ەلباسى استانانىڭ نۇر-سۇلتان بولىپ وزگەرتىلۋىنە قاتىستى پىكىر ءبىلدىردى
نۇرسۇلتان نازاربايەۆ فيلمدەگى سۇحباتىندا ۇلكەن ساياساتتان گورى بۇل جولى جەكە ءومىرى مەن جەكە كوزقاراسى جايلى كوبىرەك سىر شەرتتى. جيەنى ايسۇلتان نازاربايەۆتىڭ ولىمىنە قاتىستى پىكىر ءبىلدىرىپ، استانانىڭ نۇر-سۇلتان دەپ اتالۋىنا قاتىستى ويىن ايتتى. سونىمەن قاتار ەلباسى ادامداردىڭ بويىنداعى قانداي قاسيەتتەردى باعالايتىنىن جەتكىزدى.
«پرەزيدەنت لاۋازىمىندا بولعان كەزىمدە مەن مۇندايعا مۇلدە قارسى بولدىم، تىيىم سالىپ وتىردىم. تاۋەلسىزدىك مەرەكەسى نەمەسە مەنىڭ تۋعان كۇنىم كەلگەن سايىن مەنىڭ ەسىمىممەن قانداي دا ءبىر كوشەنى نەمەسە مەكتەپتى اتاۋ تۋرالى ۇسىنىستار ءتۇسىپ جاتاتىن. ءبىراق ويلاپ قاراساڭىز، ءوزىم وقىعان اباي اتىنداعى مەكتەپكە ءوز اتىڭدى بەرۋگە كەلىسۋ دەگەن مۇلدە دۇرىس ەمەس قوي!؟ مەن وندايعا تىيىم سالىپ وتىردىم. ونى بىلەسىزدەر. كەلىسىمىمدى بەرگەن بىردەن-ءبىر جاعداي - ول ۋنيۆەرسيتەت»، - دەگەن نۇرسۇلتان نازاربايەۆ ەلوردادا ىرگەلى جوعارى وقۋ ورنىن اشۋ يدەياسىنىڭ اۆتورى ءوزى ەكەنىن ەسكە سالدى. ەلباسىنىڭ ايتۋىنشا باسقا جاعدايلاردىڭ ءبارى دە ءوز ماقۇلداۋىنسىز اتالىپ جاتىر.
«تاۋەلسىزدىككە 25 جىل تولعان كەزدە دە پارلامەنت ەلوردانى نۇر-سۇلتان دەپ اتاۋ تۋرالى باستاما كوتەرگەن بولاتىن. بۇرىن قالا اقمولا دەپ اتالعان. استانانى حالىقارالىق دەڭگەيدە تانىستىرۋ مىندەتى تۇر ەدى. قوناقتاردى شاقىردىق. اقمولا دەپ اتاۋ تۋراسىندا دا ءارتۇرلى پىكىر بولعاندىقتان، ويىما ەلوردانى استانا دەپ اتاۋ تۋرالى يدەيا كەلدى. بۇل - جاڭاشىلدىق ەمەس. مىسالى بەيجىڭ دەگەن ءسوز دە سولتۇستىك استانا دەگەندى بىلدىرەدى. سونداي مىسال كوپ. استانا دەگەن اتاۋ جاقسى ءسىڭىسىپ، ادامدار دا، الەم دە ۇيرەندى»، - دەدى ول.
نۇرسۇلتان نازاربايەۆ ەلوردانىڭ اتاۋىن وزگەرتۋ باستاماسىن قازىرگى پرەزيدەنت قاسىم-جومارت توقايەۆتىڭ كوتەرگەنىن ەسكە سالدى.
«از دەگەندە نۇر-استانا، كوپ دەگەندە نۇر-سۇلتان دەپ اتاۋ ۇسىنىلدى. كەزىندە سول جاعالاۋعا قاراپ وتىرعاندا كوز الدىمدا الىپ دالا جاتاتىن. ەشتەڭە جوق ەدى. قازىرگى ەكسپو تۇرعان جەردە كارتوپ پەن ورامجاپىراق وسەتىن ەدى. ال قازىر ول قانداي عاجايىپ قالاعا اينالدى. سۇحبات بەرىپ وتىرعان ءساتتى پايدالانىپ، تاعى دا باسشىلاردان، قازاقستاندىقتاردان سۇرايتىنىم، وندايعا اۋەستەنۋدىڭ قاجەتى جوق. مۇنىڭ تۇك كەرەگى جوق. ءتىرى كەزىندە ەسكەرتكىش ورناتۋ دەگەن ءسوز - ولگەننەن كەيىن ۇرپاق سەنى ەسىندە ساقتاپ قالاتىنىنا سەنبەۋ دەر ەدىم. سوندىقتان مۇندايعا اۋەستەنۋدىڭ قاجەتى جوق دەپ وتىنەمىن. كەرىسىنشە ءبىز قازىر تاريحي اتاۋلاردى قايتارىپ جاتىرمىز»، - دەدى ەلباسى. دەرەكتى فيلمنىڭ سوڭعى نۇسقاسىن مىنا سىلتەمەدەن كورۋگە بولادى.
اۆتور: ايان بەكەن ۇلى