اقمولا وبلىسىنىڭ باس سانيتارلىق دارىگەرىنىڭ قاۋلىسى كۇشىن جويدى
بۇعان ءوڭىردىڭ باس سانيتارلىق دارىگەرىنىڭ جاڭا قاۋلىسى سەبەپ بولدى، دەپ حابارلايدى قازاقپارات ءتىلشىسى.
جاڭا قاۋلىعا سايكەس وڭىردە وتباسىلىق، ەستەلىك (بانكەت، ۇيلەنۋ توي، مەرەيتوي، دۇعا) جانە كوپشىلىك جينالاتىن وزگە دە ءىس-شارالاردى، ونىڭ ىشىندە ۇيدە وتكىزۋگە جانە وعان بارۋعا تىيىم سالىنىپ وتىر. سونىمەن بىرگە، جەرلەۋ كەزىندە 2 مەتر قاشىق ساقتالىپ، (وتباسى مۇشەلەرى) 30 ادامنان ارتىق جينالۋعا جول بەرىلمەيتىندىگى ايتىلعان.
مەرەكەلىك، سپورت، مادەني-كوپشىلىك ءىس-شارالاردى وتكىزۋگە، ەرتەڭگىلىك، مەرەكەلىك كورپوراتيۆ ۇيىمداستىرۋعا 2020-جىلعى 30- جەلتوقساننان باستاپ 2021-جىلعى 5- قاڭتارعا دەيىن تىيىم سالىندى. سونداي-اق، ويىن-ساۋىق مەكەمەلەرى (كاراوكە، بيليارد، بوۋلينگ، كومپيۋتەر كلۋبى، تۇنگى كلۋب، اتتراكتسيون)، بۋكمەكەر كەڭسەلەرى قىزمەتىنە تىيىم سالىنىپ وتىر.
«وبلىس-ارالىق، قالا-ارالىق اۆتوبۋس (شاعىن اۆتوبۋس) قوزعالىسىن، تۋريستىك تاسىمالىنا رۇقسات ەتىلەدى. جەكە اۆتوكولىكپەن تەك وڭىرلەر اراسىندا ءجۇرىپ-تۇرۋعا رۇقسات بەرىلەدى»، - دەپ كورسەتىلگەن قۇجاتتا.
بۇدان بولەك، بەلگىلەنگەن تالاپتاردى ساقتاي وتىرىپ جانە ۇجىمدىق ءىس-شارالاردى وتكىزبەي ءدىني وبەكتىلەردىڭ (مەشىت، شىركەۋ، سوبور، سيناگوگا جانە ت. ب.) قىزمەتىنە رۇقسات بەرىلىپ وتىر.
ال، كىتاپحانا، مۇراجاي، گۇلدەر دۇكەنى، فوتوسالون جۇمىس ىستەيدى، الايدا تەاتر مەن كينوتەاتر قىزمەتى توقتاتىلماقشى. ازىق-تۇلىك جانە ازىق-تۇلىك ەمەس اشىق بازارلار تەك جەكسەنبى كۇنى عانا جۇمىس ىستەمەيدى. قاۋلىدا كورسەتىلگەندەي، جول بويىنداعى سەرۆيس وبەكتىلەرى (قوعامدىق تاماقتاندىرۋ جانە ساۋدا) قىزمەتىنە رۇقسات بەرىلەدى، ولار ساعات 00:00 دەن 07:00 عا دەيىن عانا تاماقتى سىرتقا شىعارۋ ارقىلى ساتا الادى.
فيتنەس ورتالىقتارى، جاتتىعۋ زالدارى مەن سپورتتىق-ساۋىقتىرۋ ورتالىقتارى سەنبى جانە جەكسەنبى ىستەمەيدى، قالعان كۇندەرى كۇندەرى الدىن الا جازىلۋ بويىنشا كەلۋشى قابىلدايدى، ورىن سانىن 50 پايىزدان اسىرماي جانە ءبىر ادامعا 5 شارشى مەتردەن كەم ەمەس ورىندى قامتاماسىز ەتۋى ءتيىس.
قوعامدىق كولىكتىڭ جۇمىسىنا (قاربالاس ساتتە اۆتوبۋس سانىن ۇلعايتۋ، كۇللى ەسىكتەردى اشۋ، ادامداردى وتىراتىن ورىن سانى بويىنشا وتىرعىزۋ ) رۇقسات بەرىلەدى. مەملەكەتتىك ورگانداردىڭ، كۆازيمەملەكەتتىك سەكتور ورگاندارىنىڭ، ۇلتتىق كامپانيالاردىڭ، وزگە دە ۇيىمداردىڭ، سونداي- اق كاسىپكەرلىك سۋبەكتىلەرىنىڭ قىزمەتىنە رۇقسات بەرىلەدى.
قىزمەتكەرلەردىڭ كەمىندە 60 پايىزى قاشىقتىقتان جۇمىس اتقارۋى ءتيىس. مەديتسينالىق ورتالىقتاردىڭ، ستوماتولوگيالىق كلينيكالاردىڭ جانە كابينەتتەردىڭ قىزمەتىنە (الدىن الا جازىلۋ بويىنشا)، ءدارىحانالاردىڭ قىزمەتىنە رۇقسات بەرىلەدى. سونىمەن بىرگە، قاۋىلدا 2020-2021 وقۋ جىلىنىڭ ءۇشىنشى توقسانىنان باستاپ كونتينگەنتى 300 وقۋشىعا دەيىن سىنىپتا بالالار سانى 15 كە دەيىن قالا جانە اۋىل مەكتەپتەرىندە ءداستۇرلى فورماتتا وقيتىنى جازىلعان.
اتا-انا ءوتىنىشى بويىنشا سىنىپتاردا 15 وقۋشىدان ارتىق بولمايتىن جالپى ءبىلىم بەرەتىن مەكتەپتەردە كەزەكشى سىنىپتاردا 1 دەن 5-سىنىپتى، حالىقارالىق مەكتەپتەردە-7-سىنىپتى قوسا العاندا وقيدى. قاۋلى 2020-جىلعى 30- جەلتوقسان كۇنى ساعات 07:00 دەن باستاپ كۇشىنە ەنەدى.