۋىنا ەكى ەلدىڭ پارلامەنتشىلەرى دە ەلەۋلى ۇلەس قوسقانىنا توقتالدى.