جۋالىدا باۋىرجان مومىش ۇلىنىڭ بيۋستى اشىلىپ، ستەلا بوي كوتەردى
تۇلعانىڭ مەرەيتويى ءوزىنىڭ تۋىپ-وسكەن جۋالى جەرىندە اتالىپ ءوتتى. مەرەيتوي شارالارى ب. مومىش ۇلى اۋىلىنداعى باتىر ەسكەرتكىشىنە گۇل شوعىن قويىپ، رۋحىنا تاعزىم ەتۋدەن باستالدى.
بۇدان سوڭ باۋىرجان مومىش ۇلىنىڭ كىندىك قانى تامعان مىڭبۇلاق وڭىرىندەگى مومىش بۇلاعىنىڭ باسىندا باتىردىڭ ءارۋاعىنا ارناپ قۇران وقىلدى. دەمەۋشىلەردىڭ كومەگىمەن بۇلاق باسىنا باراتىن ءبىر شاقىرىمعا جۋىق جولعا شاعالتاس توسەلىپ تەگىستەلدى. بۇلاق باسى قورشالىپ، ءسان اعاشتارى وتىرعىزىلعان. ارنايى بوي كوتەرگەن ستەلانىڭ اشىلۋ سالتانى ءوتتى.
شاراعا ق ر سىبايلاس جەمقورلىققا قارسى اگەنتتىگىنىڭ جامبىل وبلىسى بويىنشا دەپارتامەنتىنىڭ باسشىسى ءادىلحان اشىربايەۆ، اۋدان باسشىلارى مەن ارداگەرلەر ۇيىمدارى مەن جۇرتشىلىق وكىلدەرى قاتىستى.
«جۋالى» مەشىتىنىڭ يمامى سەيىتقازى قاجى مەدەتبەك قۇران اياتتارىن وقىدى. اۋداننىڭ قادىرمەندى اقساقالى، مومىش بۇلاعىنىڭ كۇتىمگە الىنىپ، كوركەيۋىنە ەڭبەك سىڭىرگەن امانجول قاجى ءدۇرالى ۇلى كوپشىلىككە اق باتاسىن بەردى.
سونداي-اق، جۋالى اۋدان اۋماعىندا ورنالاسقان ق ر ۇلتتىق قاۋىپسىزدىك كوميتەتى شەكارا قىزمەتىنىڭ جامبىل وبلىستىق دەپارتامەنتىنە قاراستى باۋىرجان مومىش ۇلى اتىنداعى شەكارا بولىمشەسىندە باتىر بيۋستىنىڭ اشىلۋى سالتاناتى ءوتتى. شەكارا بولىمشەسىنىڭ جەكە قۇرامى مەرەكەلىك ساپقا تۇرعىزىلىپ، مەملەكەتتىك ءانۇران شىرقالدى.
جامبىل وبلىسى اكىمىنىڭ ورىنباسارى تالعات مامايەۆ، جۋالى اۋدانىنىڭ اكىمى نارباي ەرگەبەكوۆ، شەكارا قىزمەتى جامبىل وبلىستىق دەپارتامەنتىنىڭ باسقارما باستىعى قاناتبەك تىنىبەكوۆ شەكاراشىلار مەن جيىلعان جۇرتشىلىقتى وسىناۋ ماڭىزى تەرەڭ قۋانىشتى وقيعامەن قۇتتىقتاي وتىرىپ، ىزگى لەبىزىن ءبىلدىردى.
باتىر بيۋستىنىڭ لەنتاسىن تالعات مامايەۆ پەن اۋداندىق ارداگەرلەر كەڭەسىنىڭ ءتوراعاسى ەستەمەس امانبەكوۆ كەستى. تۇلعانىڭ مەرەيتويىنا وراي اۋداندا وزگە دە ءىس-شارالار ۇيىمداستىرىلدى.