مەيرامبەك: مەن شىرقاعان «بوزتورعاي» سەكىلدى ءاندى ءالى ەستىگەن جوقپىن

نۇر-سۇلتان. قازاقپارات - مەيرامبەك بەسبايەۆتىڭ قازىرگى جاس انشىلەرگە كوڭىلى تولمايدى. ونىڭ وزىندىك سەبەپتەرى بار.

اننەن اۋەن، سوزدەن ءمان كەتكەن ۋاقىتقا تۇسپا- تۇس كەلدىك دەيدى ءانشى. بەسبايەۆ قازاق ونەرىنىڭ جەتىستىگى مەن كەمشىلىگى جايلى باياندادى.

مەيرامبەكتى ەل بالا كۇنىنەن تانيدى. ساحناعا «ساعىندىم كەنەن اتامدى» اتتى انمەن شىققان بالا بۇگىندە قازاق ءان ونەرىنىڭ كورولى. «بوزتورعاي» اتتى ءان شىرقاعان بالا ءانشىنى قازاقتىڭ بوزتورعايى اتاپ كەتتى. بەسبايەۆ بۇگىنگى كۇنگە دەيىن بوزتورعاي سەكىلدى ءان ومىرگە كەلمەگەنىن ايتادى.

«بوزتورعاي» ءوز زامانىنىڭ جوعىن جوقتاعان، پروبلەماسىن ايتقان، وزەكتى تاقىرىپتى جىرلاعان، حالىققا جەتكىزگەن، حالىقتىڭ ويىنداعىسىن اشىق ايتقان ءان. وعان ءان دەپ قانا ەمەس، ۇلكەن تاقىرىپ رەتىندە دە قاراۋعا بولادى. سونداي قيىن تۇستا، كەز كەلگەن ماسەلەنى اشىق ايتا المايتىن تۇستا حالىقپەن ءان ارقىلۋ سويلەسۋ، جەتىمدەردىڭ، قاراگوزدەرىمىزدىڭ كوبەيىپ بارا جاتقانىن ايتۋدى مەن باتىرلىققا تەڭەر ەدىم. ءالى كۇنگە دەيىن ونداي ءان ەستىگەن ەمەسپىن«، - دەدى بەسبايەۆ.

مەيرامبەك بەسبايەۆ قازىرگى كوپ انشىلەردىڭ ونەرگە كەزدەيسوق كەلگەنىن ايتادى. وعان ينتەرنەت ۇلكەن اسەر ەتىپ جاتقانىن مويىندايدى.

«قازىرگى انشىلەر تەز تانىلسام، تويعا شىقسام، جاعدايىمدى جاساپ السام دەپ ويلايدى. ونەر جايلى ەكىنشى ورىندا ويلايدى. ءبىز 12 مىڭ ادامنىڭ ىشىنەن 4 جىگىت تاپتىق. تورتەۋىن شاكىرت دەپ تاربيەلەدىك. وكىنىشكە قاراي، سونىڭ ەكەۋى عانا قالدى. قالعان ەكەۋى ءوز الەمىمەن كەتتى. ولارعا توي قىزىق، تانىمالدىق قىزىق. تەزىرەك ساحناعا شىعۋ قىزىق. قازىرگى جاستار سولاي ويلايدى. سول سەبەپتى ساحناعا كىم كورىنگەن شىقتى. تالعات تەمەنوۆتىڭ ءبىر ءسوزى بار. « ءوزىمدى شوشقا قورادا جۇرگەندەي سەزىنەمىن» دەگەن. قازىرگى جاعداي سونداي بولىپ تۇر ساحنادا روزا رىمبايەۆا دا ءان شىرقايدى، ءانى دە جوق، داۋسى دا جوق ءانشى دە ونەر ءان ايتا بەرەدى. ونەردىڭ شارتتارى بولۋى كەرەك ەدى. وكىنىشكە قاراي، ول جوق«، - دەدى ونەر يەسى.

بەسبايەۆ الەمدىك دەڭگەيگە جەتەتىن قازاق ءانى تۋعانىن قالايدى. ول ءۇشىن ونەردەگى دوستارىنا تالاي رەت قولقا سالعان.

«مەن ونەردە جۇرگەن سازگەرلەرگە، ۇلىقپان جودداسوۆقا، ارمان دۇيسەنوۆ، رينات گايسين سىندى كاسىبي ماماندارعا ۇنەمى ايتىپ جۇرەمىن. توي ءانىن ەمەس، الەمدىك دەڭگەيگە جەتەتىن ءان كەرەك دەپ. بۇل ۇلتتىق قاجەتتىلىك. مۋزارت ءۇشىن ەمەس، قاي ءانشى ورىنداسا دا الەمدىك دەڭگەيگە جەتەتىن ءان تۋعانىن قالايمىن. ول قازاق ءانى بولسا دەگەن ارمانىم بار«، - دەدى بەسبايەۆ.