تۇركيادا ابايعا ەسكەرتكىش ورناتىلىپ، كوشەگە جانە ساياباققا اتى بەرىلدى - شەتەلدەگى قازاق ءتىلدى ب ا ق- قا شولۋ

نۇر- سۇلتان. قازاقپارات- «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

قازاق قىزى «ساپا، ستاندارتىنىڭ تاڭداۋلى ادامى» اتاندى - Kaznews

بايان- ولگي ايماعىنىڭ 2020 -جىلدىڭ «ساپا، ستاندارتىنىڭ تاڭداۋلى ادامى» نوميناتسياسى سىيلىعىنا بايان- مەديانا كومپانياسىنا قاراستى «مەديانا» مەيرامحاناسىنىڭ ديرەكتورى ريزا ميزانباي قىزى يە بولدى، دەپ حابارلايدى Kaznews پورتالى.

بۇل سىيلىق ايماقتىق ستاندارت، مەترولوگيا باسقارماسى تاراپىنان ستاندارتتاۋ، تەحنيكالىق رەتتەۋ، سەرتيفيكاتتاۋ جانە اككرەديتاتسيا تۋرالى زاڭنىڭ، سونداي- اق مەترولوگيا تۋرالى زاڭ باپتارىنىڭ ورىندالۋىنا جانە تۇتىنۋشىلارعا ستاندارت تالاپتارىنا ساي داياشىلىق قىزمەت كورسەتكەنى ءۇشىن بەرىلگەن. اتالعان سىيلىقتى باسقارما باستىعى ءومىر قۇرمەت ۇلى تابىس ەتتى، - دەپ جازادى موڭعوليالىق باسىلىم.

يراننىڭ كوروناۆيرۋسقا قارسى العاشقى ۆاكسيناسى ەگىلدى - «فارس» اقپارات اگەنتتىگى

يراندىق زەرتتەۋشىلەر جاساعان كوروناۆيرۋسقا قارسى العاشقى ۆاكتسينا ەگىلدى، دەپ حابارلايدى parstoday.com.

يراندىق ب ا ق- تىڭ دەرەگىنشە، يمام حومەينيدىڭ بۇيرىعىن اتقارۋشى شتابىنىڭ زەرتتەۋ توبى شىعارعان «COVIRAN باراكات» دەپ اتالعان كوروناۆيرۋسقا قارسى العاشقى ۆاكتسينا كلينيكالىق زەرتتەۋلەردىڭ ءبىرىنشى كەزەڭىنە جەتىپ، ادامعا ەگىلگەن. بۇل تۋرالى اتالمىش شتابتىڭ وكىلى حابارلاعان.

«وسى ۋاقىتقا دەيىن 65000-نان استام ادام ۆاكتسينانىڭ سىناعىنا ءوز ەركىمەن قاتىسۋعا تىركەلدى. سىناقتىڭ ءبىرىنشى كەزەڭىندە ۆاكتسينا 56 ادامعا ەگىلگەنىن يمام حومەينيدىڭ بۇيرىعىن اتقارۋشى شتابىنىڭ اقپارات وكىلى مالىمدەدى»، دەپ جازدى «فارس» اقپارات اگەنتتىگى.

تۇركيادا ابايعا ەسكەرتكىش ورناتىلىپ، كوشەگە جانە ساياباققا اتى بەرىلدى - TRT

تۇركيانىڭ باس قالاسى انكارادا اباي داڭعىلى جانە ەسكەرتكىشى اشىلدى. سونداي- اق، تۇرىك ەلىنىڭ چورۋم قالاسىندا ساياباققا ۇلى اقىننىڭ اتى بەرىلدى، دەپ جازادى تۇركيا راديو تەليەۆيزيا پورتالى.

اتالعان ب ا ق- تىڭ دەرەگىنە سۇيەنسەك، 25-جەلتوقسان كۇنى تۇركيانىڭ چورۋم ايماعىندا قازاق حالقىنىڭ ۇلى تۇلعاسى، تۇركى الەمىنىڭ ۇلى اقىنى، كومپوزيتور، قازاق ادەبيەتىنىڭ نەگىزىن قالاۋشى اباي قۇنانباي ۇلى اتىنداعى ساياباق جانە يسكيليپ عالىمدارى مۇراجايىندا ارنايى اباي بولمەسى اشىلعان. ابايدىڭ 175 -جىلدىق مەرەيتويىن كەڭىنەن اتاپ ءوتۋ شەڭبەرىندە قازاقستاننىڭ تۇركياداعى ەلشىلىگى مەن چورۋم ايماعى يسكيليپ اۋدانىنىڭ مەرياسى بىرلەسىپ قازاق حالقىنىڭ ۇلى تۇلعاسىن دارىپتەۋ ماقساتىندا ارنايى ءىس- شارا وتكىزدى. ساياباق پەن مۇراجايدىڭ اشىلۋ سالتاناتىنا قازاقستاننىڭ تۇركياداعى ەلشىسى ابزال ساپاربەك ۇلى قاتىسقان. ول باۋىرلاس تۇركيا حالقى مەن چورۋم ايماعىنىڭ باسشىلىعىنا قازاق حالقى مەن ابايعا كورسەتكەن زور قۇرمەتتەرى ءۇشىن شىنايى ريزاشىلىعىن ءبىلدىردى. سالتاناتتى اشىلۋ ءراسىمى بارىسىندا چورۋم گۋبەرناتورىنىڭ ورىنباسارى رەدجەپ يۋكسەل ابايدىڭ قۇرمەتىنە ايماقتا اشىلعان نىسانداردىڭ قازاق جانە تۇرىك حالىقتارىنىڭ رۋحاني ءارى مادەني جاقىندىعىن كورسەتەتىن ماڭىزدى ءىس- شارا ەكەنىن اتاپ وتكەن.

«چورۋم ايماعى يسكيليپ اۋدانىنىڭ ءمەرى الي سيۋليۋك ءوز سوزىندە قازاقستان مەن تۇركيا تاريحى تەرەڭ باۋىرلاس مەملەكەتتەر ەكەندىگىن جانە ايماقتا اباي ساياباعى مەن يسكيليپ عالىمدارى مۇراجايىندا ارنايى بولمەنىڭ سالتاناتتى اشىلۋى ەكى مەملەكەت حالىقتارىنىڭ مادەني- گۋمانيتارلىق ىنتىماقتاستىقتى ودان ءارى تەرەڭدەتۋگە دەگەن ۇمتىلىسىن راستايتىن ايقىن ايعاق بولعاندىعىن ايتتى»، دەپ جازدى TRT.

سونداي- اق وسى اپتادا تۇركيانىڭ باس قالاسى انكارادا اباي ەسكەرتكىشى ورناتىلدى. سونىمەن بىرگە اباي داڭعىلى دا اشىلدى.

«ۇلى دالا ماقتانىشى ابايدىڭ 175 -جىلدىق مەرەيتويىنا وراي انكارا قالاسىنا قاراستى گولباشى اۋدانىندا اباي داڭعىلى جانە ەسكەرتكىشى سالتاناتتى تۇردە اشىلدى»، دەپ حابارلايدى تۇركيالىق ب ا ق.

اقسايدا ەرەكشە قورعالاتىن جابايى جانۋارلار كوبەيىپ كەلەدى - «جەنمين جيباو» (People Daily)

اپتا سوڭىندا وسىنداي تاقىرىپتاعى سۋرەتتى اقپارات جارىق كوردى. بۇل اقپاراتتى باسقا دا قىتايلىق باسىلىمدار جارىسا جاريالاعان.

People Daily اقپاراتتىق پورتالىنىڭ دەرەگىنشە، اقساي قازاق اۆتونوميالى اۋدانىندا سوڭعى جىلدارداعى دالا جايىلىمىن قورعاۋدىڭ اسەرىنەن ەكولوگيالىق ورتا قالپىنا كەلە باستاعان. سونىڭ ءبىر مىسالى رەتىندە اتالعان وڭىردە جابايدى قوداستاردىڭ سانى ارتىپ كەلە جاتقانىن ايتۋعا بولادى.

«قىس كەزىندە قىتايدىڭ گانسۋ ولكەسىندەگى اقساي قازاق اۆتونوميالى اۋدانىنىڭ ساحاراسىندا كوپتەگەن جابايى جانۋارلار قارلى دالادا ازىق ىزدەيدى. تاياۋ جىلداردان بەرى جايىلىمدى قورعاۋ، مال جايۋدى شەكتەۋ سياقتى شارالاردىڭ اتقارىلۋىنا بايلانىستى، ساحارانىڭ ەكولوگيالىق ورتاسى قالپىنا كەلە باستادى. سونىڭ ءبىر دالەلى جابايى جانۋارلاردىڭ ءتۇرى، سانى ارتىپ كەلەدى»، دەپ جازادى قىتايلىق ب ا ق.

مەكتەپتەردە ۋاقىتشا وتىلمەگەن پاندەر 3-توقساننان باستاپ وقىتىلادى - «ءو ز ا»

اقپاراتتىق اگەنتتىگى پاندەميا كەزىندە وقۋشىلاردىڭ دەنساۋلىعى مەن الەۋمەتتىك قاشىقتىقتى ساقتاۋ جانە ارتىق قارىم- قاتىناستى بولدىرماۋ ماقساتىندا وقۋ جىلىنىڭ ءبىرىنشى جانە ەكىنشى توقسانىندا دەنە شىنىقتىرۋ، مۋزىكا مادەنيەتى، تەحنولوگيا، بەينەلەۋ ونەرى، سۋرەت جانە ت. ب. ساباقتاردى ۋاقىتشا وتكىزۋگە مۇمكىندىك بولمادى، دەپ حابارلايدى وزبەكستاننىڭ «ءو ز ا» مەملەكەتتىك اقپاراتتىق اگەنتتىگى.

«حالىق ءبىلىم مينيسترلىگى ەپيدەميولوگيالىق احۋال تۇراقتالعانىن، قازىرگى كەزدە ەل اۋماعىنداعى مەكتەپتەردىڭ بارلىعى دەرلىك جۇمىس ىستەپ 5,6 ميلليون (90 پايىز) وقۋشى ءداستۇرلى تۇردە ءبىلىم الىپ جاتقانى بەلگىلى. وسىعان وراي كوپتەگەن اتا- انالاردىڭ ۇسىنىستارىن ەسكەرە وتىرىپ جوعارىداعى اتالعان پاندەر III شيرەكتەن باستاپ قايتا جالعاساتىنىن مالىمدەدى»، دەپ جازدى وزبەكستاندىق ب ا ق.

اۆتور: بەيسەن سۇلتان