قاسىم-جومارت توقايەۆ رەجەپ تايپ ەردوعانمەن تەلەفون ارقىلى سويلەستى
قازاقستان پرەزيدەنتى كوروناۆيرۋس پاندەمياسىنا قاراماستان ەكى ەل اراسىنداعى ىنتىماقتاستىق تابىستى دامىپ كەلە جاتقانىن اتاپ ءوتتى. بىلتىر ءوزارا ساۋدا كولەمى 2,6 ميلليارد دوللاردى قۇراعان. مەملەكەت باسشىسى ساۋدا-ساتتىقتى ارتتىرۋعا جانە ينۆەستيتسيالىق ىنتىماقتاستىقتى جانداندىرۋعا كۇش سالۋدى ۇسىندى.
تۇركيا پرەزيدەنتى مۇنداي ۇسىنىستى قابىل الىپ، سونىڭ ناتيجەسىندە بىرلەسە وتىرىپ ساۋدا كولەمىن ءۇش ەسەگە ۇلعايتۋعا بولاتىنىن ايتتى. قاسىم-جومارت توقايەۆ كەيىنگى جىلدارى تۇركيانىڭ حالىقارالىق ارەنادا ىقپالى ارتقانىن، وعان تاۋلى قاراباقتاعى قاقتىعىستى توقتاتۋعا قاتىسقانى دا كۋا بولاتىنىن اتاپ ءوتتى.
رەجەپ تايپ ەردوعان كوپ جىلدىق قاقتىعىسقا تۇركيانىڭ ارالاسۋىنا قاتىستى بەرىلگەن باعاعا ريزاشىلىعىن ءبىلدىردى. تۇركيا پرەزيدەنتى كورونوۆيرۋس پاندەمياسىنا قارسى ەكى ەلدىڭ ءىس- قيمىلىن جوعارى باعالاپ، قازاقستان باسشىلىعىنىڭ باتىل ارەكەتىنىڭ ارقاسىندا مەملەكەتتەگى ەپيدەميولوگيالىق جاعداي باقىلاۋعا الىنعانىن جەتكىزدى.
رەجەپ تايپ ەردوعان بيىل قاڭتاردىڭ 10 ى كۇن وتەتىن پارلامەنت سايلاۋىنا ساتتىلىك تىلەپ، داۋىس بەرۋ بارىسىن تۇركيانىڭ وكىلدەرى باقىلايتىنىن ايتتى. اڭگىمەلەسۋ سوڭىندا تاراپتار وسى جىلى تۇركيا پرەزيدەنتىنىڭ قازاقستانعا ساپارىن ۇيىمداستىرۋ مۇمكىندىگىن قاراستىرۋعا ۋاعدالاستى.