اتىراۋدا مەتانمەن جۇرەتىن اۆتوبۋستار جولعا شىقتى

اتىراۋ. قازاقپارات - اتىراۋ قالاسىندا مەتانمەن جۇرەتىن اۆتوبۋستار مارشرۋتقا شىقتى، دەپ حابارلايدى قازاقپارات.

اتىراۋ قالالىق اكىمدىگى باسپا ءسوز قىزمەتىنىڭ مالىمەتىنشە، «اق جايىق اۆتوپارك» ج ش س- ءنىڭ قارجىسىنا ەكولوگيالىق تۇرعىدان قورشاعان ورتاعا لاس شىعارىندى شىعارمايتىن 160 جاڭا اۆتوبۋس ساتىپ الىنعان.

«جاڭا اۆتوبۋستاردىڭ قوزعالىسىن قامتاماسىز ەتۋ ماقساتىندا اۆتوپارك اۋماعىندا وڭتۇستىككورەيالىق كومپرەسسورلارمەن قامتىلعان مەتان گازىن قۇيۋ بەكەتى بوي كوتەردى. جاڭا گاز قۇيۋ بەكەتى تولىق اۆتوماتتاندىرىلعان. ءوندىرۋشى تاراپ بەكەتتىڭ قىزمەتىنە 10 جىل كەپىلدىك بەرىپ وتىر. مۇندا ءار اۆتوبۋس 15-18 مينۋتقا كىدىرەدى. ءبىر مەزگىلدە قاتار تۇرعان 6 اۆتوبۋسقا كوگىلدىر وتىن قۇيۋ مۇمكىندىگى بار»، - دەيدى اۆتوپارك ديرەكتورى قۋانتاي قالمان.

ونىڭ ايتۋىنشا، ەكولوگيالىق اۆتوبۋستار اتىراۋ قالاسى مەن قالا ماڭىنداعى ەلدى مەكەندەر تۇرعىندارىن 6 باعىتتا تاسىمالداۋدى باستادى. ال، بيىل اتىراۋ قالالىق اكىمدىگى جولاۋشىلار تاسىمالىنا جۇمىلدىرىلعان اۆتوبۋستار سانىن 140 تان 250 گە دەيىن كوبەيتۋدى جوسپارلاپ وتىر.

بۇل ساپتاعى 220 اۆتوبۋس مۇمكىندىگى شەكتەۋلى ازاماتتاردىڭ قاجەتتىلىكتەرى ءۇشىن تولىق بەيىمدەلگەن.

«بيىل قالا تۇرعىندارىنا قولايلى جاعداي جاساۋ ءۇشىن جولاۋشىلار تاسىمالىنداعى 7 باعىتتا اۆتوبۋستاردىڭ قوزعالىس ۋاقىتى جەدەلدەتىلدى. مارشرۋتتاردىڭ ءجۇرۋ باعىتىنا وزگەرىستەر ەنگىزىلىپ، ۇزارتىلدى. قالادا بۇرىن قامتىلماي كەلگەن 3 باعىتقا جاڭادان اۆتوبۋستار شىعارىلدى»، - دەپ حابارلادى قالالىق اكىمدىكتىڭ باسپا ءسوز قىزمەتى.

سونداي-اق، اۆتوپاركتىڭ دايىندىق دەڭگەيىنە بايلانىستى جاقىندا جاڭادان 5 مارشرۋتتى ىسكە قوسۋ جوسپارلانىپ وتىر.