قازاقستاندىق ونەر جۇلدىزدارى جاڭا جىل مەرەكەسىمەن قۇتتىقتادى

نۇر-سۇلتان. قازاقپارات - قازاقستاندىق ونەر جۇلدىزدارى الەۋمەتتىك جەلىدەگى پاراقشاسىندا وتكەن جىل قالاي وتكەنىنە ەسەپ بەرىپ، جاڭا جىل مەرەكەسىمەن قۇتتىقتادى، دەپ حابارلايدى قازاقپارات ءتىلشىسى.

ءانشى ديماش قۇدايبەرگەن جەرلەستەرى مەن تىڭدارماندارىن جاڭا جىل مەرەكەسىمەن قۇتتىقتاپ، شىن جۇرەكتەن العىس ايتتى.

«قۇرمەتتى دوستار، سىزدەردى شىن جۇرەگىممەن جاڭا جىل مەرەكەسىمەن قۇتتىقتاۋعا رۇقسات ەتىڭىزدەر! ەلىمىز امان، جۇرتىمىز تىنىش بولعاي! الەم حالقى امان بولسىن! ارايلاپ اتقان ءاربىر تاڭىمىز بىزگە ىرىس- نەسىبەسىمەن، بەرەكەسىمەن كەلسىن! الەمدە ەشبىر ءسابي جىلاماي، ەشبىر ادام اۋىرماسىن! باستى ماقساتىمىز، باستى ارماندارىمىز ورىندالا بەرسىن. العا قويعان ماقساتتارىمىز ايقىندالىپ، بولاشاققا كەمەل قاداممەن نىق باسىپ، جاڭا بەلەستەردى باعىندىرا بەرەيىك. امان بولىڭىزدار، بار بولىڭىزدار! جاڭا جىلدارىڭىز قۇتتى بولسىن! بارلىق الەمدەگى تىڭدارماندارىما، جەرلەستەرىمە شىن جۇرەكتەن راحمەتىمدى ايتا وتىرىپ، تاعى ءبىر مارتە قۇتتىقتايمىن!»، - دەدى ديماش قۇدايبەرگەن Instagram پاراقشاسىنا.

ءانشى مەيرامبەك بەسبايەۆ دا تاعى ءبىر جىل زۋ ەتىپ وتە شىققانىن جازدى.

«تاعى ءبىر جىل زىمىراپ وتە شىقتى. كەلەر جىل بارشامىزعا جايلى، قۇتتى جىل بولسىن!»، - دەپ جازدى ول Instagram پاراقشاسىنا.

ءانشى ساكەن مايعازيەۆ Instagram پاراقشاسىنا 2020 -جىل ءتاڭىر قاھارلانسا تورتكۇل دۇنيەنى تارىنىڭ قاۋىزىنا سىيدىراتىنىن كورسەتىپ، تاۋبەمىزگە كەلتىرگەنىن جازدى.

«قيىندىقتار ارتتا قالسىن، ارداقتىلارىم. ءار كاللادا ءبىر قيال. ءاربىر جۇمىرباستى پەندەنىڭ ءبىر كەم دۇنيەسى بار. 2020 -جىلى قانشاما اسىل ادامنان ايىرىلدىق. بارشا مارقۇمنىڭ جانى ءجانناتتا شالقىسىن. ەندى قايعى-قاسىرەت كورمەيىك قۇرمەتتىلەرىم. اللا تاعالا جاستاردىڭ توتە ولىمىنەن ساقتاعاي.

2021 -جىلى قاجىلىققا، ىزگىلىككە، بەرەكەگە، مەرەكەگە، تابىسقا تولى جىل بولعاي. كەلەر جىلى بويداقتار ادال جار تاۋىپ، ءاربىر قازاق باسپانالى بولىپ، بەيبىت ەلدە باياندى عۇمىر كەشەيىك!»، - دەدى ءانشى.

قاراقات ءابىلدينا قازاقستاندىقتاردى جاڭا جىلدارىمەن قۇتتىقتادى.

«ساناۋلى ساعاتتاردان سوڭ قوش ايتقالى تۇرعان 2020 -جىلدى ەش رەنىش-وكپەسىز، «كورسەتكەنىڭە شۇكىر» دەپ قانا شىعارىپ سالماقپىز. تاپ وسى جىلى ومىرىمنەن جاقىنىم كەتىپ، ەڭ جاقىنىم ومىرگە كەلدى. ءبارى ءۇشىن ريزامىن...

ءدال وسى جىلى ءوز ومىرىمىزگە ءۇڭىلىپ، جان-جاعىمىزعا قاراپ، ءوز ىشكى ءۇنىمىزدى تىڭداپ، جات بولعان جاقىنىڭدى تانيتىن جىل بولعانداي. وزىمە سولاي ءبىلىندى. گاسترولدەن گاسترول، كونسەرتتەن كونۋەرت، ءبىر ۇشاقتان تۇسە سالىپ، ءبىر ۇشاقپەن ۇشىپ كەتە باراتىن مەن - وتباسى، وشاق قاسىنداعى، بەس بالانى باعىپ، التىنشىسىن تاۋىپ، اس-اۋقاتىن ازىرلەپ، كىر- قوڭىن جۋىپ وتىراتىن ناعىز اياۋلى، قامقور اناعا اينالدىم...

قۇرمەتتى قازاق ەدى! كەلە جاتقان جاڭا جىل ءبارىمىز ءۇشىن قايىرلى، بەرەكەلى، نەسىبەلى جىل بولسىنشى. باسىمىز امان، دەنىمىز ساۋ، ءتورت كوزىمىز تۇگەل، ءتورت قۇبىلامىز تەڭ، سونداي ءبىر جاقسى جىل بولسىن!»، - دەپ جازدى قاراقات ءابىلدينا Instagram پاراشاسىنا.

اۆتور: زارينا قاھارمان