قىتايدا كارانتين كۇشەيتىلىپ، قازاقستاننان جۇك ۆاگوندارىنىڭ ءوتۋى قيىندادى

نۇر- سۇلتان. قازاقپارات - قىتايدا كارانتيندىك شەكتەۋلەردىڭ كۇشەيتىلۋىنە بايلانىستى قازاقستان- قىتاي شەكاراسىندا جۇك ۆاگوندارىنىڭ كەزەگى قالىپتاستى.

ق ر يندۋستريا جانە ينفراقۇرىلىمدىق دامۋ مينيسترلىگى ماسەلەگە تۇسىنىك بەردى، دەپ حابارلايدى قازاقپارات.

«24 - جەلتوقساندا ق ر يندۋستريا جانە ينفراقۇرىلىمدىق دامۋ مينيسترلىگى «قازاقستان تەمىر جولى» ۇ ك» ا ق- مەن بىرلەسىپ، ق ر جانە ق ح ر شەكارالىق وتكەلىندەگى اعىمداعى جاعدايدى باعالاۋ ءۇشىن «اتامەكەن» ۇ ك پ وكىلدەرىنىڭ، ءىرى جۇك جونەلتۋشىلەردىڭ، ۆاگوندار (كونتەينەرلەر) وپەراتورلارىنىڭ جانە ەكسپەديتورلاردىڭ قاتىسۋىمەن دوستىق ستانسياسىنا باردى. بۇگىندە قىتاي تاراپىنىڭ كوروناۆيرۋس پاندەمياسىنىڭ الدىن الۋ ءۇشىن كارانتيندىك شارالاردى كۇشەيتۋىنە بايلانىستى ق ح ر- عا باعىت العان جۇك ۆاگوندارىنىڭ ۇزاعىنان تۇرىپ قالۋى بايقالادى. وعان سەبەپ - قىتاي تاراپىنىڭ قابىلداماۋى»، - دەلىنگەن ق ر ي ي دم اقپاراتىندا.

ءمالىم ەتىلگەندەي، دوستىق- الاشاڭقاي شەكارا وتكەلى ارقىلى جۇك پويىزدارىن وتكىزۋ تاۋلىگىنە 8-12 بىرلىكتەن اسپايدى. قاجەت بولعان جاعدايدا كەمىندە 18 بىرلىكتى قۇرايدى.

«وسىعان بايلانىستى، كۇن سايىن ق ح ر باعىتىندا جۇكتەرى بار 7 مىڭنان استام ۆاگون تاسىمالداۋمەن قامتاماسىز ەتىلمەيدى. ساپار بارىسىندا قاتىسۋشىلارعا قازاقستان- قىتاي شەكاراسى ارقىلى وتەتىن جانە كەستە بويىنشا كەلگەن ەكى پويىزدا كونتەينەرلەردى قايتا تيەۋ، جۇكتەردى قابىلداۋ جانە جونەلتۋ پروتسەسى كورسەتىلدى. سونداي- اق، «دوستىق» ب ءو پ شەكتەۋ قىزمەتىنىڭ، ستانسيادا قايتا تيەۋ پروتسەسىن جۇزەگە اسىراتىن ۆاگوندار مەن وبەكتىلەردىڭ ورنىن اۋىستىرۋ پۋنكتىنىڭ جۇمىسى كورسەتىلدى.

بۇدان بولەك، «ەۆروترانزيت» ج ش س، «ەۆروترانس گرۋپ» ج ش س جانە «دوستىق ترانس تەرمينال» ج ش س قايتا تيەۋ تەرمينالدارىن سالۋ جوبالارى تانىستىردى. تەكسەرۋ قورىتىندىسى بويىنشا كولىك كوميتەتى ءتوراعاسىنىڭ ورىنباسارى ج. تايجانوۆتىڭ توراعالىعىمەن كەڭەس وتكىزىلدى جانە قالىپتاسقان جاعدايدى شەشۋ ءۇشىن ءبىرقاتار شارا تالقىلاندى. سونداي- اق، كەڭەس بارىسىندا دوستىق ستانسياسىنىڭ جۇمىسىمەن تانىسۋدىڭ قورىتىندىسى بويىنشا بيزنەس وكىلدەرى ق ح ر- عا جۇكتەردى تاپسىرۋ كەزىندە قازاقستاندىق تاراپتا شەكتەۋلەردىڭ جوقتىعىنا جانە «ق ت ج» ۇ ك» ا ق الاشاڭقاي ستانسياسى بويىنشا ق ح ر ەنگىزگەن شەكتەۋلەردى الىپ تاستاۋ كەزىندە جەتكىزۋ كولەمىن تاۋلىگىنە 18 جۇپ جۇك پويىزىنا دەيىن ۇلعايتۋعا دايىن ەكەندىگىنە كوز جەتكىزدى»، - دەدى مينيسترلىكتەن.