اتىراۋلىق وقۋشىلار حالىقارالىق عىلىمي جوبالار سايىسىنىڭ ۇزدىگى اتاندى

None
None
اتىراۋ. قازاقپارات - اتىراۋ قالاسىنداعى وبلىستىق دارىندى بالالارعا ارنالعان مامانداندىرىلعان مەكتەپ- ليتسەي-ينتەرناتىنىڭ ەكى وقۋشىسى حالىقارالىق عىلىمي جوبانىڭ ۇزدىگى اتاندى، دەپ حابارلايدى قازاقپارات.

وبلىستىق ءبىلىم باسقارماسى باسپا ءسوز قىزمەتىنىڭ مالىمەتىنشە، برازيليانىڭ نوۆو-گامبۋرگ قالاسىندا «MOSTRATEC» 35-حالىقارالىق ءبىلىم كورمەسى وتكەن. وعان الەمنىڭ 35 ەلىنەن 752 وقۋشى قاتىستى.

ولاردىڭ اراسىندا قازاقستاننىڭ مەكتەپتەرىنەن 25 وقۋشى بار. ال اتىراۋ وبلىستىق دارىندى بالالارعا ارنالعان مامانداندىرىلعان مەكتەپ-ليتسەي-ينتەرناتىنىڭ 11-سىنىپ وقۋشىسى اقبوتا جۇباتقان ماتەماتيكا پانىنەن 1- ورىندى يەلەنگەن. تاعى 11-سىنىپ وقۋشىسى ايدانۋر دەميردجي تاريح پانىنەن 3- ورىن العان.

«جاز ماۋسىمىنىڭ اياقتالۋىنا ون شاقتى كۇن قالعاندا سىنىپ جەتەكشىم «Mostratec» اتتى حالىقارالىق عىلىمي جوبالار سايىسى وتەتىنىن حابارلادى. سول حاباردى ەستىگەن سوڭ دايىندالا باستادىم. الايدا، پاندەمياعا بايلانىستى اتالعان سايىس قاشىقتان وتەتىن بولدى. سوعان قاراماستان، سايىس وتە قىزىقتى، ءارى تاجىريبەگە تولى بولىپ ءوتتى. بايقاۋ «Jitsi meet» اتتى ۆيدەو- كونفەرەنسيالارعا ارنالعان ءموبيلدى قوسىمشانىڭ كومەگىمەن ءوتتى. ءبىز ءوز جوبامىزدى اعىلشىن تىلىندە قورعادىق. بۇل سايىستان كوپ تاجىريبە جينادىق»، - دەيدى اقبوتا جۇباتقان.

اتىراۋلىق وقۋشىلاردى جوباعا قىزدار ليتسەيىنىڭ بەيىندى وقۋ ءىسىنىڭ مەڭگەرۋشىسى وكسيۋز راحمان مەن ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ وقىتۋشىسى اققابىل ابيروۆ دايىنداعان.

ەسكە سالا كەتەلىك، بۇعان دەيىن اتىراۋلىق وقۋشىلاردىڭ عىلىمي جۇمىسى حالىقارالىق جيناققا ەنگەنىن جازعان بولاتىنبىز.

سوڭعى جاڭالىقتار