ماۋلەن اشىمبايەۆ بيىل پارلامەنتتە قانشا زاڭ قابىلدانعانىن ايتتى
«ەندى ساناۋلى كۇندەردەن كەيىن جاڭا جىلدى قارسى الامىز. شىن مانىندە بيىلعى جىل وڭاي بولعان جوق. پاندەميا ادامزاتتىڭ قالىپتى ءومىرىن مۇلدەم باسقا ارناعا بۇرىپ جىبەردى. سونىڭ سالدارىنان تۋىنداعان جاڭا سىن- قاتەرلەردى ءار مەملەكەت ءوز مۇمكىندىگىنە قاراي ەڭسەرىپ كەلەدى. وسى باعىتتا ەلىمىزدە پرەزيدەنتىمىزدىڭ باسشىلىعىمەن دەر كەزىندە شۇعىل شەشىمدەر مەن ناقتى شارالار قابىلداندى. سوعان سايكەس پارلامەنت جىل بويى مەملەكەت باسشىسىنىڭ باستامالارىن جانە ەلىمىزدىڭ ستراتەگيالىق ساياساتىن زاڭنامالىق تۇرعىدان قامتاماسىز ەتۋ ءۇشىن اۋقىمدى جۇمىس اتقاردى. بۇل رەتتە، سەنات دەپۋتاتتارىنىڭ بەلسەندىلىگىن ەرەكشە اتاپ وتكىم كەلەدى. جالپى، بيىل پارلامەنت 110 زاڭ قابىلدادى. ونىڭ 30 عا جۋىعىنا پارلامەنت دەپۋتاتتارى باستاماشى بولدى»، - دەدى م. اشىمبايەۆ سەنناتتىڭ جالپى وتىرىسىندا.
وسى ورايدا ول ءار زاڭ جوباسى سەناتتىڭ تۇراقتى كوميتەتتەرىندە جان- جاقتى تالقىلانىپ، حالىقتىڭ پىكىرى مەن كوپشىلىكتىڭ ءۇنى ەسكەرىلىپ وتىرعانىن اتاپ ءوتتى.
«مەملەكەت باسشىسىنىڭ جولداۋىن ىسكە اسىرۋعا، پاندەميا سالدارىن ەڭسەرۋگە، ەكونوميكانىڭ ءوسۋىن قالپىنا كەلتىرۋگە باعىتتالعان زاڭدار قابىلدادىق. ازاماتتاردىڭ ءومىر ساپاسىن جاقسارتۋعا، قۇقىعىن قورعاۋعا، دەنساۋلىق ساقتاۋ، ءبىلىم بەرۋ سالالارىن جەتىلدىرۋگە باسىمدىق بەرىلدى. شاعىن جانە ورتا بيزنەستى قولداۋ، قورشاعان ورتانى قورعاۋ، سىبايلاس جەمقورلىقپەن كۇرەس باعىتتارى دا سەناتورلاردىڭ باستى نازارىندا بولدى. ەلىمىزدە دەموكراتيالىق پروتسەستەردى نىعايتۋدى كوزدەيتىن زاڭدار توپتاماسى دا قابىلداندى»، - دەدى سەنات ءتوراعاسى.
«سونىمەن بىرگە اۋىلدىق جەرلەردى دامىتۋ، شاعىن جانە ورتا بيزنەسكە قولداۋ كورسەتۋ جانە ۇلتتىق قۇندىلىقتاردى دارىپتەۋ ماسەلەلەرىنە باسا ءمان بەردىك. بيىل سەنات ۇيىمداستىرعان بىرنەشە پارلامەنتتىك تىڭداۋدا وسى باعىتتار بويىنشا اتقارىلىپ جاتقان جۇمىستار تالقىلاندى. تاياۋدا پارلامەنتاريزم ينستيتۋتى قۇرىلعانىن دا بىلەسىزدەر. بۇل قۇرىلىم دەپۋتاتتاردىڭ زاڭ شىعارۋ باستاماشىلدىعىن جەتىلدىرۋگە، قوعام مەن ساراپشىلاردىڭ پىكىرىن ەسكەرۋگە جانە وڭىرلەردەگى ماسەلەلەرگە باسا ءمان بەرۋگە ىقپال ەتەدى دەپ سەنەمىز. وسىعان وراي پارلامەنت بيىل ەل ءۇشىن اۋقىمدى جۇمىس اتقاردى دەۋگە تولىق نەگىز بار. سوندىقتان بارشاڭىزعا العىسىمدى بىلدىرەمىن»، - دەدى ماۋلەن اشىمبايەۆ.
اۆتور: رۋسلان عابباسوۆ