تۇركيادا «قازاقپارات» ديرەكتورلار كەڭەسىنىڭ مۇشەسى قامبار وماروۆ ماراپاتتالدى
بۇل جايىندا ول Facebook پاراقشاسىندا حابارلادى.
«2021 -جىل جاقسى جاڭالىقتارمەن باستالىپ وتىر. تۇركى الەمىندە قازاق مادەنيەتىن ناسيحاتتاپ، العا ىلگەرىلەتىپ جانە حالىقارالىق جوبالاردى جۇزەگە اسىرىپ جۇرگەنىم ءۇشىن تۇركسوي باس حاتشىسى دۇيسەن قاسەيىنوۆ «اباي - 175 جىل» مەرەيتويلىق مەدالىمەن ماراپاتتادى. وسى ناگرادانى تۇركيا پرەزيدەنتىنىڭ كەڭەسشىسىمەن، ساياساتكەرلەر جانە ەلشىلەرمەن، تۇركيانىڭ ءىرى قالالارىنىڭ مەرلەرىمەن قاتار العانىما قۋانىشتىمىن. بىز قازاقستانعا قىزمەت ەتەمىز» دەپ جازادى قامبار وماروۆ.
ايتا كەتەيىك، كەشە تۇركى مادەنيەتى حالىقارالىق ۇيىمىنىڭ شتاب پاتەرىندە ۇلى اقىننىڭ مەرەيتويىنا وراي تۇركسوي ۇيىمى جارىققا شىعارعان «ابايدى وقىعاندا» البومىنىڭ تۇساۋى كەسىلدى. وندا تۇركى الەمى سۋرەتشىلەرىنىڭ تۋىندىلارى جيناقتالعان. سونىمەن بىرگە وسى كەشتە ۇيىم 2020 -جىلى اباي ەسىمىن جانە مۇرالارىن ناسيحاتتاپ، تاراتۋعا ۇلەس قوسقان جانداردى قۇرمەت مەدالىمەن ماراپاتتادى.
