نۇر- سۇلتاندا قىسقى دەمالىستى قايدا وتكىزۋگە بولادى

نۇر- سۇلتان. قازاقپارات - جاڭا جىل مەرەكەسىندە ەلوردادا سارىشۇناق اياز كۇشىنە ءمىنىپ تۇر. دەگەنمەن شىقىرلاعان اياز بەن بوران قالا قوناقتارى مەن تۇرعىندارىنىڭ ۋاقىتتى كوڭىلدى وتكىزۋىنە كەدەرگى جاسامايدى.

سونىمەن ەل استاناسىندا كوڭىل كوتەرەتىن مۇز ايدىندارى، سىرعاناقتار قايدا ورنالاسقان؟ قالالىق اكىمدىك تاراتقان مالىمەتكە سەنسەك، شاھارداعى ەڭ جاس، ياعني كۇنى كەشە عانا قۇرىلعان بايقوڭىر اۋدانىندا اتاتۇرىك اتىنداعى ساياباقتا شاڭعىمەن جانە سنوۋبوردپەن سىرعاناۋعا ارنالعان ەلورداداعى العاشقى «NUR- SULTAN SNOWPARK» توبەشىگى ورنالاسقان.

عيماراتتىڭ اۋدانى 720 شارشى مەتردەن اسادى، ۇزىندىعى - 40 مەتر، ەنى - 18 مەتر. سونداي- اق ساياباقتا بيىكتىگى 18 مەتر جاساندى شىرشا، «اياز اتا مەن اقشاقار» ءمۇسىنى ورناتىلعان. ولار جينالعان جۇرتقا مەرەكەلىك كوڭىل- كۇي سىيلايتىنى انىق.

ەسىل وزەنىنىڭ ۇستىندە جالپى اۋدانى 2400 شارشى مەتردەن استام مۇز ايدىنى ورنالاسقان. پارك اۋماعىندا كونكي مەن سنوۋبوردتى جالعا بەرۋ، ىستىق سۋسىن ساتۋ جانە جىلىتۋ ورىندارى كۇندەلىكتى جۇمىس ىستەيدى.

«جاستار» سارايىنىڭ جانىندا بيىكتىگى 5 مەتر جانە ۇزىندىعى 12 مەتردەن استام توبەشىك ورناتىلعان. مۇندا دا 630 شارشى مەتر مۇز ايدىنى بار. اباي داڭعىلىنداعى «جازۋشىلار» اللەياسىندا اياز اتا مەن اقشاقار، سول سياقتى 15 مەترلىك شىرشا، اق ۇلپا قار تۇرىندەگى جارىق وتكەلى، «جاڭا جىلدىق سىيلىقتار» كومپوزيتسياسى، «شار» جاڭا جىلدىق ويىنشىعىنىڭ كىشى ساۋلەتتىك فورماسى جارقىراپ، الىستان مەنمۇندالايدى. اقبيداي كوشەسىندەگى «ءوندىرىس» تۇرعىن الابىنداعى ساياباقتا دا وسىنداي مەرەكەلىك اتموسفەرا ورناعان: مۇندا قىسقى ويىن- ساۋىقتى ۇناتاتىندار ءۇشىن ۇزىندىعى 3 مەترلىك جالپى كولەمى 10 مەترگە سوزىلعان توبەشىك ورناتىلعان.

كەمەڭگەر ۇلى 8/1 كوشەسىندەگى تۇرعىن ءۇي كەشەنىنىڭ اۋلاسىندا اۋدانى 800 شارشى مەتردى قۇرايتىن مۇز ايدىنى پايدا بولادى. چەحوۆ جانە جولىمبەت كوشەلەرىنىڭ قيىلىسىنداعى سكۆەر اۋدانىنداعى «كيرپيچنىي» تۇرعىن ءۇي الابىندا اۋدانى 300 شارشى مەتر مۇز ايدىنى ورناتىلعان.

دوسمۇحامەد ۇلى كوشەسىندەگى ۇيلەردىڭ اۋلالارىندا «كازگورودوك» تۇرعىن الابىندا بيىكتىگى 2,5 مەتر جانە ۇزىندىعى 6 توبەشىك ورناتىلعان. بوس ۋاقىتتى الماتى اۋدانىندا دا كوڭىلدى وتكىزۋگە بولادى. مۇندا 10 ءتۇرلى الاڭ (ونىڭ ىشىندە 4 ەۋى تۇرعىن ءۇي الاپتارىندا) ورنالاسقان، وندا 9 مۇز ايدىنى، 4 كونكيمەن سىرعانايتىن جانە تيۋبينگ ايدىنى، 4 كورتپەن سىرعانايتىن مۇز ايدىنى جانە 2 كەنتتە مۇز ايدىنى بار.

ترياتلون پاركتەگى «م-1» كوپىرىنىڭ استىنداعى جۇرتشىلىققا ارنالعان ورىن دا قالا تۇرعىندارىنىڭ نازارىن وزىنە ەرىكسىز اۋدارادى. ساياباقتىڭ كوركىن ارنايى ورناتىلعان 9 ماتچتىق جارىق تا ارتتىرىپ تۇر. دەمالىس ورىندارىن جايلاستىرۋ بويىنشا جۇمىستار جۇرگىزىلدى. جىلىنۋعا ارنالعان كۇركەلەر، اتكەنشەكتەر ورناتىلدى، سونداي- اق سپورتتىق «Workout» الاڭدارى ۇيىمداستىرىلدى. بۇل شارۋاشىلىقتىڭ بارلىعى قىس مەزگىلىندە تولىقتاي جۇمىس ىستەيدى.

جاقىن ماڭايدا ورناتىلعان كوپىردىڭ اينالاسىندا دا سىرعاناقتار، ءتۇرلى مۇسىندەر جانە شاعىن ساۋلەتتىك فورمالار ورناتىلعان. مۇنىڭ ءبارى كەلۋشىلەردى ەرتەگى الەمىندە جۇرگەندەي اسەردە قالدىرادى. سول سياقتى تاقىرىپتىق دەكوراتسيالارى بار فوتوزونا دا قاراستىرىلعان.

پرەزيدەنتتىك ساياباقتىڭ باستى نازار اۋدارارلىق ورىننىڭ ءبىرى - 6 ادامنىڭ ءبىر مەزەتتە سىرعاناۋىنا مۇمكىندىك بەرەتىن، جالپى ولشەمى 20 م ح 40 م مۇز ايدىنى. ياعني ونىڭ جالپى اۋدانى 800 شارشى مەترگە تەڭ. جاڭا جىلدىق ءداستۇر بويىنشا قوناقتاردى قاسقىر، ايۋ، بۇعى، قويان جانە باسقا دا جانۋارلار تۇرىندەگى مۇسىندەر قوسىمشا ورناتىلعان. كونكيلەردى جالعا بەرەتىن، سونداي- اق قوعامدىق تاماقتاندىرۋ پۋنكتەرى جۇمىس ىستەيدى.

اقبۇلاق وزەنىنىڭ جاعالاۋى دا ەرتەگىدە جۇرگەندەي اسەر قالدىرادى. مۇندا كۇن سايىن جۇزدەگەن تۇرعىن مۇز ايدىنى مەن بيىك سىرعاناقتىڭ ۇستىندە اسىر سالىپ سەرۋەن قۇرادى. سىرعاناقتار مۇزدان قۇيىلعان كىرپىشتەرمەن قالانعان. ونىڭ بيىكتىگى - شامامەن 10 مەتر. وزەن بەتىندەگى مۇز ايدىنى 8000 شارشى مەتردى الىپ جاتىر. ەڭ ۇلكەن توبەشىكتەردىڭ ءبىرى قازاق ەلى مونۋمەنتىنىڭ الدىنداعى الاڭدا ورنالاسقان. توبەشىكتىڭ بيىكتىگى - 13 مەتر، ۇزىندىعى - 35 مەتر. مۇندا 3600 شارشى مەترلىك مۇز ايدىنى بار. ال مۇندا ورنالاسقان شىرشا دەمالىس ورنىنىڭ ءسانىن كەلتىرىپ تۇر.

ەسىل اۋدانىندا «EXPO-2017»، «حان شاتىر» س و و، «جاعالاۋ»، «جەتىسۋ» ساياباعى اۋماعىندا، ەسىل وزەنىنىڭ جاعالاۋى بويىندا، ۇركەر جانە پريگورودنىي تۇرعىن الاپتارىندا سىرعاناقتار مەن مۇز ايدىندارى اشىلدى. سارىارقا اۋدانى اۋماعىنداعى مۇز ايدىندارى مەن توبەشىكتەر ەسىل وزەنىنىڭ جاعالاۋىندا، قالالىق اكىمدىك عيماراتىنىڭ الدىنداعى الاڭدا، كوكتال ساياباعىندا، وقجەتپەس پەن گەرتسەن، قوسشىعۇل ۇلى، 15 جانە تىلەنديەۆ، 15 كوشەلەرىنىڭ قيىلىسىندا ورنالاسقان. جاڭا جىل كۇندەرى ەلوردا تۇرعىندارى مەن قوناقتارى وسى ماڭايدا ۋاقىتتى كوڭىلدى وتكىزە الادى. سەبەبى، ەل استاناسى ۋاقىتتى پايدالى وتكىزۋگە جانە كوڭىلدى وتكىزۋگە ارنالعان كەرەمەت نىساندارىمەن ماقتانا الادى. ارينە، دەمالىس ۋاقىتى بولسا دا سانيتارلىق نورمالاردى ەستە ساقتاۋ قاجەت.